Read Ebaibuli 1961 1 Aisiitonokin 28 Bible Online

1 Aisiitonokin 28 - Ebaibuli 1961 bible

1 Aisiitonokin 28

¹ Kotukonok Daudi ikapolok kere luka Isirael Yerusalem, ikapolok luka atekerin, ka ikapolok luka irioŋeta lukebeanakinos aijaanakin ekabaka, ka ikapolok luka ilukumin, ka ikapolok luka akwatat, ka ikayaitok luka iboro kere ka ibaren luka ekabaka ka odweke, nepepe kikapolokitok, ka ituŋa lukirigin, kes ituŋa kere lukirigin luetitiŋ.

² Kosodi Daudi ekabaka aibwo kakejeke, kotema atiar, “Kopupokinai, ikainacan, ka ikatuŋa; kejai otaukan adukokin asaduku naka aitutuket naka EJAKAIT, ka eicoloŋ loka akeje nuka Edekewok etogo loka aiyeŋun; ido abu ketemokinite aiduk.

³ Konye abu Edeke katema eoŋ atiar, ‘Mam jo idukokini ekakiror etogo, naarai irai ijo etuŋanan lokijiisio, ibu kobuko aokot.’

⁴ Konye abu EJAKAIT, Edeke loka Isirael, kaseu eoŋ kokek kere loka papaka araun ekabaka loka Isirael ikar kere: naarai abu koseu Yuda araun ekapolon; kokek loka Yuda da, ekek loka papaka; kodwe luka papaka kalelak eoŋ aitaraun ekabaka loka Isirael kere:

⁵ Kodweka da kere (naarai kainak EJAKAIT eoŋ idwe lusap luipu), abu koseu Solomon aiboikin oicoloŋ loka ajakanut naka EJAKAIT airum Isirael.

⁶ Kalimok eoŋ ebe, ‘Solomon okokukon, ŋes eduki ekatogo ka akalaroi: naarai aseu eoŋ ŋes araun okokuka, eoŋ da araun papake.

⁷ Eticasi akejakanut ikar kere, arai kinyikoki aiswamaenen aicorakinetaka ka itubesiaka, kwape lolo.’

⁸ Aso do, kakonyen nuka Isirael kere, ekodet loka EJAKAIT, kopupi Edekewok, koricenenete komoenenete aicorakineta kere nuka EJAKAIT Ekusideke: tetere irumete akwap na naejok, kinyeiniata araun airumet naka ikusidwe lukitupanakinete yes ikar kere.

⁹ “Ijo da, Solomon okokuka, kojenu Edeke loka papakon, kijaanakinenei ŋes ketau loedolit ka aomisio nuekotosi: naarai eŋici EJAKAIT itauon kere, ejeni aitetemonor kere nuka aomisio: arai imoenenei ŋes, kitakananakini jo: konye arai ijalenenei ŋes, kireŋei jo ikar kere.

¹⁰ Aso kocoite; naarai kiseu EJAKAIT jo adukokin aibois nakalaunan etogo: aso kicat, kiswama.”

¹¹ Kosodi Daudi ainakin Solomon okokuke aput naka alomaret naka eyekalu, ka naka itogoike, ka aiŋadisiake, ka agolaike nukokuju, ka agolaike nukotoma, ka aibois naka eicoloŋ-lokaitim:

¹² Ka aput naka nukejaas omoyoke kere, nuka alaroi nuka etogo loka EJAKAIT, ka agolai kere nuelukunito, naka aiŋadisia nuka etogo loka Edeke, ka naka aiŋadisia nuka iboro luatiakunitai.

¹³Bobo da nuka abeanakineta nuka isasedotin ka Ilebin, ka aswam kere naka aijaanakin kotogo loka EJAKAIT, ka iboro kere luka aijaanakin kotogo loka EJAKAIT.

¹⁴Esabu loitemitoi loka iboro luka esabu, iboro kere luka ŋolipone loka aijaanakin; epuesa loitemitoi loka iboro kere luka epuesa, iboro kere luka ŋolipone loka aijaanakin.

¹⁵Itemem da esabu loka ipirin luka atalai, loka atalaike, nuka esabu, loetemem loka ŋolipir loka atala ka atalaike: ido loka ipirin luka atalai luka epuesa, epuesa loetemem loka ŋolipir loka atala, ka atalaike, kwape kejaar aijaanakin naka ŋolipir loka atala.

¹⁶ Etemem da esabu loka imesan luka imugatin luka aitodikin, kaŋolimesa; epuesa da loka imesan luka epuesa.

¹⁷Ka igolun luka akiriŋ, ka atanya, ka akolin, nuka esabu loelai: etemem da esabu loka atuba, kaŋinituba; etemem da epuesa loka atuba, ka ŋinituba.

¹⁸ Etemem do esabu loililiauna loka etem loka lukisupurununo: esabu da loka aput naka agali, kes ikerubim, luigararaete abebenokakec, arapaar asaduku naka aitutuket naka EJAKAIT.

¹⁹ Kobala Daudi ebe, “Ŋun kere ketejenunete eoŋ kaiwadikaeta kakan naka EJAKAIT, kes aswamisio kere nuka aput kana.”

²⁰ Kotema Daudi Solomon okokuke atiar, “Kicat, kotitiŋior, kiswama ŋun; sirikikurianar, karaida aiyaloŋoŋ: naarai EJAKAIT Edeke, ŋes Ekadeke ejaenena kajo; mam ŋes isokori kamakon, mam kijali jo, aitodol needaunor aswam kere naka aijaanakin naka etogo loka EJAKAIT.

²¹ Ido koany, ejaas abeanakineta nuka isasedotin ka Ilebin, nuka aijaanakin kere nakaetogo loka Edeke: ejaun kajo ŋolituŋanan loekoto loepiriana, kaŋolipone loka aijaanakin kotoma aswam naka ŋolipone: erimakinete da cut ikapolok ka ituŋa kere aicorakinetekon.”