Read Ebaibuli 1961 2 Ikabakan 5 Bible Online

2 Ikabakan 5 - Ebaibuli 1961 bible

2 Ikabakan 5

¹ Kosodi Naaman ekapolon loka ajore naka ekabaka loka Suria, kerai etuŋanan lokapolon mama ejai ejakaitike, ido lokeyoŋitai, naarai kanuka ŋol abu EJAKAIT koinak Suria aipikonor: kerai da ekirigi loketitiŋ kotoma ojie, konye kerai lokatapon.

²Apotu Isurian kolomarito korioŋeta, koŋatut ipese kakwap naka Isirael; ido kijaanakinenei ŋin aberu naka Naaman.

³Kosodi kotema ŋesi totoke atiar, “Arai papaka ejaas kenabi loejai Samaria! Ti kitaŋaleu ŋes aketapon.”

⁴Kosodi koloma etuŋanan, kolimok ejakaitike atiar, “Ebala kwaŋin ipese yenikakwap naka Isirael.”

⁵ Kosodi kobala ekabaka loka Suria ebe, “Ape bo kolot, ejukakini eoŋ ekabaka loka Isirael ebalua.” Kosodi kolot, koyaŋa da atalatan atomon nuka epuesa, ka atutubeta nuka esabu alukumin akanykape, ka inapen itomon.

⁶Kosodi koinu ekabaka loka Isirael ebalua, kobala ebe, “Aso kiidolok jo ebalua lo, koany, kejukakinit jo ekakejaanakinan Naaman, tetere itaŋaleuni ŋes atapon.”

⁷ Kosodi kanen, kesioma ekabaka loka Isirael ebalua, kocil ikenapen, kobala ebe, “Arai gwai eoŋ Edeke, aiar ka aitajar da, tape ekesa lo kejukakini eoŋ aitaŋaleun etuŋanan aketapon? Konye koomoomata, keŋaiŋaito, kojenut kwape emoia aitoŋolop eoŋ.”

⁸ Kosodi, kiira Elisa etuŋanan loka Edeke ebe acil ekabaka loka Isirael ikenapen, kiyakik ekabaka, kobala ebe, “Kanukinyo kicilia ikoninapen? Kobu bo ŋes neajai eoŋ, ido ejenuni kwape ejaar enabi toma Isirael.”

⁹Kosodi kobu Naaman ka ikebalasin ka akegalin da, kobwo kokek loka etogo loka Elisa.

¹⁰ Kijukak Elisa ŋes ekiyakia, kobala ebe, “Kolot kiloŋ koYorodan irwan akanykaarei, itemokin bobo akonikuan, ijo da iŋaleuni.”

¹¹ Konye konyunyurikin Naaman, kolot, kobala ebe, “Koany, aomit bo eoŋ ebe mam eswaki alomuni mama ajai, aibwo, ka aiworo ekiror loka EJAKAIT Ekedeke, ka ararapaanar akais nuka atapon ka aitaŋaleun eoŋ.

¹² Abana ka Parupar, icorin luka Damasiko, mam itelekarito ajokis akipi kere nuka Isirael? Mam apedori ailoŋ kaŋul, kasodi aŋaleun?” Kibelokin kolot elilit.

¹³Kikunyakis ikekejaanakinak, kinerata kaŋes, kotemasi atiar, “Okwe ipapa, arai kiicorakinit enabi aswam akirot naepol, mam tikiswama? Aso mam itelekarit noi, nakilimokinia jo ebe, Kiloŋ, koŋaleu?”

¹⁴ Kosodi kijesar, kolumono irwan akanykaarei koYorodan, kwape kejaar akirot naka etuŋanan loka Edeke, kitemokin bobo akekuan kwape akuan naka ikoku yenididi, koŋaleu.

¹⁵ Kosodi koboŋo mama ejai etuŋanan loka Edeke, ŋes nepepe kiketuŋa kere, kobu, kobwo kakonyeneke: kiner ebe, “Koany, natikwana ajenu ebe emamei Edeke kakwapin kere, dimarai koIsirael: aso ca keŋaiŋait, kijaa ainakinet naka ekonikejaanakinan.”

¹⁶ Konye Koboŋok ŋesi ebe, “Kwape ejaria EJAKAIT, loabwoi eoŋ kakonyeneke, mam kejaari idiobore,” Kimaima ŋes aijaar; konye kogir.

¹⁷Kobala Naaman ebe, “Arai mam kijaari, aso keŋaiŋait jo koinakinai ekonikejaanakinan aritai nuka alup nuibwokete inyubun iarei; naarai mam eriŋa bobo ekonikejaanakinan einanakini luinanakina luicweio karaida asuban mama ejaas icedekesio, dimarai mama ejai EJAKAIT.

¹⁸ Kisioni EJAKAIT ekonikejaanakinan kakirot kana; naelomanaria ejakaitika toma abila naka Rimon aima, kegoŋakin akanika, kesuded eoŋ kabila naka Rimon, naesudedeonono kabila naka Rimon, kisionienenei EJAKAIT ekonikejaanakinan kakirot kaŋin.”

¹⁹Kotema ŋes atiar, “Kolot inapakina.” Konyou kama ejai koeka neelwanikina.

²⁰ Konye Gekasi, ekejaanakinan loka Elisa etuŋanan loka Edeke, kobala ebe, “Koany, etim ekajakait Naaman ŋol Esuriat, komam ijaunit idiobore kakaninike kaluayaunit: kwape ejaria EJAKAIT, mere kaker katupak, kadum ibore kaneejai.”

²¹Kotupak Gekasi Naaman. Keanyu Naaman yenatupit ŋes, kodoku kogali aisiriama ŋes, kotema atiar, “Kojokuka baca?”

²²Kobala ebe, “Ejokuka. Kejukunit ejakaitika ebe, Koany, adolut kwape kwana neajai itelepai iarei luka odwe luka inabin, luapote koukon luka Epuraim; keŋaiŋait, koinak kes atalata naka epuesa, ka inapen iarei.”

²³Kotema Naaman ŋes atiar, “Kiyu, koyaŋa atalatan aarei.” Kikanikan, koen atalatan aarei nuka epuesa koriagin iarei, ka inapen iarei, kisibwok ikekejaanakinak iarei; kibwokata kakonyeneke.

²⁴Kedol oukot, kijaa kakanikec, kiŋadak togo: kotwar ituŋa, koboŋosi.

²⁵ Konye koloma, kobwo kakonyen nuka ejakaitike. Kobala Elisa ebe, “Gekasi, ai bo kibunio?” Kobala ebe, “Mam neelosit ekonikejaanakinan.”

²⁶ Kobala ŋes ebe, “Mam ekatau elosit kajo, naebelokinor etuŋanan kagalike aisiriam jo? Ŋes apak aijaun epuesa, ka aijaun inapen, ka imanikoria luka iseitunin, ka luka imusabibun, ka amerekekin, ka imoŋin, ka ibulesin ka abulesin?

²⁷ Aso kikopakin jo atapon naka Naaman, ka akoniwur ikar ka ikar.” Koloma kaneejai ibokoriat akuan atapon.