Read Ebaibuli 1961 2 Ikabakan 1 Bible Online

2 Ikabakan 1 - Ebaibuli 1961 bible

2 Ikabakan 1

¹ Kipaliik Moab Isirael kedau Akab atwanare.

² Kibirun Akasia kadirisa kagolake nakokuju naajai Samaria, kodekakin: kiyakia ikiyakia, kotema kes atiar, “Koloto, kiŋitut kama ejai Baal-sebub edeke loka Ekuron arai bo aŋaleuni adeka na,”

³ Konye kotema emalaika loka EJAKAIT Eliya Etisibit atiar, “Konyou, kolot kiriamakinos kikiyakia luka ekabaka loka Samaria, kotema kes atiar, ‘Emamei kereka Edeke kotoma Isirael, tape ilosete aiŋitun kama ejai Baal-sebub edeke loka Ekuron?’

⁴ Aso do inera EJAKAIT kwanata ebe, ‘Mam inyouni koitada loidokikinit, konye abeit itwani.’ ” Konyouni do Eliya.

⁵Koboŋosi ikiyakia mamake, kotema ŋesi kes atiar, “Kanukinyo iboŋunioto?”

⁶ Kotemasi ŋes atiar, “Abu kobu etuŋanan airiamun kasio, kolimok sio ebe, ‘Koloto, koboŋosi mama ejai ekabaka lokiyakuuni yes, kotemasi ŋes atiar, Inera EJAKAIT kwanata ebe, Emamei kereka Edeke kotoma Isirael, tape iyakiari aiŋitun kama ejai Baal-sebub edeke loka Ekuron? Kanuka ŋun mam inyouni koitada loidokikinit, konye abeit itwani.’ ”

⁷Kotema kes atiar, “Ejesi bo ai etuŋanan loabuni airiamun kayes, kolimok akiro ŋun?”

⁸ Koboŋokis ŋes ebe, “Erai etuŋanan loecekit, enapit arukan naka emukule kaŋabeteke.” Kotema ŋesi atiar, “Ŋes Eliya Etisibit.”

⁹ Kosodi ekabaka aiyakikin ŋes ekapolon loka akaisakany, ka iketuŋa da akaisakany. Kolot mama ejai: ido koany, kiboie ŋesi kokuju oukot. Kinera kaŋes ebe, “ijo etuŋanan loka Edeke, ebala ekabaka ebe, ‘Kikokoror.’ ”

¹⁰ Koboŋok Eliya ekapolon loka akaisakany ebe, “Arai arai eoŋ etuŋanan loka Edeke, kobu akim kokuju, kicwe jo ka akaisakanyikon.” Kobu akim kokuju, kicwe ŋes ka akaisakanyike.

¹¹ Kiyakia bobo ekapolon ece loka akaisakany ka akaisakanyike. Koboŋok kotema ŋes atiar, “Ijo etuŋanan loka Edeke, ebala ekabaka kwanata ebe, ‘Kikokoror atipet.’ ”

¹²Koboŋok Eliya kotema kes atiar, “Arai arai eoŋ etuŋanan loka Edeke, kobu akim kokuju, kicwe jo ka akaisakanyikon.” Kobu akim naka Edeke kokuju, kicwe ŋes ka akaisakanyike.

¹³ Kiyakia bobo ekapolon loka akaisakany lokiwuniet ka akaisakanyike. Kolot ekapolon lokiwuniet loka akaisakany, kobu, kokukonokin Eliya, kiŋaiŋa ŋes, kotema ŋes atiar, “ijo etuŋanan loka Edeke, keŋaiŋait, korau akaijar ka aijar naka akaisakany lu ikonikejaanakinak naka akais nuipu kakonyenekon.

¹⁴Koany, abu akim kobu kokuju kicwe ikapolok iarei lusodit luka akaisakany ka akaisakanyikec: konye korai akaijar naka akais nuipu kakonyenekon.”

¹⁵ Kotema emalaika loka EJAKAIT Eliya atiar, “Kikokoror kaŋes; sirikikurianar ŋes.” Konyou, kikokoror kaŋes mama ejai ekabaka.

¹⁶Kotema ŋes atiar, “Inera EJAKAIT kwanata ebe, naarai ibu kiyakia ikiyakia aiŋitun kama ejai Baal-sebub edeke loka Ekuron, emamei kereka Edeke kotoma Isirael aiŋitun akekirot? Kanuka ŋun mam inyouni koitadakon loidokikinit, konye abeit itwani.”

¹⁷Kotwana do kwape ajaar akirot naka EJAKAIT naenera Eliya. Kogeu Yekoram airum aiboisike kokaru lokiareit loka Yekoram okoku loka Yekosapat ekabaka loka Yuda; naarai amamei ŋes ikoku yenitelepat.

¹⁸Aswamisio ace nuka Akasia nuabu kiswama mam kereka iwadikatai oitabo loka aisiitonokin nuka ikabakan luka Isirael?