Read Ebaibuli 1961 1 Aisiitonokin 10 Bible Online

1 Aisiitonokin 10 - Ebaibuli 1961 bible

1 Aisiitonokin 10

¹ Kitijioto Ipilisitian Isirael: kokerata ituŋa luka Isirael kakonyen nuka Ipilisitian, koarakinai moru Giliboa.

²Kodapata noi Ipilisitian Saul ka odweke; koarata Ipilisitian Yonatan, ka Abinadab ka Maliki-sua, odwe luka Saul.

³Kipikoroi Saul kojie, kodolokis ŋes ikagumak imalia; kobur noi kanuka ikagumak imalia.

⁴ Kosodi Saul atemar loadakit lujiisike atiar, “Kout ekonikileŋ, kicumia eoŋ; kinyeis lumam ekepep lu abunore aicum eoŋ, aitisil eoŋ,” Konye koŋer loadakit lujiisike; naarai akuriana noi. Kanuka ŋun kolem Saul ekekileŋ, kicumakinor.

⁵Keanyu loadakit lujiisike ebe atwana Saul, kicumakin ŋesi da kekekileŋ, kotwana.

⁶Kwaŋin kotwana Saul, ka odweke iuni; kotwakata lukotogoke kere nepepe.

⁷Keanyutu ituŋa luka Isirael kere lukejaas aditot ebe ekerete kesi, atwana da Saul ka odweke, kojalata ireriakec, kokerata; kopotu Ipilisitian kiboikinos toma.

⁸Kosodi kanen tupuruc, kepotu Ipilisitian aiŋat luaaritai, kodumut Saul ka odweke etwakikinito moru Giliboa.

⁹Kolacasi ikegoen, koyaŋaasi akouke, ka lujiisike, kijukasi akwap naka Ipilisitian naerimorit, ayaŋaar akiro mama ejaas aputosiakec, ka ituŋa da.

¹⁰ Kibwaikis lujiisike togo loka idekesiokec, koenikis akekou togo loka Dagon.

¹¹Kepuput luka Yabes-Gilead kere nuapotu Ipilisitian kiswamakis Saul kere.

¹²Konyout ituŋa kere luetitiŋ, kolemut akuan naka Saul ka awat nuka odweke, koyaut kes Yabes, konukakis akojokec kwap kepeduru koYabes, kikanyata eteŋei apaarasia akanykaarei.

¹³ Kwaŋin kotwana Saul kanuka adiakarike naabu kodiak ka ma ejai EKAKAIT, kanuka akirot naka EJAKAIT, namam abu koric; bobo da naarai abu ŋesi kiner kadio nakejai ajokit, aiŋitun.

¹⁴ Kwabo mam abu kiŋit EJAKAIT: kanuka ŋun abu koar ŋes, kibelok ajakanut mama ejai Daudi okoku loka Yese.