Read Ebaibuli 1961 2 Ikabakan 24 Bible Online

2 Ikabakan 24 - Ebaibuli 1961 bible

2 Ikabakan 24

¹ Kapaarasiake kobu Nebukadenesar ekabaka loko Babulon, korau Yekoiakim ekejaanakinanike ikar iuni: kosodi kibelokin kipaliik.

² Kijukak EJAKAIT irioŋeta luka Ikaludean asurokin ŋes, ka irioŋeta luka Isurian, ka irioŋeta luka Imoabin, ka irioŋeta luka idwe luka Amon, kijuka kes amudiar Yuda, kwape ajaar akirot naka EJAKAIT, naenera kama kikekejaanakinak inabin.

³ Abeit kobunok ŋin Yuda kaicorakinet naka EJAKAIT, alemar kes kakonyeneke, kanuka aronisio nuka Manase, kwape ajaatar kere nueswamat ŋesi;

⁴ Kanuka aokot da nuamameete aronis nuabukori ŋesi, naarai abu kileleb Yerusalem aokot nuamameete aronis: mam EJAKAIT akoto aitim,

⁵Aswamisio kere nuka Yekoiakim, ka nuabu kiswama kere, mam kereka iwadikatai oitabo loka aisiitonokin nuka ikabakan luka Yuda?

⁶ Kojotoor Yekoiakim kalukapapaake: kirum Yekoiakin okokuke aiboisike.

⁷ Mam abu ekabaka loko Misiri kobu bobo anyoun kakwapuke: naarai abu ekabaka loko Babulon koyaŋa kere luaraas luka ekabaka loko Misiri, ageun kaguurut nako Misiri kiton ocor Eupurat.

⁸ Kerai Yekoiakin loka ikar itomon ka lukanykauni egeuni airum: kirumak ilapio iuni koYerusalem: ekiror loka totoke kerai Nekusutan akoku naka El-natan loko Yerusalem.

⁹Kiswama nueroko kakonyen nuka EJAKAIT, kwape ajaatar kere nukiswamat papake.

¹⁰ Kapaarasia kaŋun kopotu ikejaanakinak luka Nebukadenesar ekabaka loko Babulon Yerusalem, kirigaunai ere,

¹¹Kobu Nebukadenesar ekabaka loko Babulon ore, koroko ikekejaanakinak irigaunito;

¹² Kolom Yekoiakin ekabaka loka Yuda neejai ekabaka loko Babulon, ŋes, ka totoke, ka ikekejaanakinak, ka ikapolokoke, ka ikapolokitokoke: kikam ekabaka loko Babulon ŋes okaru lokikanyetekauni loka airumuke.

¹³ Koyaŋa ŋina iboro kere luka akais nuipu luka etogo loka ekabaka, kojepejep iboro kere luka esabu lueswamat Solomon ekabaka loka Isirael koyekalu loka EJAKAIT, kwape abalar EJAKAIT,

¹⁴ Koyaŋa lukoYerusalem kere, ka ikapolok kere, ka ituŋa lukirigin kere luetitiŋ, ilukumin itomon luejoreorio, ka ikeswamak kere luepiriaka, ka ikatatak; mam luapotu kideunos dimarai lukican luka ituŋa luka akwap,

¹⁵ Koyaŋa Yekoiakin Babulon; ka toto naka ekabaka, ka aŋor nuka ekabaka, ka ikapolokitokoke, ka ijaka luka akwap, kijoreo Babulon alemar ko Yerusalem,

¹⁶ Ituŋa kere lukirigin, ilukumin ikanykaarei, ka ikeswamak luepiriaka ka ikatatak elukumit, kes kere lukagogoŋ luapedorito ejie, kijoreo ekabaka loko Babulon kes Babulon.

¹⁷ Kitarau ekabaka loko Babulon Matania onac loka papake ekabaka aiboisike, kilocok ekekiror komaik Sedekia.

¹⁸ Kerai Sedekia loka ikar akaisaarei ka lodiopet egeuni airum; kirumak ikar itomon ka lodiopet Yerusalem; ekiror loka totoke kerai Kamutal akoku naka Yeremia loka Libuna.

¹⁹Kiswama nueroko kakonyen nuka EJAKAIT, kwape kejaatar kere nueswamat Yekoiakim.

²⁰ Naarai abu kodol koYerusalem ka Yuda kanuka anyunyura naka EJAKAIT, aitodol naedaunia aireŋear kes kakonyeneke.