Read Ebaibuli 1961 2 Ikabakan 17 Bible Online

2 Ikabakan 17 - Ebaibuli 1961 bible

2 Ikabakan 17

¹ Kokaru lokitomonet kaarei loka Akas ekabaka loka Yuda kogeu Kosea okoku loka Ela airum Isirael koSamaria, kirumak ikar ikanykaoŋon.

²Kiswama nueroko kakonyen nuka EJAKAIT, konye mere kwape ikabakan luka Isirael luageikinete ŋes.

³ Kobu Salumaneser ekabaka loka Asuria asurokin ŋes; koraun Kosea ekejaanakinanike, koinununei ainakineta,

⁴Kodum ekabaka loka Asuria ebotet kaneejai Kosea; naarai abu kijuka ikiyakia mama ejai So ekabaka loko Misiri, mam abu koinak ekabaka loka Asuria ainakinet, kwape eswamaa ŋolikaru: kanuka ŋun kogolok ekabaka loka Asuria ŋes, koen kaidaris.

⁵ Kosodi ekabaka loka Asuria kobu koŋata akwap kere, kolot Samaria, kirigau ŋes ikar iuni.

⁶ Kokaru lokikanyetekaoŋon loka Kosea, kirum ekabaka loka Asuria Samaria, kijoreo Isirael ayaŋaar Asuria, kibwaik kes Kala, ka Kabor, kariri kecor loka Gosan, koreria luka Imedin.

⁷Kojai kwaŋin, naarai apotu idwe luka Isirael kodiakasi kama ejai EJAKAIT Ekecedeke, loetolomuni kes koMisiri anyoun kakan naka Parao ekabaka loko Misiri, koyoŋito idekesio ice.

⁸ Kolosenenete kokisila luka atekerin, nuereŋei EJAKAIT kakonyen nuka idwe luka Isirael, ka ŋul da lukibwaikinete ikabakan luka Isirael.

⁹ Kokokoanakinos idwe luka Isirael aswam numam ejok nukasurokin EJAKAIT Ekecedeke, kodukoto aiboisio nuiceleleete koreriakec kere, ageun kotogo loeoj loka ikedarak kiton ore lokebwaitai.

¹⁰ Kosipokis ipirin ka Aserim kaŋoliukot loeoja, ido kokwap kaŋolikitoi loepesit.

¹¹Kisupuruununete kaŋina lueuru maa kaiboisio kere nuiceleleete, kwape eswamaenenaata atekerin nuereŋeari EJAKAIT kakonyenekec: kiswamata nukaronok aitunyunyurikin EJAKAIT.

¹² Kijaanakis aputosia, nualimokinit EJAKAIT kes ebe, “Sirikiswamata akirot na.”

¹³ Konye kitejenik EJAKAIT Isirael, ka Yuda, kama ka ŋolinabi, ka ŋolikadwaran, ebe, “Kibelokinos yesi anyoun korotinikus lueroko, koricata aicorakinetaka ka ikakisila, kwape ejaatar ikakisila kere lukecorakinit lukapapaakus, lukejukakinit yes kama ka ikakejaanakinak inabin.”

¹⁴ Konye koŋero akiirar, konye kitininikata imurisiŋakec, kwape kimurisiŋa luka lukapapaakec, lumam apotu kiyuut EJAKAIT Ekecedeke.

¹⁵ Koŋerenenete ikisilake, ka aitutuketeke naetutukit kalukapapaakec, ka aitejenuneta nuetejenunit kes; kotupasi aamameak, koraunos lukaamameak, kotupenenete atekerin nuerimorito kes, nuabu EJAKAIT kicoro kes ebe sirikiswamata kwape kakesi.

¹⁶ Kojala aicorakineta kere nuka EJAKAIT Ekecedeke, kosubut aputosia nuecalara, kes itak iarei, kosubut Asera da, komaenenete ajore kere nakokuju, kijaanakis Baal,

¹⁷ Kitotoroenenete ikecedwe lusap ka lupesur akim, kiswamata nuka airo ka nuka ecudet, kogwelaros aswam nueroko kakonyen nuka EJAKAIT, aitunyunyurikin ŋes.

¹⁸ Kanuka ŋun konyunyurik noi EJAKAIT Isirael, kolema kakonyeneke; mam abu kideun dimarai ateker naka Yuda bon.

¹⁹ Yuda da mam abu koric aicorakineta nuka EJAKAIT Ekecedeke, konye kolosenenete kokisila luka Isirael lukibwaikinete,

²⁰ Koŋer EJAKAIT aur kere naka Isirael, kitican kes, kijaik kes akanin nuka ikaŋatak, aitodol nakireŋearia kes kakonyeneke.

²¹ Naarai kocila Isirael alemar kotogo loka Daudi; kodakakis Yeroboam okoku loka Nebat araun ekabaka: kiŋalaa Yeroboam Isirael anyoun katupit EJAKAIT, kitidiaka kes aidiak naepol.

²²Kolosenenete idwe luka Isirael karonisio kere nuka Yeroboam nueswamai; mam apotu konyoutu kakesi;

²³ Aitodol naalemaria EJAKAIT Isirael kakonyeneke, kwape enerar kama ka Ikekejaanakinak kere inabin. Koyaŋaarai cut Isirael Asuria anyoun kakwapuke, kiton lolo.

²⁴ Koyau ekabaka loka Asuria ituŋa anyoun koBabulon, ka Kuta, ka Aba, ka Kamat, ka Separabaim, kibwaik kes oreria luka Samaria aibois naka idwe luka Isirael: kiruma Samaria kiboikinos oreriake.

²⁵ Kosodi, egeete aiboi kanen, mam ayoŋito EJAKAIT: kanuka ŋun kijukak EJAKAIT kes iŋatunyo, luaarete ice kakesi.

²⁶Ŋes kelimokiniata ekabaka loka Asuria ebe, “Atekerin nuiyaŋaari ijo cut, kibwaik oreria luka Samaria, mam ejenete epone loka Edeke loka akwap: ŋes keinakini ijukakini kes iŋatunyo, ido koany, earete kes, naarai mam ejenete epone loka Edeke loka akwap.”

²⁷ Kosodi ekabaka loka Asuria aicorakin atiar, “Koyaŋaas ediopet kosasedotin lukiyaunete kaŋina; koloto kiboioto kaŋina, kisisianak kes epone loka Edeke loka akwap.”

²⁸Kosodi ediopet kosasedotin lualemario koSamaria kobu kiboikin Bet-el, kisisianak kwape ibusakinitor ayoŋit EJAKAIT.

²⁹Konye kosubununei ŋiniteker idekesiokec, kibwaanakinete otogoi luka aiboisio nuiceleleete nuadukito Isamarian, ŋiniteker oreriakec neiboioto.

³⁰Kosubut ituŋa luka Babulon Sukot-benot, kosubut ituŋa luka Kut Nerigal, kosubut ituŋa luka Kamat Asima.

³¹ Kosubut Ibain Nibas ka Taratak, kicweenenete Iseparabin ikecedwe kakim neejaas Adaramelek ka Anamelek, idekesio luka Separabaim.

³² Koyoŋenenete EJAKAIT, ido kotiakutu kotomakec isasedotin luka aiboisio nuiceleleete, luainanakinete asuban kanukec kotogoi luka aiboisio nuiceleleete.

³³ Koyoŋenenete EJAKAIT, kijaanakis da ikecedekesio, kwape kejaar epone loka atekerin nuayaŋaario,

³⁴ Iswamaete kiton lolo kwape ajaatar iponesio lukolosek. Mam eyoŋito EJAKAIT, mam iswamaete kwape kejaar apucunetakec, karaida itubesiakec, karaida ikisila arai aicorakinet naecorakinit EJAKAIT idwe luka Yakob, loamaikinit Isirael;

³⁵ Loetutuki EJAKAIT kaŋes, kicorak kes ebe, “Sirikiyoŋata icedekesio, karaida akukonokin kes, karaida aijaanakin, karaida ainakin kes asuban:

³⁶ Konye EJAKAIT, lokitolomuni yes kakwap nako Misiri. Kagogoŋ naepol, ka akan naarioro, ŋol ŋes loiyoŋenenete, ŋol ŋes loikukonokinos, ŋol da loiinanakinete asuban;

³⁷ Apucuneta ka itubesia, ka ikisila ka aicorakinet luabu ŋesi kiwadikak yes, iricenenete aswam ikar kere; sirikiyoŋa idekesio ice.

³⁸ Aitutuket naetutuk eoŋ kayes, sirikimurwonokinete; karaida aiyoŋ icedekesio.

³⁹Konye koyoŋenenete EJAKAIT Ekusideke; kitajarenenei ŋesi yes kakan naka lukasurupokus kere.”

⁴⁰Konye mam apotu kopupokis, konye kiswamata kwape ajaar eponekec lolem sek.

⁴¹ Koyoŋa atekerin ŋun EJAKAIT, kijaanakis aputosiakec nuegerer ikecedwe da, ka idwe luka ikecedwe, kwape eswamaenenaata lukapapaakec, iswamaenenete kwaŋin kiton lolo.