Read Ebaibuli 1961 2 Ikabakan 14 Bible Online

2 Ikabakan 14 - Ebaibuli 1961 bible

2 Ikabakan 14

¹ Kokaru lokiareit loka Yoas okoku loka Yoakas ekabaka loka Isirael kogeu Amasia okoku loka Yoas ekabaka loka Yuda airum.

²Kerai loka ikar akaisaarei ka lukany egeuni airum; kirumak ikar akaisaarei ka lukanykaoŋon koYerusalem: ekiror loka totoke kerai Yekoadin naka Yerusalem.

³Kiswama nuejok kakonyen nuka EJAKAIT, konye mam abu koriakas kaDaudi papaake: eswamaenenei kwape ajaatar nueswamai papake Yoas.

⁴ Konye mam aponi kolemarai aiboisio nuiceleleete: koriŋa ituŋa einanakinete asuban, ka aisupuruun lueuru maa kaiboisio nuiceleleete.

⁵ Kosodi kanen, napiticasio ajakanut kakanike, abu koar ikejaanakinakake luaarete ekabaka papake:

⁶ Konye mam abu koar idwe luka ikaarak: kwape ajaatar ŋun nuewadikatai oitabo loka ikisila luka Musa, kwape ecorakinitor EJAKAIT ebe, “Mam lukapapa eario kanuka idwe, karaida idwe mam eario kanuka lukapapakec; konye etwani ŋinituŋanan kanuka aronisike.”

⁷ Koarak luka Edom ilukumin itomon Aditot naka Abalaŋ, kirum Sela ejiosi, komaik ekiror Yokuteel, kiton lolo.

⁸ Kosodi Amasia aijukar ikiyakia mama ejai Yekoas, okoku loka Yekoakas okoku loka Yeku, ekabaka loka Isirael, kobala ebe, “Bia kaanyunos kakonye.”

⁹ Kijuka Yekoas ekabaka loka Isirael mama ejai Amasia ekabaka loka Yuda kobala ebe, “Abu ekenep loajai Lebanon kijukak eres loajai Lebanon ebe, ‘Kokorak akokukon okokuka komany’: kitoro etiaŋ loka ais loajai Lebanon, kicakacak ekenep.

¹⁰ Abeit idany Edom, iturokina etaukon: kibwoŋak ŋun, kopaik ore: naarai kanukinyo ilomaria akiro numere nukon ka atwaniar, kibirori ijo ka Yuda da kajo?”

¹¹ Konye koŋer Amasia akiirar. Kolot do Yekoas ekabaka loka Isirael: koanyunos kakonye, ŋesi ka Amasia ekabaka loka Yuda koBet-semet, loarai loka Yuda.

¹²Kireŋeai Yuda kakonyen nuka Isirael, koker ŋinituŋanan owemake.

¹³ Kikam Yekoas ekabaka loka Isirael Amasia ekabaka loka Yuda, okoku loka Yekoas, okoku loka Akasia, koBet-semet, kobu Yerusalem, kotiyatiya arwatat naka Yerusalem anyoun korute loka Epuraim kiton orute loka agor, ikubitin akwat aoŋon.

¹⁴ Koŋata esabu ka epuesa kere, ka iboro kere luadumunio kotogo loka EJAKAIT, koboro luka akais nuipu lukotogo loka ekabaka, ka lukititiŋa da, koboŋo Samaria.

¹⁵ Aswamisio ace nuka Yekoas nuabu kiswama, ka akegogoŋ, kwape ajior ka Amasia ekabaka loka Yuda, mam kereka iwadikatai oitabo loka aisiitonokin nuka ikabakan luka Isirael?

¹⁶Kojotoor Yekoas kalukapapaake, aponi kidaikinai Samaria nepepe kikabakan luka Isirael; kirum Yeroboam okokuke aiboisike.

¹⁷ Kobut Amasia okoku loka Yoas ekabaka loka Yuda ikar itomon ka lukany kedau Yekoas okoku loka Yekoakas ekabaka leka Isirael atwanare,

¹⁸Aswamisio ace nuka Amasia mam kereka iwadikatai oitabo loka aisiitonokin nukaikabakan luka Yuda?

¹⁹ Kinerut asurokin ŋes koYerusalem; koker Lakis; konye kijukasi atupakin ŋes Lakis, koarakinai ŋina,

²⁰Koyaunai ŋes kobalasin: aponi kidaikinai Yerusalem kalukapapaake ore loka Daudi.

²¹ Koyaata ituŋa kere luka Yuda Asaria, lokerai loka ikar itomon ka lukanykape, kitaraut ŋes ekabaka aibois naka papake Amasia.

²² Koduk ŋesi Elat, kinyakak Yuda, kedau ekabaka ajotoor kalukapapaake.

²³Kokaru lokitomonet kakany loka Amasia okoku loka Yoas ekabaka loka Yuda, kogeu Yeroboam okoku loka Yoas ekabaka loka Isirael airum koSamaria, kirumak ikar akaisaoŋon ka lodiopet.

²⁴Kiswama nueroko kakonyen nuka EJAKAIT: mam abu konyou karonisio kere nuka Yeroboam okoku loka Nebat, nuetidiakaria Isirael.

²⁵ Abu kinyaka eikor loka Isirael ageun kaneelomarere Kamat kiton aŋolol naka Araba, kwape ajaar akirot naka EJAKAIT, Edeke loka Isirael, naener kama ka ekejaanakinanike Yona okoku loka Amitai, enabi, loarai loka Gat-keper.

²⁶ Naarai koany EJAKAIT aiticanio naka Isirael, erono noi: naarai amamei yeneenitai karaida yenimam eenitai, karaida ekeŋarakinan neejai Isirael.

²⁷ Mam enerit EJAKAIT ebe emwatari ŋesi ekiror loka Isirael kokwap kakuj: konye kitajar kes kakan naka Yeroboam okoku loka Yoas.

²⁸ Aswamisio ace nuka Yeroboam, ka nuabu kiswama kere, ka akegogoŋ, kwape ajior, kwape enyakunia Isirael Damasiko ka Kamat, lukeraas luka Yuda, mam kereka iwadikatai oitabo loka aisiitonokin nuka ikabakan luka Isirael?

²⁹ Kojotoor Yeroboam kalukapapaake, kes ikabakan luka Isirael; kirum Sekaria okokuke aiboisike.