Read Ebaibuli 1961 1 Aisiitonokin 23 Bible Online

1 Aisiitonokin 23 - Ebaibuli 1961 bible

1 Aisiitonokin 23

¹ Amojoŋ Daudi kodolot ikekar; kitarau Solomon okekuce ekabaka loka Isirael.

²Kotukonok ikapolok kere luka Isirael, ka isasedotin ka Ilebin.

³ Aponi kimarai Ilebin ageun kaluka ikar akaisauni ka adepar; etiaikec kakwesikec, ŋinituŋanan, emwaasi ilukumin akaisauni ka lukanykauni.

⁴ Ka ŋul, koanyanarete ilukumin akaisaarei ka luoŋon aswam naka etogo loka EJAKAIT: ilukumin ikanykape kes ikapolokitok ka ikatubok:

⁵ Ilukumin iwoŋon keraas ikagolok; kituritos da ilukumin iwoŋon EJAKAIT kiboro luabala Daudi ebe, “Abu eoŋ keswama kes aituritor.”

⁶ Kotiaka Daudi kes toma abeanakin kwape ajaatar odwe luka Lebi; Gereson, ka Kokat, ka Merari.

⁷Luka Igeresonin; Ladan ka Simei.

⁸Odwe luka Ladan; Yekiel lokapolon, ka Setam, ka Yoel, iuni.

⁹Odwe luka Simei; Selomot, ka Kasiel, ka Karan, iuni. Ŋul kes ikapolok luka ikekia luka lukapapaa luka Ladan.

¹⁰Odwe luka Simei; Yakat, ka Sina, ka Yeus, ka Beria. Ŋul iwoŋon kes odwe luka Simei.

¹¹Yakat ŋes lokapolon, Sisa lokiareit; konye amameete Yeus ka Beria odwe luipu; kanuka ŋun kimarakinitete araun ekek ediopet loka lukapapaakec.

¹² Odwe luka Kokat; Amuram, ka Isar, ka Keburon, ka Usiel, iwoŋon.

¹³ Odwe luka Amuram; Aaron ka Musa: aponi Aaron kotiakai tetere etalauni iboro lukalaunak noi, ŋes ka odweke, ikar kere, aisupuruunun lukisupurununo kakonyen nuka EJAKAIT, aijaanakin ŋes, ka ailipenen arereŋ kokirorike ikar kere.

¹⁴Konye Musa, etuŋanan loka Edeke, aponi odweke komaikinai ateker naka Lebi.

¹⁵ Odwe luka Musa; Geresom ka Elieser.

¹⁶Odwe luka Geresom; Sebuel lokapolon.

¹⁷Odwe luka Elieser kes Rekabia lokapolon. Amameete Elieser icedwe lusap; konye epu noi odwe luka Rekabia.

¹⁸Odwe luka Isar; Selomit lokapolon.

¹⁹Odwe luka Keburon; Yeria lokapolon, Amaria lokiareit, Yakasiel lokiwuniet, ka Yekameam lokiwoŋonet.

²⁰Odwe luka Usiel; Mika lokapolon, ka Isia lokiareit.

²¹Odwe luka Merari; Mali ka Musi. Odwe luka Mali; Eleasar ka Kis.

²² Kotwana Eleasar, komameete idwe lusap, konye lupesur bon: komanyata ikeceinacan odwe luka Kis kes.

²³ Odwe luka Musi; Mali, ka Eder, ka Yeremot, iuni.

²⁴ Ŋul kes odwe luka Lebi kwape ajaatar ikekia luka lukapapaakec, kes ikapolok luka ikekia luka lukapapaa luka ŋul kaluaponi kimarakinitete, kotiai loka ikiroria, kakwesikec, lueswamaete aswam naka aijaanakin naka etogo loka EJAKAIT, ageun kaluka ikar akaisaarei ka adepar da.

²⁵Naarai abala Daudi ebe, “Abu EJAKAIT, Edeke loka Isirael kisinapik iketuŋa; iboienenei ŋesi koYerusalem ikar kere.

²⁶ Mam bobo ipudas Ilebin adakar ewema lokalaunan ka iboroke kere luka aijaanakinikeŋ.”

²⁷Naarai kakiro nukawasia nuka Daudi aponi kimarai idwe luka Lebi, ageun kaluka ikar akaisaarei ka adepar.

²⁸Naarai aswamukec ŋes aijaanakin odwe luka Aaron toma aijaanakin naka etogo loka EJAKAIT, alaroi, ka agolai, ka aiteseg iboro lukalaunak kere, ŋes aswam naka aijaanakin naka etogo loka Edeke.

²⁹ Naka imugatin luka aitodikin, ka akiria nuidicic nuka ainakinet naka akiria, arai nuka imugatin luebenen lumam itubuunitoi, arai lupeon, arai luipoo, kaiponesio kere luka aitem ka luka etiai;

³⁰ Abwoenen aimal ka aiturit EJAKAIT, ŋinitupuruc, ka aboŋ da;

³¹ Ainakin ainakineta nuicweio kere mama ejai EJAKAIT, kanuka asabaton, napilamununei elap, kopucin lueseunitai, kotiai kwape kejaar aicorakinetekec, tiritir kakonyen nuka EJAKAIT:

³² Tetere iricete aidar ewema loka airiamunun, ka aidar aibois nakalaunan, ka aidar iinacanakec odwe luka Aaron, aijaanakin kotogo loka EJAKAIT.