Read Ebaibuli 1961 2 Ikabakan 19 Bible Online

2 Ikabakan 19 - Ebaibuli 1961 bible

2 Ikabakan 19

¹ Kosodi kanen, kepupu ekabaka Kesekia, kocil inapeneke, konap epuko, koloma togo loka EJAKAIT.

²Kijuka Eliakim, loapolokinit ekal, ka Sebuna ekewadikan, ka imakio luka isasedotin, konapitos ipukoi, mama ejai Isaia enabi okoku loka Amos.

³Kotemasi ŋes atiar, “Inera Kesekia kwanata ebe, Apaaran na erai apaaran naka ican, naka aitoronio, ka naka amoromoroo: naarai adol idwe aurio, emamei da agogoŋ nakaidoun.

⁴ Motoko iirari EJAKAIT Ekonideke akiro kere nuka Rabasake, loejukuni ekabaka loka Asuria ejakaitike amoromor Edeke lokajaran, ka aitoron akiro nuapupu EJAKAIT Ekonideke: aso kitonyou ailipikon kanuka aatoŋot naedeun.”

⁵Kopotu do ikejaanakinak luka ekabaka Kesekia neejai Isaia.

⁶ Kotema Isaia kes atiar, “Kolimokis ejakaitikus kwanata ebe, ‘Inera EJAKAIT kwanata ebe, Sirikiyoŋ akiro nuipup, nukamoromorooto eoŋ ikejaanakinak luka ekabaka loka Asuria.

⁷ Koany, ebwaikin emoyo tomake, epupuni ŋesi eemut, eboŋori bukec; ebirokini eoŋ da ŋes kekileŋ akwapuke.’ ”

⁸ Koboŋo do Rabasake, kodum ekabaka loka Asuria ejiosi ka Libuna: naarai abu kopupunite ebe aboŋo ŋesi koLakis.

⁹ Kepupu inerai nuka Tiraka ekabaka loko Etiopia ebe, “Koany, alomu aitiji jo”: kiyakik bobo ŋesi Kesekia ikiyakia ebe,

¹⁰ “Itemarete Kesekia ekabaka loka Yuda kwanata ebe, ‘Kinyek Edekekon loimuno aiŋal jo ebe, Mam Yerusalem ijaikinio akan naka ekabaka loka Asuria.

¹¹Koany, ipupunit ijo nueswamakis ikabakan luka Asuria akwapin kere, amudianarete kes cut: do konyet ijo kiyuunio?

¹² Apotu kereka idekesio luka atekerin koyuununete kes, nuamudianarete lukapapaaka, Gosan, ka Karan, ka Resep, ka idwe luka Eden luajaas Telasar?

¹³ Ai bo ejai ekabaka loka Kamat, ka ekabaka loka Arupad, ka ekabaka loka ere loka Separabaim, loka Kena, ka Iba da?’ ”

¹⁴ Kijau Kesekia ebalua kakan naka ikiyakia, kosiom; kolot Kesekia togo loka EJAKAIT, kopesia kakonyen nuka EJAKAIT.

¹⁵ Kilip Kesekia kakonyen nuka EJAKAIT, kobala ebe, “Wu EJAKAIT, Edeke loka Isirael, loiboie kokerubin, ijo ŋes Edeke, ijo bon, loka ajakanuto kere nuka akwap; ijo kolo isubi akuj ka akwap.

¹⁶ Kitoik akonikit, wu EJAKAIT, kiira; kokweny, wu EJAKAIT, koany; kopup akiro nuka Senakerib, nuejuku ŋesi amoromoroo Edeke lokajaran.

¹⁷Abeit, wu EJAKAIT, apotu ikabakan luka Asuria komudiasi atekerin ka akecekwapin.

¹⁸ Apotu kocakasi idekesiokec akim: naarai mam keraas idekesio, konye aswam naka akanin nuka ituŋa, ikito ka amor; ŋes kemudiarere ŋes.

¹⁹ Aso do, wu EJAKAIT Ekosideke, keŋaiŋait, kitajarai sio kakanike, tetere ejenunete ajakanuto kere nuka akwap ebe ijo ŋes EJAKAIT Edeke, ijo bon ba.”

²⁰ Kosodi Isaia okoku loka Amos aijukakin Kesekia ebe, “Inera kwanata EJAKAIT, Edeke loka Isirael ebe, Naarai ilip eoŋ asurokin Senakerib ekabaka loka Asuria, eira,

²¹ Na ŋes akirot naener EJAKAIT mama ejai ŋesi ebe: “Kimwaŋit akoku nabekot naka Sion jo, ekienar jo kisekelei; emuŋumuŋ akoku naka Yerusalem akouke neijai.

²² “Iŋai imoromor ijo kisekel? Iŋai loitopolooritor ijo ekoniporoto, ka aiteluor akonikonyen kuju? Isurok Lokalaunan loka Isirael.

²³ Imoromor EJAKAIT kokiyakiakon, kinera atiar, ‘Kaipues naka agalinika Adokari oswion luka iroŋan, atutubeta nukotoma nuka Lebanon. Ajepi iresiake lueojak, ka iberosinike luejokuka; Alomari da aiboisike naiwasie, amagoro naka emanikorike loideŋeriat.

²⁴Abok, amat akipi nukimo, etooni da kakakeju icorin kere luko Misiri.’

²⁵ Mam ibu kopup kwape eswamaa kolo, Kasub agear apeŋo? Kwana da etodolit, Korai ijo loimudiari ireria lukebwaitai araun aapoŋor nukamejei.

²⁶ Kanuka ŋun lueboiete kotoma keraas luedit agogoŋ, koburut kitirirata; kosubito bala inya luka ais, kwape kikui, kwape kinya luejaas kuju togo, kwape kakima nueokito eriŋa epolooro.

²⁷ “Konye ajeni akoniiboie, ka alomarikon, ka alomunikon, aikerepoonutukon kaneajai.

²⁸ Kanuka aikerepoonutukon kaneajai, ido naarai adolu emokodekon akika, ŋes ebwaikinia ekagolu okumesikon, ka arukanaka da aitukukon, kenyakati jo orot loilomunia.

²⁹ “Na ŋes eraun aanyunet neijai: okaru lo inyamete yenebwaŋuni bon, okaru lokiareit yenitocuni kaji; okaru lokiwuniet koyeata, kodwenya, kiraata imanikoria luka emusabibu, konyama araitoke.

³⁰Edupi aatoŋot naideuni naabu koku kokek loka Yuda alias kwap, kota araito kokuju.

³¹ Naarai elomari aatoŋot koYerusalem, luekuete da komoru Sion: itodolikini ŋun adunyanut naka EJAKAIT,

³²“Kanuka ŋun inera kwanata EJAKAIT nuka ekabaka loka Asuria ebe, Mam edoluni ore lo, karaida agumakin emal, karaida adolokin kebuku, karaida aitutu etut asurokinia ŋes.

³³Ebala EJAKAIT ebe, Orot lokelomunia, ŋopeŋol eboŋoria, ido mam edoluni ore lo.

³⁴ Naarai egaŋi eoŋ ere lo aitajar, kanukaŋ, ido kanukaŋ ekakejaanakinan Daudi.”

³⁵ Kosodi kanen, akuare ŋin; koloma emalaika loka EJAKAIT oidukurun luka Iyasurian, kodany ilukumin akwatat ka akaisakanykauni ka lukany: kenyout ituŋa tupuruc sek, koany, koraas kere ikatwak.

³⁶ Kosodi Senakerib ekabaka loka Asuria anyoun, kolot, koboŋo, kiboikin Ninebe.

³⁷ Kosodi kanen, emai ŋesi kotogo loka Nisurok ekedeke, koarata Aduram-melek ka Sareser ŋes kekileŋ: kokereasi akwap naka Ararat. Kirum Esar-kadon okokuke aiboisike.