Read Ebaibuli 1961 2 Ikabakan 8 Bible Online

2 Ikabakan 8 - Ebaibuli 1961 bible

2 Ikabakan 8

¹ Abu Elisa kolimokinite aberu naetajarikini ŋesi okokuke ebe, “Konyou, kolot ijo ka lukokalekon, kiboikin neipedoria aiboiororor; naarai anyarau. EJAKAIT ebeli; edauni ebeli ikar ikanykaarei kakwap.”

²Konyou aberu kiswama kwape ajaar akirot naka etuŋanan loka Edeke: kolot kalukokaleke, kiboiororoi kakwap naka Ipilisitian ikar ikanykaarei.

³Kosodi kanen ketuboros ikar ikanykaarei koboŋu aberu anyoun kakwap naka Ipilisitian: koloma amonyakin ekabaka kanuka eketogo ka alupoke.

⁴ Eŋisit ekabaka Gekasi ekejaanakinan loka etuŋanan loka Edeke, kobala ebe, “Keŋaiŋait, kolimokinai akiro nuepolok nuabu Elisa kiswama.”

⁵ Kosodi kanen, napelimonokini ŋesi ekabaka kwape etajarunia ŋol loatwanit, koany, kodoluni aberu naetajarikini ŋesi okokuke, komonyak ekabaka kanuka eketogo ka akelup da. Kotema Gekasi atiar, “Ejakaitika, wu ekabaka, na ŋes aberu, lo da okokuke, loetajaruni Elisa.”

⁶Kiŋit ekabaka aberu, kolimok ŋes, Koseu ekabaka ekapolokiton ediopet kotema atiar, “Kinyakakis kere luaraas luke, ka araito kere nuka alupoke ageun kapaaran naanyounio kakwap, kiton lolo.”

⁷Kobu Elisa Damasiko; adeka Ben-kadad ekabaka loka Suria; aponi kolimokinai ŋes ebe, “Abu etuŋanan loka, Edeke ne.”

⁸ Kotema ekabaka Kasael atiar, “Koyaŋa ainakinet kakanikon, kolot airiamun ketuŋanan loka Edeke, kiŋitunia ŋes EJAKAIT ebe, ‘Aŋaleuni adeka na?’ ”

⁹Kolot Kasael airiamun kaŋes, koyaŋa ainakinet, naka ŋinibore yenejok yeniko Damasiko, naebwokito akaalai akaisaoŋon, kobu kobwo kakonyeneke, kotema atiar, “Okokukon Ben-kadad ekabaka loka Suria ŋes keyakuunit neijai ebala ebe, ‘Aŋaleuni adeka na?’ ”

¹⁰Kotema Elisa ŋes atiar, “Kolot, kolimok ŋes ebe, ‘Abeit iŋaleuni.’ Konye ketodikinite EJAKAIT eoŋ ebe abeit etwani.”

¹¹ Kosesen noi aitodol naeleicikinio: komony etuŋanan loka Edeke akiyo.

¹² Kotema Kasael atiar, “Inyo bo emonyi ekajakait?” Koboŋok ebe, “Naarai ajeni aronis naiswamakini ijo idwe luka Isirael: icwei abwasinikec kakim, iari itelepaikec kekileŋ, ilatanari ludidikikec, iŋerereanari akeceŋor nuepotiete.”

¹³ Kotema Kasael atiar, “Konye ekonikejaanakinan ŋes inyo, loerai ekiŋok cut, aswam akirot ŋin naepol?” Koboŋok Elisa ebe, “Ketodik EJAKAIT eoŋ ebe iraun ijo ekabaka loka Suria.”

¹⁴Kosodi ŋesi anyoun kama ejai Elisa, kobu neejai ejakaitike; loketemari ŋes atiar, “Ebala bo Elisa ai?” Koboŋok ebe, “Kalimoki ebe abeit iŋaleuni.”

¹⁵Kosodi kanen kapaaran naatupakini, kolem eimukis, kidomak akipi, korapak akonyeneke, kotwana: kirum Kasael aiboisike.

¹⁶ Kokaru lokikanyet loka Yoram okoku loka Akab ekabaka loka Isirael, korai Yekosapat ekabaka loka Yuda, kogeu Yekoram okoku loka Yekosapat ekabaka loka Yuda airum.

¹⁷ Kerai loka ikar akaisauni ka luarei egeuni airum; kirumak ikar ikanykauni ko Yerusalem.

¹⁸Kolosenenei korot loka ikabakan luka Isirael, kwape eswamaenenaa ekek loka Akab; naarai amanyit akoku naka Akab: kiswama nueroko kakonyen nuka EJAKAIT.

¹⁹ Konye mam EJAKAIT akoto amudiar Yuda, kanuka Daudi ekekejaanakinan, kwape kisumunio ŋes ainakin atala kanuka ikedwe ikar kere.

²⁰ Kapaarasiake kipaliik Edom anyoun kakan naka Yuda kodakakis ekabakakec kanukec.

²¹Kosodi Yoram adokar Sair, ka agalinike kere kaŋes: konyou kuare, kodany Idomein lualukunito ŋes, ka ikapolok luka agalin: kokera ituŋa owemanakec.

²² Kwaŋin kipaliik Edom anyoun kakan naka Yuda, kiton lolo. Kosodi Libuna da aipaliikin kapaarasia kaŋun.

²³Aswamisio ace nuka Yoram, ka nuabu kiswama kere mam kereka iwadikatai oitabo loka aisiitonokin nuka ikabakan luka Yuda?

²⁴ Kojotoor Yoram kalukapapaake, kidaikinai kalukapapaake ore loka Daudi: kirum Akasia okokuke aiboisike.

²⁵Kokaru lokitomonet kaarei loka Yoram okoku loka Akab ekabaka loka Isirael kogeu Akasia okoku loka Yekoram ekabaka loka Yuda airum.

²⁶ Kerai loka ikar akaisaarei ka luarei egeuni airum; kirumak ekaru ediopet ko Yerusalem. Ekiror loka totoke ŋes Atalia akoku naka Omiri ekabaka loka Isirael.

²⁷ Kolosenenei korot loka ekek loka Akab, kiswama nueroko kakonyen nuka EJAKAIT, kwape eswamaenenaa ekek loka Akab; naarai kerai ekamuran loka ekek loka Akab.

²⁸Kouparos Akasia ka Yoram okoku loka Akab aitiji Kasael ekabaka loka Suria koRamot-gilead: kimusuŋata Isurian Yoram.

²⁹ Koboŋo ekabaka Yoram aŋaleun amusuŋun koYesereel nuemusuŋete Isurian koRama, nakejiotor kaKasael ekabaka loka Suria. Kolot Akasia okoku loka Yekoram ekabaka loka Yuda aanyun Yoram okoku loka Akab koYesereel, naarai adeka.