Read Ebaibuli 1961 1 Aisiitonokin 20 Bible Online

1 Aisiitonokin 20 - Ebaibuli 1961 bible

1 Aisiitonokin 20

¹ Kosodi kanen, kedolu ekaru, kapak naalomariata ikabakan ejie, kiŋarenik Yoab agogoŋ naka ajore, kicanican akwap naka idwe luka Amon, kopotu kirigaut Raba, Konye kosalak Daudi Yerusalem, Kodany Yoab Raba, komudia.

² Kolem Daudi aboko naka ekabakakec kakouke, kiniŋ alaŋiruke atalata naka esabu, kejaas amor nuka akais nuipu tomake; kidokokinoi akou naka Daudi, kitolom luŋatuna lukore luipu noi.

³Kitolom da ituŋa lukejaas nen, kotub kes kimusumenin, ka asua nuboket, ka aepei. Kiswamak Daudi ireria kere luka idwe luka Amon kwaŋin, Koboŋo Daudi ka ituŋa kere Yerusalem.

⁴Kosodi kanen kokau kaŋun, kojau bobo ejie ka Ipilisitian koGeser: kosodi Sibekai Ekusatit aiar Sipai, loka odwe luka ekekososon: aponi kipikoroi.

⁵Kosodi kojau bobo ejie ka Ipilisitian: koar Elanan okoku leka Yair Lami onace loka Goliat Egitit, koputos amorok naka akwarake bala akitoi naesonyere.

⁶Kosodi kojau bobo ejie koGat, kejai kanen etuŋanan lokaojan, lokejaas ibokor akaisaarei ka luoŋon, ikanykape luka ŋinikan, ka ikanykape luka ŋinikeju; ŋes da aurikinio ekekososon.

⁷Naamwanitor ŋesi Isirael, abu Yonatan okoku loka Simea onace loka Daudi koar ŋes.

⁸Aurikinio ŋul ekekososon koGat; kibiroros kakan naka Daudi, kakan da naka ikekejaanakinak.