Read Ebaibuli 1961 2 Aisiltonokin 13 Bible Online

2 Aisiltonokin 13 - Ebaibuli 1961 bible

2 Aisiltonokin 13

¹ Kokaru lokitomonet kakanykauni loka ekabaka Yeroboam kogeu Abiya airum Yuda.

² Kirumak ikar iuni koYerusalem: ekiror loka totoke kerai Mikaia akoku naka Urielloka Gibea. Kejai ejie kidiŋ Abiya ka Yeroboam.

³Kolot Abiya kajore naka ikajiok luetitiŋ, kes ituŋa ilukumin akwat aoŋon lueseunitai asurokin: kiderakin Yeroboam ejie kaŋes kituŋa ilukumin akwat akanykauni lueseunitai, lukeraas ikirigin luetitiŋ.

⁴ Kobwo Abiya komoru Semaraim loejai kakwap nakiukon naka Epuraim, kotema atiar, “Kopupokinai jo Yeroboam ka Isirael kere;

⁵ mam kereka ibusakinit yes ajenun ebe abu EJAKAIT, Edeke loka Isirael koinak Daudi ajakanut naka Isirael ikar kere, ŋes, ka odweke kaitutuket naka abalaŋ?

⁶ Konye konyou Yeroboam okoku loka Nebat, ekejaanakinan loka Solomon okoku loka Daudi, kipaliik ekejakait.

⁷ Kotukonokinos ituŋa luutai mama ejai, odwe luka Belial, lukitogogoŋete asurokin Rekoboam okoku loka Solomon, korai Rekoboam esapat, loka etau loenonok, komam kepedori aitikokin kes.

⁸ “Kwana do iwomitos yesi asurokin ajakanut naka EJAKAIT kakan naka odwe luka Daudi; iraas yesi ekodet loepol, ejaas kayes itak luka esabu luabu Yeroboam kiswamak yes araun idekesio.

⁹ Mam baca yes ipotu kireŋeasi isasedotin luka EJAKAIT, odwe luka Aaron, ka Ilebin, kodumut isasedotin kopone loka ituŋa lukacekwapin? Tape loebuni atiakun bon kemon lotobait ka imerekekin ikanykaarei, epedori araun esasedoti loka ŋul lumam eraas idekesio.

¹⁰Konye do isio, EJAKAIT ŋes Edekekosi, mam sio kipou kajalata ŋes; kija isio ka isasedotin luijaanakinete EJAKAIT, odwe luka Aaron, ka Ilebin toma aswamukec:

¹¹ icweikinete kesi ŋinitupuruc ka ŋinitiboŋ ainakineta nuicweio, ka lukisupurununo lueuru maa: inapanakinete kesi imugatin luka aitodikin omesa loesegaara; ka epir loka atalai loka esabu ka atalaike ainok ŋinitiboŋ: naarai kiric isio akiro nuka EJAKAIT Ewokodeke; konye ipotu yesi kojalata ŋes.

¹² Ido koany, ejai Edeke kasio kiŋarenikinit, ka isasedotinike karupepen nuka elulu akusia elulu asurokin yes. Yes idwe luka Isirael, sirikisurokis EJAKAIT, Edeke loka lukapapaakus; naarai mam ikeriakaros.”

¹³Konye kitolot Yeroboam ikaperunok kokaukec: kojaas kes kiŋaren ka Yuda, ka ikaperunok kaukec.

¹⁴Keŋoliasi luka Yuda kau, koany, kejai ejie kiŋaren, kokaukec da: kiworoto mama ejai EJAKAIT, kokuta isasedotin arupepen.

¹⁵ Kosodete ituŋa luka Yuda eibwoŋ: napibwonas ituŋa luka Yuda, kosodi kanen, kodany Edeke Yeroboam ka Isirael kere kakonyen nuka Abiya ka Yuda.

¹⁶Kokerata idwe luka Isirael kakonyen nuka Yuda: kijaik Edeke kes akanikec.

¹⁷Koar Abiya ka ituŋake kes kearit loepol: kibiroros luaaritai luka Isirael ituŋa ilukumin akwat akany lueseunitai.

¹⁸ Kwaŋin kitonokokai idwe luka Isirael kapaarasia kaŋun, kipikosi idwe luka Yuda naarai kegoŋakina EJAKAIT, Edeke loka lukapapaakec.

¹⁹ Korukitor Abiya Yeroboam, kirum ireria kamake, Bet-el ka ireriake, ka Yesana ka ireriake, ka Epuron ka ireriake.

²⁰ Mam bobo abu Yeroboam kogogoŋor kapaarasia nuka Abiya: kinom EJAKAIT ŋes, kotwana.

²¹Konye kogogoŋor Abiya, komany aŋor atomon ka nuoŋon, kouri idwe lusap akaisaarei ka luarei, ka lupesur itomon ka lukanykape.

²² Aswamisio ace nuka Abiya, ka iponesioke, ka akiroke, iwadikatai oitabo loka enabi Ido.