Read Ebaibuli 1961 1 Ikabakan 9 Bible Online

1 Ikabakan 9 - Ebaibuli 1961 bible

1 Ikabakan 9

¹ Kosodi kanen, kedau Solomon aiduk etogo loka EJAKAIT, ka etogo loka ekabaka, ka eipud kere loka Solomon loisiyalamikinit ŋesi aswam.

² Kitaanyikin EJAKAIT Solomon nakiareit kwape kolo etakanikinor ŋes koGibeon.

³Kotema EJAKAIT ŋes atiar, “Eira eoŋ ailipikon ka aiŋaiŋakon, nailipit kakonyeneka: etalau eoŋ etogo lo, loiduk ijo, aibwaikin ekakiror ikar kere; ejaenenas akonyeka ka etauka nen apaarasia kere.

⁴ Ka jo da, arai ilosenenei kakonyeneka, kwape aloseneno Daudi papakon, kadolit nakotau, kaitenara, aiswamaenen kwape ejaatar kere nukecorakinit jo, aricenen ikakisila, ka itubesiaka;

⁵ Kasodi eoŋ aiticat eicoloŋ loka ajakanutukon koIsirael ikar kere; kwape esumunio eoŋ Daudi papakon ebe, ‘Mam kimamikini ijo etuŋanan koicoloŋ loka Isirael.’

⁶ Konye arai kipaasi anyoun katupit eoŋ, yes arai ikusidwe, komam iricenenete aicorakinetaka ka ikisilaka luebwaikinit kakonyenekus, konye ilosete ijaanakinete idekesio ice, imaete kes:

⁷ Kasodi eoŋ amudiar Isirael kakwap naainakinit kes; acakari etogo lo, loetalaunit kanuka ekakiror kakonyeneka; eraun Isirael awarag ka ikienis katekerin kere:

⁸ Karaida kimukurur etogo lo, konye eumokini ŋinituŋanan yenitori, ijuari; ebalasi ebe, ‘Kanukinyo asubakinia EJAKAIT akwap na kwaŋin ka etogo lo?’

⁹Eboŋokinete ebe, ‘Naarai apotu kojala EJAKAIT Ekecedeke, lokolo etolomuni lukapapaakec kakwap nako Misiri, kitiŋata icedekesio, komaata kes, kijaanakis kes: kanuka ŋun abu EJAKAIT koyau aronis na kere mamakec.’ ”

¹⁰Kosodi kanen ketuboros ikar akaisaarei, luadukio Solomon itogoi ŋul iarei, etogo loka EJAKAIT ka etogo loka ekabaka,

¹¹(Abu Kiram ekabaka loka Turo koinak Solomon ikito luka eres ka ikito luka eberos, ka esabu, kwape ajaar akoteke kere,) kosodi ekabaka Solomon da ainakin Kiram ireria akaisaarei kakwap naka Galilaya.

¹²Kolom Kiram koTuro alosit aanyun ireria luainakini Solomon ŋes; mam apotu kisiyalamikis ŋes.

¹³Kotema ŋesi atiar, “Okwe onaceka, inyoika ireria lu lukiinakinit eoŋ?” Komaik kes akwap naka Kabul, kiton lolo.

¹⁴Abu Kiram kijukak ekabaka atalatan akwatat ka akaisaarei nuka esabu.

¹⁵ Abu ekabaka Solomon kitelem esolo kanuka nu: adukio etogo loka EJAKAIT, ka eketogo elopet, ka Milo, ka arwatat naka Yerusalem, ka Kasor, ka Megido, ka Geser.

¹⁶ Abu Parao ekabaka loko Misiri kolot, kipiko Geser, kicwe kakim, koar Ikanaanin lueboiete kore, koinak araun akorakinet naka akokuke, aberu naka Solomon.

¹⁷ Koduk Solomon Geser, ka Bet-koron lokajesa.

¹⁸ Ka Baalat, ka Tamar toma amodiŋ, akwap naka Yuda,

¹⁹ka ireria kere lukiŋadet luajaas ka Solomon, ka ireria luka agalinike, ka ireria luka ikebwanenokoke, ka luepuda Solomon aiduk aisiyalamikin ŋes koYerusalem, koLebanon, kakwap kere naka airumiteke.

²⁰Ituŋa kere luedeunos luka Imorain, ka Ikitin, ka Iperusin, ka Ikibin, ka Iyebusin, lumam araas luka idwe luka Isirael;

²¹ Ikecedwe luedeunos atupakin kes kakwap, lumam apedorete idwe luka Isirael amudiar cut, kolemununei Solomon iitubusiana kamakec, kiton lolo.

²² Konye mam Solomon abu kitarau idwe luka Isirael ibulesin: konye araas kesi ikajiok, ka ikejaanakinakake, ka ikapolokoke, ka ijakake, ka ikayaitok luka agalinike ka luka ikebwanenokoke.

²³Ŋul kes ijaka lukapolok luayaito aswam naka Solomon, akwat akany ka akaisakany, luerumito ituŋa lueswamaete aswam.

²⁴ Konye konyou akoku naka Parao kore loka Daudi alosit togoke loadukokinit Solomon ŋes: kosodi ŋesi aiduk Milo.

²⁵Abu Solomon koinak irwan auni ŋolikaru ainakineta nuicweio ka ainakineta nuka ainapakin kotem loadukokinit ŋesi EJAKAIT, kisupuru lukisupurununo kotem loajai akonyen nuka EJAKAIT. Kodau ŋesi kwaŋin etogo.

²⁶ Kiswamau ekabaka Solomon erioŋet loka ameerin koEsion-geber, naedunyas ka Elot, kodoket loka Aŋolol Nakareŋan, kakwap naka Edom.

²⁷ Kijuka Kiram ikekejaanakinak toma ameerin ŋun, ikekwaŋak luajai aijen nuka aŋolol, nepepe kikejaanakinak luka Solomon.

²⁸ Kopotu Opir, koomata esabu kanen, atalatan akwat aoŋon ka akaisaarei, koinut ekabaka Solomon.