Read Ebaibuli 1961 1 Aisiitonokin 12 Bible Online

1 Aisiitonokin 12 - Ebaibuli 1961 bible

1 Aisiitonokin 12

¹ Lu kes ŋul luapotu kopotu mama ejai Daudi Sikilag, kapak nakeŋopitor kanuka Saul okoku loka Kis: koraas kotuŋa lukirigin, ikeŋara kinakake kojie.

² Kokapitos akabwai, apedorete aitwasam akan nakoteten ka nakokediany da aporocanaria alica, ka agumanaria imalia da kakabwa; koraas luka iinacan luka Saul luka Benyamin.

³ Lokapolon ŋes Akieser, kosodi Yoas, odwe luka Semaa Egibeatit; ka Yesiel, ka Pelet, odwe luka Asumabet; ka Bereka, ka Yeku Enatotait;

⁴ ka Isimaia Egibeonit, etuŋanan lokirigi kotoma akaisauni, loapolokinit akaisauni; ka Yeremia, ka Yakasiel, ka Yokanan, ka Yosabad Egederatit;

⁵Elusai, ka Yerimot, ka Bealia, ka Semaria, ka Sepatia Ekarupit;

⁶Elukana, ka Isia, ka Asarel, ka Yoeser, ka Yasobeam, Ikorakin;

⁷ka Yoela, ka Sebadia, odwe luka Yerokam loka Gedor.

⁸ Luka Igadin apotu kogitakinos mama ejai Daudi aibois naebwaitai modiŋ, ituŋa lukirigin luetitiŋ, ituŋa luetuutooritai ejie, luapedorete aitwasam ebuku ka akwara; akonyenekec koputokinos kakonyen nuka iŋatunyo, ketiroko kesi kwape kamorio koroŋan.

⁹Eser lokapolon, Obadia lokiareit, Eliab lokiwuniet;

¹⁰Misimana lokiwoŋonet, Yeremia kokianyet;

¹¹Atai lokikanyetekape, Eliel lokikanyetekaarei;

¹²Yokanan lokikanyetekauni, Elisaba lokikanyetekaoŋon;

¹³Yeremia lokitomonet, Makubanai lokitomonet kalodiop.

¹⁴Keraas ŋul lukodwe luka Gad ikapolok luka ajore; ŋol lokerai lodidi kakesi keriakas kakwatat, lokapolon da kelukumit.

¹⁵ Ŋul kes luapotu kodokas Yorodan kolap losodit, kedau ŋesi ailapanar aririke kere; kitekerata ŋul kere luka aditon, kiton kide, koto da.

¹⁶Kopotu lukodwe luka Benyamin ka Yuda mama ejai aibois naebwaitai mama ejai Daudi.

¹⁷ Koloma Daudi airiamakin kakes, Koboŋok kotema atiar, “Arai ca iponito yesi inapakina mama ajai aiŋarakin eoŋ, kimorikikin ekatau ka lukus; konye arai iponito abilakin eoŋ ebotet mama ejaas lukasurupoka, naarai emamei aronis kakaninika, kosesen Edeke loka lukapapaawok, kitoron.”

¹⁸ Kosodi emoyo abunokin Amasai lokerai lokapolon loka akaisauni, kotema atiar, “Kirai isio lukon, Daudi, owaikon, ijo okoku loka Yese. Ainapakin, ainapakin kojai mama ŋal, ainapakin da mama ejaas ikeŋarakinakakon! Naarai kiŋarakinit Edekekon.” Kosodi Daudi aisukunyuun kes, kitarau kes ikapolok luka erioŋet.

¹⁹ Luka Manase da apotu ice koluŋakinos mama ejai Daudi naabunio nepepe ka Ipilisitian asurokin Saul kojie, konye mam apotu kiŋarakis kes: naarai kinerut ijaka luka Ipilisitian, kotwarata ŋes, kobalasi ebe, “Epedori aluŋakin mama ejai ekapolonike Saul kosodi ayaun akaŋas akwesiwok.”

²⁰Naalosio ŋesi Sikilag, koluŋakinos mamake luka Manase, Aduna, ka Yosabad, ka Yediael, ka Mikael, ka Yosabad, ka Eliku, ka Siletai, ikapolok luka ilukumin lukeraas luka Manase.

²¹ Kiŋarakis Daudi asurokin erioŋet loka ikaŋatak; naarai keraas kesi kere ituŋa lukirigin luetitiŋ, koraas ikapolok luka ajore.

²²Naarai ŋinipaaran kopotu ituŋa mama ejai Daudi aiŋarakin ŋes, aitodol nakeraunor ajore naepol, kwape ajore naka Edeke.

²³ Lu kes itiaisinei luka ikapolok luka ŋul kaluakapitos lujiis, luapotu kopotu mama ejai Daudi Keburon, aibelokin ajakanut naka Saul mamake, kwape ajaar akirot naka EJAKAIT.

²⁴Idwe luka Yuda lukitiŋitos ibukui ka akwaras emwaasi ilukumin ikanykape ka akwat akanykauni, luakapitos lujiis.

²⁵Lukodwe luka Simeon, ituŋa lukirigin luetitiŋ ejie, ilukumin ikanykaarei ka akwatat.

²⁶Lukodwe luka Lebi ilukumin iwoŋon ka akwat akanykape.

²⁷Yekoiada ŋes ekeŋarenikinon loka ekek loka Aaron, kojaas kaŋes ilukumin iuni ka akwat akanykaarei;

²⁸ Sadok ekatumunan lokirigi loetitiŋ, ka lukotogo loka papake ikapolok akaisaarei ka luarei.

²⁹Lukodwe luka Benyamin, iinacan luka Saul, ilukumin iuni: naarai aitodol apakio ŋun keraas luitelekarito aipues lukiketakina atupar etogo loka Saul.

³⁰Lukodwe luka Epuraim ilukumin akaisaarei ka akwat akanykauni, ituŋa lukirigin luetitiŋ, ituŋa lukodwaratau kokekia luka lukapapaakec.

³¹Lukatutubet naka ateker naka Manase ilukumin itomon ka lukanykauni, luabilitai ikiroriakec, aponare aitaraun Daudi ekabaka.

³² Lukodwe luka Isakar, ituŋa luajenete apakio, ajenun nuibusakinit Isirael aswam: ikapolokokec emwaasi akwat aarei; kiswamata iinacanakec kere kwape ajaar aicorakinetekec.

³³Luka Sebulun, luapedorete alomar kajore, luapedorete aiderakin ejie, lukejaas kiboro lukiponesio luipu lujiis, ilukumin akaisakany; luapedorete aiderakin ejie, luamameete itauon iarei.

³⁴Luka Naputali ikapolok elukumit, nepepe kakes da lukejaas ibukui ka akwaras ilukumin akaisauni ka lukanykaarei.

³⁵Luka Idanin luapedorete aiderakin ejie, ilukumin akaisaarei ka lukanykauni ka akwat akanykape.

³⁶Luka Aser, luapedorete alomar kajore, luapedorete aiderakin ejie, ilukumin akaisaoŋon.

³⁷Okekwa juwai Yorodan, luka Ireubenin, ka Igadin, ka atutubet naka ateker naka Manase, lukejaas kiboro lukiponesio luipu lujiis ilukumin akwatat ka ilukumin akaisaarei.

³⁸Ŋul kere, ituŋa lukajiok, luapedorete aiderakin ejie, apotu kopotu Keburon ketau loetenara, aitaraun Daudi ekabaka loka Isirael kere: luka Isirael ice kere da kejaas ketau ediopet aitaraun Daudi ekabaka.

³⁹Kejaas ŋina nepepe ka Daudi apaarasia auni, enyamete, emasete: naarai apotu iinacanakec kitemokis kanukec.

⁴⁰Bobo da ŋul luedunyas kakes, kiton Isakar ka Sebulun ka Naputali, kibwokut inyamat kasigirian, kakaalai, konyubun, komoŋin, inyamat luka akiria, aluŋureta nuka itinin, aibuŋeta nueokito nuka imusabibun, ka ebino, ka akinyet, ka imoŋin, ka imerekekin, epu noi; naarai kejai aiyalama koIsirael.