Read Ebaibuli 1961 2 Aisiltonokin 10 Bible Online

2 Aisiltonokin 10 - Ebaibuli 1961 bible

2 Aisiltonokin 10

¹ Kolot Rekoboam Sekem: naarai kinotara Isirael kere Sekem aitaraun ŋes ekabaka.

² Kosodi kanen, kepupu Yeroboam okoku loka Nebat ŋun, (naarai kejai Misiri, neakeriarit anyoun kakonyen nuka ekabaka Solomon,) koboŋu do Yeroboam koMisiri.

³Kijukasi konyarautu ŋes; kobu Yeroboam ka Isirael kere, kinerata ka Rekoboam atiar,

⁴ “Abu papakon kitalaŋir ajookotokosi: aso do kitebeben aswam naetiono naka papakon, ka ajookotoke naelaŋir naebwaikinit mamakosi, isio da kijaanakini jo.”

⁵Kotema kes atiar, “Koboŋutu neajai eoŋ ketuboros apaarasia auni.” Koloto ituŋa.

⁶ Kinerut ekabaka Rekoboam kimakio, luabwoenenete kakonyen nuka Solomon papake eroko ejari ebe, “Ibalasi bo yesi ai eoŋ aboŋokin ituŋa ŋul?”

⁷ Kobalas ŋes ebe, “Arai kisianiar ijo kaneejaas ituŋa ŋul, kisiyalamik kes, kolimok akiro nuejok, aso eraunos kesi ikonikejaanakinak ikar kere.”

⁸ Konye kola ainerun naka imakio naapesikinito ŋes, kineru kikatumunak luapolounete kaŋes, luabwoete kakonyeneke.

⁹Kotema kes atiar, “Ibalasi bo yesi ai, kaboŋokis ituŋa ŋul, luapotu kabalas eoŋ ebe, ‘Kitebeben ajookot nakibwaikini papakon mamakosi?’ ”

¹⁰Kotemasi ikatumunak luapolounete kaŋes atiar, “Kolimok ituŋa ŋul lukibalas jo ebe, ‘Abu papakon kitalaŋir ajookotokosi, konye jo kitebeben ŋes kamakosi’; ilimokini kes kwanata ebe, ‘Ebur ekabokorit lodidi aitelekar aŋabet naka papake.

¹¹Aso do abu papaka kisibwok yes ajookot naelaŋir, eyatakini do eoŋ ajookotokus: abu papaka koswala yes kidas, konye eoŋ kaswalari yes kikiritona.’ ”

¹²Aso kobu Yeroboam ka ituŋa kere mama ejai Rekoboam apaaran nakiwuniet, kwape ecorakinia ekabaka ebe, “Koboŋut bobo apaaran nakiwuniet.”

¹³ Koboŋok ekabaka ituŋa kaisiejakin: kola ekabaka Rekoboam ainerun naka imakio,

¹⁴kinera kakes kwape ajaar ainerun naka ikatumunak ebe, “Abu papaka kitalaŋir ajookotokus, konye eoŋ eyatakini ŋes; abu papaka koswala yes kidas konye eoŋ kaswalari yes kikiritona.”

¹⁵ Aso mam abu ekabaka kopup ituŋa; naarai kerai akirot naabu Edeke koyau, tetere iticasi EJAKAIT akekirot, naabu kiner kama ka Akiya Esilonit mama ejai Yeroboam okoku loka Nebat.

¹⁶Keanyu Isirael kere ebe mam abu ekabaka kopup kes, koboŋokis ituŋa ekabaka ebe, “Anyoin akorakinetekosi kama ka Daudi? Ido emamei sio airumet kotoma okoku loka Yese: Ape ma ŋinituŋanan owemanakus, wu Isirael: Daudi, koanyanar do ekonikek.” Koloto do luka Isirael kere owemanakec.

¹⁷Konye kirum Rekoboam idwe luka Isirael luiboiete koreria luka Yuda.

¹⁸Kosodi ekabaka Rekoboam aijukar Kadoram, loapolokinit esolo: apotu idwe luka Isirael kibiribiroto ŋes kamor, kotwana, Kiwonya ekabaka Rekoboam adokar agalike, akerit Yerusalem.

¹⁹ Kwaŋin kipaliik do Isirael ekek loka Daudi, kiton lolo.