Read Ebaibuli 1961 2 Ikabakan 21 Bible Online

2 Ikabakan 21 - Ebaibuli 1961 bible

2 Ikabakan 21

¹Kerai Manase loka ikar itomon ka luarei egeuni airum; kirumak ikar akaisakany ka lukany ko Yerusalem: ekiror loka totoke kerai Kepisi-ba.

² Kiswama nueroko kakonyen nuka EJAKAIT, kwape ajaatar italesia luka ikapirin, luereŋei EJAKAIT kakonyen nuka idwe luka Isirael.

³ Naarai koduk bobo aiboisio nuiceleleete nuamudiarit papake Kesekia; kodukok Baal itemwan, kiswama Asera, kwape eswamaa Akab ekabaka loka Isirael, koma ajore kere naka akuj, kijaanak kes.

⁴ Koduk itemwan togo loka EJAKAIT, loenera EJAKAIT ebe, “Yerusalem ŋes ebwaikini ekakitor.”

⁵Kodukok ajore kere naka akuj itemwan alaroi aarei nuka etogo loka EJAKAIT.

⁶ Kitotor okokuke akim, kiswama nukaidwar, ka nuka ecudet, kolosenenei mama ejaas lukajokin ka imurwok: kiswama nueroko nuipu kakonyen nuka EJAKAIT aitunyunyurikin ŋes.

⁷ Kosipok aput naegerer naka Asera naasubit togo loalimokinit EJAKAIT Daudi ka Solomon okokuke atiar, “Togo lo, ka Yerusalem, loaseunit katekerin kere nuka Isirael, ebwaikini ekakiror ikar kere:

⁸Mam esirimi bobo akeje nuka Isirael anyoun kakwap naainakinit lukapapaakec; arai ecoito aiswamaenen kwape ejaatar kere nuecorakinit kes, kwape ejaatar da ikisila kere luecorakinit Musa ekakejaanakinan kes.”

⁹ Konye mam apotu kiirasi; kijodou Manase kes aswam nueroko aitelekar nuejodoununete atekerin nuamudiar! EJAKAIT kakonyen nuka idwe luka Isirael.

¹⁰Kinera EJAKAIT okejaanakinakake inabin ebe,

¹¹ “Naarai eswama Manase ekabaka loka Yuda italesia lu, eswama da nueroko aitelekarit kere nueswamaete Imorain luageikinete ŋes, etidiak da Yuda kaputosiake:

¹² Ŋes inerar kwanata EJAKAIT, Edeke loka Isirael ebe, Koany, ayauni Yerusalem ka Yuda aronis naetia netinen, kosodi yenepupuni kere, kodelosi akeki.

¹³ Kosodi ejeleleuni auno naka Samaria koYerusalem, ka ebiriji loka etogo loka Akab: amwatari Yerusalem kwape emwataria ituŋanan asanit, emwasi kobuburikini,

¹⁴ Acakari aatoŋot naka airumeteka, kejaik kes akan naka lukasurupokec; eraunos imejan ka iŋatuna mama ejaas lukasurupokec kere;

¹⁵Naarai eswamata nueroko kakonyeneka, ketunyunyurikis, ageun kapaaran naalomuniata lukapapaakec koMisiri, kiton lolo.”

¹⁶ Bobo da abu Manase kobuko noi noi aokot nuamameete aronis, aitodol neelelebunor Yerusalem epuai kepuai; kogelara akeronis naetidiakia Yuda, eswamai nueroko kakonyen nuka EJAKAIT.

¹⁷ Aswamisio ace nuka Manase, ka nuabu kiswama kere, ka aidiakake naadiaki, mam kereka iwadikatai oitabo loka aisiitonokin nuka ikabakan luka Yuda?

¹⁸ Kojotoor Manase kalukapapaake, aponi kidaikinai omanikor loka etogoke, omanikor loka Usa: kirum Amon okokuke aiboisike.

¹⁹ Kerai Amon loka ikar akaisaarei ka luarei egeuni airum; kitumak ikar iarei koYerusalem: ekiror loka totoke kerai Mesulemet akoku naka Karus loka Yotaba,

²⁰Kiswama nueroko kakonyen nuka EJAKAIT, kwape eswamaa Manase papake.

²¹Kolosenenei korot kere loalosenenoo papake, kijaanak aputosia nuejaanakinenei papake, komaa kes:

²² Kojai EJAKAIT, Edeke loka lukapapaake, mam alosenenei korot loka EJAKAIT.

²³ Kinerut ikejaanakinak luka Amon asurokin ŋes, koarakis ekabaka togokeŋ.

²⁴Konye apotu ituŋa luka akwap koarata ŋul kere luenerunete asurokin ekabaka Amon; kodakakis ituŋa luka akwap Yosia okokuke araun ekabaka aiboisike.

²⁵Aswamisio ace nuka Amon nuabu kiswama, mam kereka iwadikatai oitabo loka aisiitonokin nuka ikabakan luka Yuda?

²⁶ Aponi kidaikinai atesike omanikor loka Usa: kirum Yosia okokuke aiboisike.