Read Ebaibuli 1961 2 Ikabakan 16 Bible Online

2 Ikabakan 16 - Ebaibuli 1961 bible

2 Ikabakan 16

¹ Kokaru lokitomonet kakanykaarei loka Peka okoku loka Remalia kogeu Akas okoku loka Yotam ekabaka loka Yuda airum.

²Kerai Akas loka ikar akaisaarei egeuni airum; kirumak ikar itomon ka lukanykape koYerusalem: mam abu kiswama nuejokuka kakonyen nuka EJAKAIT Ekedeke, kwape papaake Daudi.

³ Konye kolosenenei orot loka ikabakan luka Isirael, eebo, kitotor okokuke akim, kwape ajaatar italesia luka ikapirin, luabu EJAKAIT kireŋe kakonyen nuka idwe luka Isirael.

⁴ Koinanak asuban kisupuruununei lueuru maa kaiboisio nuiceleleete, koukon, ido kokwap ka ŋolikitoi loepesit.

⁵ Kosodete Resin ekabaka loka Suria ka Peka okoku loka Remalia ekabaka loka Isirael kopotu Yerusalem aitiji: kirigaut Akas, konye mam apotu kopedosi aipikor ŋes.

⁶ Kapaarasia kaŋun ŋes enyakunia Resin ekabaka loka Suria Elat oSuria, kireŋea Iyudayan anyoun koElat: kopotu Isurian Elat, kiboikinos nen, kiton lolo.

⁷ Kijuka Akas ikiyakia mama ejai Tigilatpileser ekabaka loka Asuria ebe, “Arai eoŋ ekonikejaanakinan, ka okokukon: kobia kitajarai kakan naka ekabaka loka Suria, kakan da naka ekabaka loka Isirael, lukanyoikis eoŋ.”

⁸ Kolem Akas epuesa ka esabu loadumuna togo loka EJAKAIT, ka lukoboro luka akais nuipu lukotogo loka ekabaka, kijukak ekabaka loka Asuria araun ainakinet.

⁹ Kiira ekabaka loka Asuria ŋes: kolot ekabaka loka Asuria asurokin Damasiko, kirum, kijoreo ituŋake koyaŋa Kir, koar Resin.

¹⁰Kolot ekabaka Akas Damasiko airiamun ka Tigilat-pileser ekabaka loka Asuria, koany etem loajai Damasiko: kijukak ekabaka Akas Uriya esasedoti esube loka etem, ka aputoke, kwape ajaar eiswamaeke kere.

¹¹Koduk Uriya esasedoti etem: kwape ajaatar kere nuabu ekabaka Akas kijukak koDamasiko, kwaŋin kosub Uriya esasedoti tetere edumuni ekabaka Akas ŋes ebuni koDamasiko.

¹² Kebu ekabaka koDamasiko, koany ekabaka etem: kikunyak ekabaka otem, koinak asuban kanen.

¹³Kicwe ainakineteke naicweio, ka ainakineteke naka akiria, kobuk ainakineteke namatat, kobwatanak aokot nuka ainakinetake nuka ainapakin, kotem.

¹⁴ Koyau etem loka aisinit loajai kakonyen nuka EJAKAIT alemun koiŋaren ketogo, kidiŋ kotemuke ka etogo loka EJAKAIT, kibwaik ari naka agolitomei naka etemuke.

¹⁵ Abu ekabaka Akas kicorak Uriya esasedoti ebe, “Kicweenenei kotem loepol ainakinet naicweio naka tupuruc ka ainakinet naka akiria naka eboŋ, ka ainakinet naicweio naka ekabaka, ka ainakineteke naka akiria, nepepe kainakinet naicweio naka ituŋa kere luka akwap, ka ainakinetekec naka akiria, ka ainakinetakec numatan; kobwatanakini ŋes aokot kere nuka ainakinet naicweio, ka aokot kere nuka asuban: konye eraun etem loka aisinit lokiŋitununetekaŋ.”

¹⁶Kiswama kwaŋin Uriya esasedoti kwape ajaatar kere nuecorakinit ekabaka Akas.

¹⁷ Kotub ekabaka Akas abaoi nuka acegeria, kolema akalaya kamakec; kolema aŋolol komoŋin luka aisinit luajaas kwapuke, kibwaik amor nuepetet.

¹⁸Erot loarapakinitai loka asabato loadukitoi toma togo, ka erute loka ekabaka lokokiŋa, kibelokinoi kiton togo loka EJAKAIT, kanuka ekabaka loka Asuria.

¹⁹Aswamisio ace nuka Akas nuabu kiswama, mam kereka iwadikatai oitabo loka aisiitonokin nuka ikabakan luka Yuda?

²⁰ Kojotoor Akas kalukapapaake, aponi kidaikinai kalukapapaake ore loka Daudi: kirum Kesekia okokuke aiboisike.