Read Ebaibuli 1961 1 Aisiitonokin 5 Bible Online

1 Aisiitonokin 5 - Ebaibuli 1961 bible

1 Aisiitonokin 5

¹ Odwe luka Reuben ekiyai loka Isirael (Naarai kerai ŋesi ekiyai: konye naarai abu komunaa aperit naka papake, aponi koinakinai odwe luka Yosep okoku loka Isirael apolouke; mam auri emarakinitai kwape kejaar apolou.

² Naarai abu Yuda kiteleka iinacanake, kotomakeŋ ŋes alomunia ekapolon; konye apolou kerai naka Yosep):

³ Odwe luka Reuben ekiyai loka Isirael; Kanok, ka Palu, ka Kesuron, ka Karumi.

⁴Odwe luka Yoel; Semaia okokuke, Gog okokuke, Simei okokuke;

⁵Mika okokuke, Reaia okokuke, Baal okokuke;

⁶ Beera okokuke, loabu Tiligat-pilineser ekabaka loka Asuria kijoreo: kerai ŋesi ekapolon loka Ireubin.

⁷Iinacanake kokekiakec, kwape emarere aur naka aturiokec; ejakait, Yeiel, ka Sekaria,

⁸ ka Bela okoku loka Asas, okoku loka Sema, okoku loka Yoel, loeboie koAroer, kiton Nebo ka Baal-meon:

⁹ kari nakokide kiboie kiton neelomarere amodiŋ anyoun kocor Eupurat: naarai kiyatakinos ibarenekec kakwap naka Gilead.

¹⁰ Kapaarasia nuka Saul kitijioto Ikagarin, luaario kakaninikec: kiboioto kowemanakec anatar akwap kere kari nakokide naka Gilead.

¹¹ Kiboioto odwe luka Gad eiduny kakes, kakwap naka Basan kiton Saleka:

¹²Yoel ejakait, ka Sapam lokiareit, ka Yanai, ka Sapat koBasan:

¹³ka iinacanakec luka ikekia luka lukapapaakec; Mikael, ka Mesulam, ka Seba, ka Yorai, ka Yakan, ka Sia, ka Eber, ikanykaarei.

¹⁴Ŋul kes odwe luka Abikail, okoku loka Kuri, okoku loka Yaroa, okoku loka Gilead, okoku loka Mikael, okoku loka Yesisai, okoku loka Yado, okoku loka Bus:

¹⁵Aki okoku loka Abudiel, okoku loka Guni, ejakait loka ikekia luka lukapapaakec.

¹⁶ Kiboioto kesi koGilead koBasan, koreriake, koronyia kere luka Saron, kiton oikorunokec.

¹⁷ Ŋul kere kimarunos kwape ajaar auriokec, kapaarasia nuka Yotam ekabaka loka Yuda, kapaarasia da nuka Yeroboam ekabaka loka Isirael.

¹⁸Odwe luka Reuben, ka Igadin, ka atutubet naka ateker naka Manase, ituŋa luetitiŋ, ituŋa luepedorete aidak ebuku ka ekileŋ, ka aigum kakabwa, luepiriaka ejie, emwaasi ilukumin akaisaoŋon ka luoŋon, ka akwat akanykaarei ka akaisakanykape, luepedorete alosit ojie.

¹⁹ Kitijioto Ikagurin, ka Yetur, ka Napis, ka Nodab.

²⁰ Aponi kiŋarakinai asurokin kes, kijaikinai Ikagurin akanikec, ka luajaas kakes kere: naarai apotu komonyata mama ejai Edeke kojie, kiyu ainainakec; naarai apotu komunokinos ŋes.

²¹Koŋatasi ibarenekec; akaalaikec ilukumin akaisakany, amerekekin ilukumin akwat aarei ka ilukumin akaisakany, asigirian ilukumin iarei, ka ituŋa ilukumin akwatat.

²² Naarai apotu kibiroros luaaritai luipu, naarai kerai ejie loka Edeke. Kiboikinos aiboisikec aitodol neejoreorere.

²³Kiboioto idwe luka atutubet naka ateker naka Manase kakwap: kiyatakinos kesi anyoun koBasan kiton Baal-kerumon ka Senir ka emoru Kerumon.

²⁴Lu kesi ikapolok luka ikekia luka lukapapaakec; Eper, ka Isi, ka Eliel, ka Asuriel, ka Yeremia, ka Kodabia, ka Yadiel, ituŋa lukirigin luetitiŋ, lukodwaratau, ikapolok luka ikekia luka lukapapaakec.

²⁵ Apotu kodiakasi kama ejai Edeke loka lukapapaakec, koloto eporo odekesio luka ituŋa luka akwap, luabu Edeke komudia kakonyenekec.

²⁶Kisidik Edeke loka Isirael emoyo loka Pul ekabaka loka Asuria, ka emoyo loka Tiligat-pilineser ekabaka loka Asuria, kijoreo kes, Ireubin ka Igadin, ka atutubet naka ateker naka Manase, koyau kes Kala, ka Kabor, ka Kara, kiton ocor loka Gosan, kiton lolo.