Read Ebaibuli 1961 1 Aisiitonokin 22 Bible Online

1 Aisiitonokin 22 - Ebaibuli 1961 bible

1 Aisiitonokin 22

¹ Kosodi Daudi atemar atiar, “Lo ŋes etogo loka EJAKAIT Edeke, lo ŋes etem loka ainakineta nuicweio loka Isirael.”

² Kicorak Daudi atukonokin imo lukejaas akwap naka Isirael; kibwaik ikadukok aike amor aiduk etogo loka Edeke.

³ Kitemok Daudi asua nuipu noi nuka isumalin luka ikirigin luka irutei, ka luimorikikinete; ka aisinin nuipu noi numam iniŋos;

⁴ ka iresia lumam imarunos; naarai apotu Isidonin ka luka Turo koyaut iresia luipu noi mama ejai Daudi.

⁵ Kotema Daudi atiar, “Edit Solomon okokuka, enonok, kibusakinit etogo loekotoi adukokin EJAKAIT korai loitopolooritai, loka eemut, ka loka aibuses anatar akwapin kere: kanuka ŋun etemokini eoŋ iboroke.” Kitemok Daudi luipu noi eroko ketwana.

⁶Kosodi anyaraun Solomon okokuke, kicorak ŋes adukokin EJAKAIT, Edeke loka Isirael, etogo.

⁷ Kotema Daudi Solomon okokuke atiar, “Kejai otaukan adukokin ekiror loka EJAKAIT Ekadeke etogo.

⁸ Konye kobu akirot naka EJAKAIT mamakaŋ ebe, ‘Ibuko ijo aokot nuipu, ijii noi: mam jo idukokini ekakiror etogo, naarai ibuko ijo aokot nuipu kakwap kakonyeneka:

⁹ Koany, kiwurikinio jo esapat, loeraun etuŋanan loka ainapakin: esinapikini eoŋ ŋes kama kalukasurupoke kere luirimorito: naarai emaikinio ekekiror Solomon, [3] ainakini eoŋ Isirael ainapakin ka aiyamakin kapaarasiake.

¹⁰ Edukokini ŋesi ekakiror etogo; eraun ŋesi okokuka, eoŋ da araun papake; eticasi eicoloŋ loka ajakanutuke koIsirael ikar kere.’

¹¹ Aso, ikakoku, kojai EJAKAIT kajo; kokerianar, koduk etogo loka EJAKAIT Ekonideke, kwape alimokinia ŋesi nukon.

¹² Konye ca koinak EJAKAIT jo acoa ka ajenun, kicorak jo nuka Isirael; tetere iricit ekisil loka EJAKAIT Ekonideke.

¹³ Kwaŋin ikerianar, arai ikokit aitodol ikisila ka itubesia luecorakinit EJAKAIT Musa nuka Isirael: kicat, kotitiŋior; sirikikurianar, kwabo sirikiyaloŋoŋ.

¹⁴Kwana, koany, kaitaaritoika abu ketemok etogo loka EJAKAIT atalatan alukumin akwatat nuka esabu, ka atalatan alukumin alukumit nuka epuesa; aisinin ka asua numam iniŋos; naarai ipu noi: abu ketemok da akito ka amor; iyatakini ijo da.

¹⁵Bobo da ejaas ikeswamak kajo luipu noi, ikajepak ka ikeswamak amor ka akito, ka ituŋa kere luepiriaka kopone kere loka aswam;

¹⁶luka esabu, ka epuesa, ka aisinin, ka asua, mam imarunos; konyou, kiswama, kojai EJAKAIT kajo.”

¹⁷Kicorak da Daudi ikapolok kere luka Isirael aiŋarakin Solomon okokuke, ebe,

¹⁸ “Mam kereka EJAKAIT Ekusideke ejai kayes? mam ŋes kisinapik yes kaŋoliwai? Naarai abu kijaik lueboiete kakwap akanika; kenonokiar akwap kakonyen nuka EJAKAIT, kakonyen nuka iketuŋa da.

¹⁹ Kwana kibwaikis itauonokus ka aijarakus amoot EJAKAIT Ekusideke; konyoutu do, kodukoto yesi aibois nakalaunan naka EJAKAIT Edeke, aitolomar asaduku naka aitutuket naka EJAKAIT, ka iboro lukalaunak luka Edeke, togo loekotoi adukokin ekiror loka EJAKAIT.”