Read Ebaibuli 1961 2 Ikabakan 9 Bible Online

2 Ikabakan 9 - Ebaibuli 1961 bible

2 Ikabakan 9

¹ Konyarau Elisa enabi ediopet kodwe luka inabin, kotema ŋes atiar, “Koen aŋabetekon, koyaŋa ekube lo loka akinyet kakanikon, kolot Ramot-gilead.

²Kidolo ŋina komou kaŋina Yeku okoku loka Yekosapat okoku loka Nimisi, koloma, kitonyou ŋes kama ejaas iinacanake, kitoloma agola nakotoma.

³ Kosodi alemun ekube loka akinyet, kobukok akouke, kotema atiar, ‘Inera EJAKAIT kwanata ebe, Kenyonyoik jo akinyet araun ekabaka loka Isirael.’ Kosodi koŋaa ekek, koker, sirikiyap.”

⁴Aso abu ekatumunan, ŋes ekatumunan enabi kolot Ramot-gilead.

⁵Kedolo, koany, iboiete ikapolok luka ajore: kotema atiar, “Ejaas nukejukunitere mama ijai ijo, lokapolon.” Kotema Yeku atiar, “Mama ejai iŋai kasio kere?” Kotema atiar, “Mama ijai ijo, lokapolon.”

⁶ Konyou ŋesi, koloma togo; kobukok akinyet akouke, kotema ŋes atiar, “Inera kwanata EJAKAIT, Edeke loka Isirael ebe, Kenyonyoik jo akinyet araun ekabaka loka ituŋa luka EJAKAIT, kes Isirael.

⁷ Ido idanyi ekek loka Akab ekapolonikon, kenyaŋ aokot nuka ikakejaanakinak inabin, ka aokot nuka ikejaanakinak kere luka EJAKAIT, nuabukoros kakan naka Yesebel.

⁸ Naarai eoliori ekek kere loka Akab: amudiari ŋinikoku yenitelepat yenika Akab, ka ŋol loeenitai ka lomam eenitai kotoma Isirael.

⁹ Ido etuluori ekek loka Akab kwape ekek loka Yeroboam okoku loka Nebat, kwape da ekek loka Baasa okoku loka Akiya.

¹⁰ Enyamakinete iŋokwo Yesebel amana naka Yesereel, emameun yenidai ŋes.” Koŋaa ekek, koker.

¹¹ Kosodi Yeku alomun mama ejaas ikejaanakinak luka ejakaitike: kotema ediopet atiar, “Ejokuka baca? Anyoika keyaunit etuŋanan ŋol lokikerep mama ijai?” Kobala ŋesi ebe, “ijenete yesi etuŋanan, ka akekiro da.”

¹²Kobalas ebe, “Isabi; kolimokinai do.” Kotema atiar, “Ebala kwana kwana ebe, ‘Inera EJAKAIT kwanata ebe, Kenyonyoik jo akinyet araun ekabaka loka Isirael.’ ”

¹³ Kisunyasi ŋoltuŋanan alemun ekegoe, kopesikis kwapuke kuju kadoketa, kokuta arupepe, kotemasi atiar, “Yeku ŋes ekabaka.”

¹⁴Kwaŋin kinerut Yeku okoku loka Yekosapat okoku loka Nimisi asurokin Yoram. (Kidari Yoram Ramot-gilead, ŋes ka Isirael kere, kanuka Kasael ekabaka loka Suria.

¹⁵ Konye keboŋunit ekabaka Yoram Yesereel aŋaleun amusuŋun nuemusuŋito Isurian ejiosi kaKasael ekabaka loka Suria.) Kotema Yeku atiar, “Arai ikotosi kwaŋin kinyek ajaut loesii alomar ore, alosit alimokin koYesereel.”

¹⁶Kodoka Yeku agali, kolot Yesereel; naarai aperi Yoram kaŋina, Abu Akasia ekabaka loka Yuda kolosite aanyun Yoram.

¹⁷Kobwoi ekedaran kotogo lokokuju koYesereel, koany erioŋet loka Yeku ebunit, kotema atiar, “Aany erioŋet.” Kotema Yoram atiar, “Koseu ekebwanenon ebalasit, kiyakia airiamakin kakes, kobala ebe, ‘Ejai kereka ainapakin?’ ”

¹⁸Kolot ediopet ibwanenit ebalasit airiamun kaŋes, kotema atiar, “Inera ekabaka kwanata ebe, ‘Ejai kereka ainapakin?’ ” Kotema Yeku atiar, “Inyo bo ipodo ijo kainapakin? Komana kauka.” Kolimok ekedaran ebe, “Adolo ekiyakia neejaas kesi, konye mam eboŋunit.”

¹⁹Kosodi ŋesi aiyakia lokiareit ibwanenit ebalasit, kodolo neejaas kotema atiar, “Inera ekabaka kwanata ebe, ‘Ejai kereka ainapakin?’ ” Koboŋok Yeku ebe, “Inyo bo ipodo ijo kainapakin? Komana kauka.”

²⁰Kolimok ekedaran ebe, “Adolo ŋol da neejaas, konye mam eboŋunit: eireŋe eputos bala eireŋe loka Yeku okoku loka Nimisi; naarai ireŋei ŋesi komositoi.”

²¹ Kotema Yoram atiar, “Kitemokisi.” Kitemokisi agalike, Kolom Yoram ekabaka loka Isirael ka Akasia ekabaka loka Yuda, ŋinituŋanan agalike, kolomut airiamun kaYeku, kodumakis ŋes mana naka Nabot Eyesereelit.

²² Kosodi kanen, keanyu Yoram Yeku, kotema atiar, “Ejai kereka ainapakin, Yeku?” Koboŋok ebe, “Ainapakin anyoin, adoteu naka totokon Yesebel ka icudetake luipu luetia nen?”

²³Kibelok Yoram akegali koker, kotema ŋesi Akasia atiar, “ijo ba, Akasia, ejai ebotet.”

²⁴Kiket Yeku akabwake kagogoŋuke kere, kogum Yoram kidiŋ opura, koloma emal otauke, kibirokin toma agalike.

²⁵ Kosodi Yeku atemar Bidikar ekapolonike atiar, “Kodaku, kocakak ŋes amana naka alup nuka Nabot Eyesereelit: naarai kiitu ebe nakibwanenenoo eoŋ ka jo katupito Akab papake, kibwaik EJAKAIT abwokon na mamake;

²⁶ Inera EJAKAIT ebe, ‘Abeit aany bian aokot nuka Nabot, ka aokot nuka odweke’; inera EJAKAIT ebe, ‘Atacakini jo kamana kana.’ Aso do kodakaa kocakak amana na, kwape ajaar akirot naka EJAKAIT.”

²⁷ Konye keanyu Akasia ekabaka loka Yuda ŋun, kokeria orot lokotogo lokomanikor. Kotupa Yeku ŋes, kotema atiar, “Koarakis ŋes da agalike.” Koarakinai needokarere alosit Gur loidunyas ka Ibileam. Kokeria Megido, kotwanik ŋina.

²⁸Kodakakis ikekejaanakinak ŋes agali koyaŋaasi Yerusalem, kidaikinai atesike nepepe kalukapapaake ore loka Daudi.

²⁹Kokaru lokitomonet ka lodiopet loka Yoram okoku loka Akab kogeu Akasia airum Yuda.

³⁰ Kedolo Yeku Yesereel, kopup Yesebel; kojuk akonyeke, kisiri akouke, kireik kadirisa.

³¹ Kosodi elomari Yeku korute, kotema atiar, “Ejai kereka ainapakin, ijo Simiri, ekaaran ekapolonikon?”

³²Kitonyou akekonyen adirisa, kotema atiar, “Iŋai ejai owaika? Iŋai?” Kireikis ŋes ibwacin iarei arai iuni.

³³Kotema atiar, “Kocakutu kwap.” Kwaŋin kocakunai kwap: kodetanakinos aokotoke arwatat, kobalasin da; kicakacaka ŋes kakeje.

³⁴ Kosodi keloma toma, konyam komat; kotema atiar, “Kidara aberu ŋin naekenokinitoi, kidaata: naarai erai akoku naka ekabaka.”

³⁵Koloto aida ŋes: konye mam apotu kodumut kaŋesi dimarai abelekek kakou, ka akeje, ka atitiban nuka akanin.

³⁶ Kanuka ŋun koboŋutu kolimokis ŋes, Kotema atiar, “Na ŋes akirot naka EJAKAIT, naenera toma okejaanakinanike Eliya Etisibit ebe, ‘Enyamakinete iŋokwo akuan naka Yesebel mana naka Yesereel:

³⁷ Akuan da naka Yesebel eraun bala aoret kais kamana naka Yesereel; kinyeis einer ebe, Na ŋes Yesebel.’ ”