Read Ebaibuli 1961 1 Ikabakan 8 Bible Online

1 Ikabakan 8 - Ebaibuli 1961 bible

1 Ikabakan 8

¹ Kosodi Solomon atukokin imakio luka Isirael, ka ikapolok kere luka atekerin, ikapolok luka ikekia luka lukapapa luka idwe luka Isirael mama ejai ekabaka Solomon Yerusalem, ayaun asaduku naka aitutuket naka EJAKAIT anyoun kore loka Daudi, ŋes Sion.

² Kotukonokinos ituŋa kere luka Isirael mama ejai ekabaka Solomon opucit, kolap Etanim, ŋes elap lokikanyetekaarei.

³ Kopotu imakio kere luka Isirael da, kodakut isasedotin asaduku.

⁴ Koyaut asaduku naka EJAKAIT, ka ewema loka airiamunun, ka iboro kere lukalaunak luajaas owema; kes iboro luapotu isasedotin ka Ilebin koyaut.

⁵Kosodi ekabaka Solomon ka ekodet kere loka Isirael luatukonokinos mama ejai ŋesi, ajaas kaŋes kiŋaren kasaduku, koinakis amerekekin ka imoŋin araun asuban numam epedorio alimun karaida aimarun kanuka aipues.

⁶ Kitolomasi isasedotin asaduku naka aitutuket naka EJAKAIT aiboisike, toma aibois neinerenenere akirot naka etogo, aibois nakalaunan noi, kwap kabebenoka nuka ikerubin.

⁷Naarai kigararas ikerubin abebenokakec kuju aibois naka asaduku, korapias ikerubin asaduku ka adaketake.

⁸ Kewojak adaketa tetere etakani esaŋekec kaibois nakalaunan koiŋaren kaibois neinerenenere akirot; konye mam ketakanete kokiŋa; ejaas nepenen, kiton lolo.

⁹ Amamei ibore kotoma asaduku dimarai amor aarei nuabu Musa kibwaik koKoreb, nakitutukio EJAKAIT aitutuket kaidwe luka Isirael, nakelomuniata kakwap nako Misiri.

¹⁰Kosodi kanen, kedaut isasedotin alomun kaibois nakalaunan, kilelebun edou togo loka EJAKAIT.

¹¹Mam isasedotin apotu kopedosi aibwo aijaanakin kanuka edou: naarai kilelebun aibuses naka EJAKAIT etogo loka EJAKAIT.

¹² Kosodi Solomon einer atiar, “Abala EJAKAIT ebe iboienenei ŋesi kamuton naejesi ŋaŋ.

¹³ Abeit kadukok jo etogo aiboikin, Aibois naiboieneno ijo ikar kere.”

¹⁴ Kibelokin ekabaka, kilipak ekodet kere loka Isirael arereŋ: kobwo ekodet kere loka Isirael.

¹⁵ Kotema ŋesi atiar, “Kituritete EJAKAIT, Edeke loka Isirael, loabu kiner kakeituk mama ejai Daudi papaka, ido kitodol da kakekan ebe,

¹⁶ ‘Ageun kapaaran naketolomunia ikatuŋa Isirael koMisiri, mam abu kaseu ere katekerin kere nuka Isirael aiduk etogo, tetere ejaun nen ekakiror; konye abu kaseu Daudi apolokin ikatuŋa Isirael.’

¹⁷Abu Daudi papaka koomite kotauke adukokin ekiror loka EJAKAIT, Edeke loka Isirael, etogo.

¹⁸Konye abu EJAKAIT kotema Daudi papaka atiar, ‘Naarai iwomit ijo kotaukon adukokin ekakirot etogo, iswama ejok aomit kotaukon:

¹⁹Konye mam jo iduki etogo; konye okokukon, loelomuni kakuanakon, ŋes edukokini ekakiror etogo.’

²⁰Etodol EJAKAIT akekirot naabu kiner; naarai anyou eoŋ aibois naka Daudi papaka, eboikini oicoloŋ loka Isirael, kwape esumunia EJAKAIT, adukok ekiror loka EJAKAIT, Edeke loka Isirael, etogo.

²¹ Nepenen da ebwaik aibois naka asaduku, naejai aitutuket naka EJAKAIT tomake, naetutuki ŋesi kalukapapaawok, nakitolomunia kes kakwap nako Misiri.”

²² Kobwo Solomon koiŋaren ketem loka EJAKAIT kakonyen nuka ekodet kere loka Isirael, korio akekanin kuju:

²³ Kobala ebe, “Wu EJAKAIT, Edeke loka Isirael, emamei Edeke loiputosi kajo, kuju toma akuj, arai kokwap kakwap; loitodolenenei aitutuket ka aitim kikonikejaanakinak luelosenenete kakonyenekon kikecetauon kere:

²⁴Loitodolik ekonikejaanakinan Daudi papaka ŋun nuibu kisumun ŋes: eebo, ibu kiner kaitukukon, itodolo da kakanikon, kwape ejaatar lolo.

²⁵ Aso, wu EJAKAIT, Edeke loka Isirael, kitodolik ekejaanakinanikon Daudi papaka ŋun nuibu kisumun ŋes ebe, ‘Mam kimamikini ijo etuŋanan loiboikin oicoloŋ loka Isirael kakonyeneka kwape ilosenenoo ijo kakonyeneka.’

²⁶ Aso do, wu Edeke loka Isirael, keŋaiŋait, kitogogoŋoi akonikirot, nakilimokini ekonikejaanakinan Daudi papaka.

²⁷ “Konye iboie kereka Edeke abeit kakwap? Koany, mam epedori akuj ka akuj naka akuj ailosikin jo; ido konyet etogo lo loadukit eoŋ ŋes bo inyo!

²⁸ Konye kocam ijo ailip naka ekonikejaanakinan, ka aiŋaiŋake, wu EJAKAIT Ekadeke, akiirar aimony ka ailip nailipi ekonikejaanakinan kakonyenekon lolo:

²⁹ Kokwenyenenete akonikonyen asesen etogo lo apaaran ka akuar, ŋes aibois nakolo ilimit ebe, ‘Ejaenena nen ekakiror’: akiirar ailip nailipi ekonikejaanakinan kaibois kana.

³⁰ Kiiranari da aiŋaiŋa naka ekonikejaanakinan, naka ikonituŋa Isirael da nailipenenata kesi kaibois kana: eebo, kiiranari ijo ijai toma akuj aiboisikon: ido naipupunio, kisionie.

³¹“Arai kediak etuŋanan kama ejai eidunyeteke, kisiyapoikinoi aiyaposit, ebuni ŋesi aiyapo koiŋaren ketemukon togo lo;

³² Kopupununei do ijo ijai toma akuj, kiswama, kotubok ikonikejaanakinak, kiteteleka ikaronon, aitoboŋikin ekepone akouke; kitojok da ikadoliton, ainakin ŋes kwape ejaar adoliteke.

³³ “Naedanyere ikonituŋa Isirael kakonyen nuka lukasurup, naarai adiakasi kamakon; arai kibelokinos mamakon, kolimorete ekonikiror, ilipete, kiŋaiŋaete jo kotogo kalo:

³⁴Kopupununei do ijo ijai toma akuj, kisionie aronis naka ikonituŋa Isirael, kinyaku kes bobo akwap nakiinakinit lukapapakec.

³⁵“Naegolokinere akuj, komamei akiru, naarai adiakasi kamakon; arai ilipete kiteete aibois na, kolimorete ekonikiror, kibelokinos anyoun karonisikec, nakiticania ijo kes;

³⁶ Kopupununei ijo ijai toma akuj, kisionie aronis naka ikonikejaanakinak ka naka ikonituŋa Isirael, nakisisianakinia ijo kes erot loejok loibusakinit kes aloseneno; kitetep akiru akwapukon, naibu koinak ikonituŋa araun airumet.

³⁷ “Arai kejaun ebeli kakwap, arai kejaun atular, arai kejaun ekure arai airouroun, emaase arai ekutelek; arai kirigaun lukasurupokec kakwap naka ireriakec; ŋinitular kere, ka ŋinidek kere naejaunor;

³⁸ŋiniilip ka ŋinikiŋaiŋa nailipi ituŋanan kere, arai ikonituŋa Isirael kere, yenejeni ŋinituŋanan atular nakotauke, korio akekanin mama ejai etogo lo:

³⁹ Kopupununei do ijo ijai roma akuj aiboisikon, kisionie, kiswama, koropi ŋinituŋanan kwape ejaatar iponesioke, yenijeni ijo etauke; (naarai ijo, ijo bon ijeni itauon luka idwe luka ituŋa kere:)

⁴⁰Tetere kiyoŋete jo apaarasia kere nuiboienenoto kesi kakwap nakiinakinit lukapapaakosi.

⁴¹“Bobo da nuka imoit, yenimere yenika ikonituŋa Isirael, naenyounio ŋesi kakwap naelwana kanuka ekonikiror;

⁴² (Naarai iirarete kesi nuka ekonikiror lokapolon, nuka akanikon nakagogoŋon, nuka akanikon naerioro;) naebunio ŋesi ailip kitei etogo lo:

⁴³ Kopupununei ijo ijai toma akuj aiboisikon, kiswama kwape ejaatar kere nukiworoi imoit jo; tetere ejenunete atekerin kere nuka akwap ekonikiror, koyoŋito jo, kwape kiyoŋitotor ikonituŋa Isirael, tetere ejenunete ebe emaikinitai etogo lo loadukit eoŋ ekonikiror.

⁴⁴“Arai kelomasi ituŋakon aitiji lukasurupokec, korot kere loijukari ijo kes, ilipete EJAKAIT kiteete ere lokiseuni ijo, kiteete da etogo loadukokinit eoŋ ekonikiror:

⁴⁵Kopupununei do jo ijai toma akuj akecekilip, ka akeceiŋaiŋa, kisigalik akecekirot.

⁴⁶ “Arai kediakasi kamakon, (naarai emamei ituŋanan yenimam ediakari) inyunyurikini ijo kes, ijaikini kes lukasurupokec, tetere ijoreorete kes akwap naka lukasurup, naelwana arai naeapie;

⁴⁷ Arai keomoomata kesi kakwap naejoreoritai, kibelokinos bobo, kiŋaiŋaata ijo kakwap naka ŋul kalukijoreorete kes, kobalasi ebe, ‘Kidiaka isio, kiswama nukepali, kikwaik erono’;

⁴⁸ Arai keboŋut mama ijai ijo kikecetauon kere, kaijarakec kere kakwap naka lukasurupokec, luejoreorete kes, kilipete jo kiteete akwapukec, nakiinakinit lukapapaakec, ere lokiseuni ijo, ka etogo loadukokinit ekonikiror:

⁴⁹Kopupununei do ijo akeceilip ka akeceiŋaiŋa ijai toma akuj aiboisikon, kisigalik akecekirot;

⁵⁰ Kisionie ikonituŋa luapotu kodiakasi kamakon, ka aibucaretakec kere nuebucarete kamakon; koinak kes aitimio kakonyen nuka ŋul kaluejoreorete kes, tetere itimete kes:

⁵¹Naarai eraas ikonituŋa, ka airumetekon, naitolomuni kolo koMisiri, anyoun kokidiŋ oupa loka asuat:

⁵²Kokwenyenenete akonikonye aiŋaiŋa naka ekonikejaanakinan, ka aiŋaiŋa naka ikonituŋa Isirael, kiiranari kes naemonyananata mamakon.

⁵³Naarai ibu kotiak kes katekerin kere nuka akwap, araun airumetekon, kwape ibalar kama ka Musa ekonikejaanakinan, naitolomunia lukapapaakosi koMisiri, wu EJAKAIT Edeke.”

⁵⁴Kosodi, kedau Solomon ailip ailipasit ŋin kere ka aiŋaiŋa mama ejai EJAKAIT, konyou ŋesi koiŋaren ketem loka EJAKAIT, kane nan ekukokina eriorit akaninike akuj.

⁵⁵ Kobwo ŋesi, kilipak ekodet kere loka Isirael arereŋ keporoto loepol ebe,

⁵⁶ “Kituritete EJAKAIT, loabu kisiyeŋ iketuŋa Isirael, kwape ejaatar kere nuabu kisumun: mam adiokirot kere naeoliorit kaisumunetake nuejok, nuesumunit kakan naka Musa ekejaanakinanike.

⁵⁷ Kojaenena EJAKAIT Ewokodeke kaoni, kwape ajaenenar kalukapapaawok: kinyek ŋesi anyoun kamawok, karaida ajalakin oni:

⁵⁸ Tetere isibelokini itauonowok mamake, alosenen korotinike kere, aricenen aicorakinetake, ka ikisilake ka itubesiake, luecorakinit lukapapaawok.

⁵⁹Akakiro nu, nueŋaiŋa kakonyen nuka EJAKAIT, koapikis kesi EJAKAIT Ewokodeke paaran ka kuare, kisigalik akirot naka ekejaanakinanike, ka akirot naka iketuŋa Isirael, kwape ekotor ŋinipaaran.

⁶⁰ Tetere ejenunete atekerin kere nuka akwap ebe EJAKAIT, ŋes Edeke; emamei ece kere.

⁶¹ Kodolioritos do itauonokus mama ejai EJAKAIT Ewokodeke, alosenen kokisilake, aricenen aicorakinetake, kwape lolo.”

⁶²Kosodi ekabaka ka Isirael kere nepepe kaŋes, koinakis asuban mama ejai EJAKAIT.

⁶³Koinak Solomon asubanit naka ainapakin nakeinakini EJAKAIT, imoŋin ilukumin akaisaarei ka luarei, ka amerekekin alukumin akwatat ka akaisaarei. Kwaŋin kotiaku ekabaka ka idwe luka Isirael etogo loka EJAKAIT.

⁶⁴Kapaaran kaŋipekaŋin da kitalau ekabaka kidiŋ alaro naajai kiŋaren ketogo loka EJAKAIT; naarai koinak kanen ainakinet naicweio, ka ainakinet naka akiria, ka asiepai nuka ainakineta nuka ainapakin: naarai adit etem loka aisinit loajai akonyen nuka EJAKAIT ailosikin ainakinet naicweio, ka ainakinet naka akiria, ka asiepai nuka ainakineta nuka ainapakin.

⁶⁵ Kipo Solomon epucit kapak kaŋin, ka Isirael kere kaŋes, ekodet loepol, anyoun kaneelomarere Kamat kiton aguurut nako Misiri, kakonyen nuka EJAKAIT Ewokodeke, apaarasia akanykaarei, ka apaarasia akanykaarei, kes apaarasia atomon ka nuoŋon.

⁶⁶Kapaaran nakikanyetekauni kotwar ituŋa, kilipakis kesi ekabaka arereŋ, koloto owemanakec kolakara, kiyalamas kotauon kanuka ajokis kere naetodiki EJAKAIT Daudi ekejaanakinanike, ka Isirael iketuŋa.