Read Ebaibuli 1961 2 Aisiltonokin 15 Bible Online

2 Aisiltonokin 15 - Ebaibuli 1961 bible

2 Aisiltonokin 15

¹ Kodoik emoyo loka Edeke Asaria okoku loka Oded:

² koloma ŋesi airiamakin ka Asa, kotema ŋes atiar, “Kopupokinai, Asa, ka Yuda kere ka Benyamin: ejai EJAKAIT kayes, naijaatar yesi kaŋes; arai imootos ŋes, idumunete; konye arai iialete ŋes, ŋes da kijali.

³ Apak naepol amamei Isirael Edeke lokabeit, amamei da esasedoti loisisianakini, amameete da ikisila:

⁴ konye nakejaatar ocan kibelokinos mama ejai EJAKAIT, Edeke loka Isirael, komoata ŋes, kodumutu ŋes.

⁵ Kapaarasia kwa amamei ainapakin ŋin yenelomari, karaida ŋin yenelomuni, konye kiyaloŋoŋoete noi luiboiete kere kakwapin.

⁶ Kobilibilunos, ateker kateker, ka ere ka ere: naarai kisiyaloŋoŋ Edeke kes katiokisio kere.

⁷ Konye kicata yesi, sirikijalijalakinos akusikanin: naarai eropio akusiswam.”

⁸ Kepupu Asa akiro ŋun, ka aidwar naka Oded enabi, kotitiŋior, kolema italesia kakwap kere nako Yuda ka Benyamin, koreria da luerumit kakwap nakiukon naka Epuraim; kiteteu etem loka EJAKAIT, lokejai iŋaren kaneelomarere togo loka EJAKAIT.

⁹ Kotukonok Yuda kere ka Benyamin, ka ŋul lukiboiororos kakes koEpuraim ka Manase, koSimeon da; naarai kobwota luipu kakesi mama ejai ŋesi koIsiraei, keanyutu kesi ebe ejai EJAKAIT Ekedeke kaŋes.

¹⁰Kotukonokinos do koYerusalem kolap lokiwuniet, kokaru lokitomonet kakany loka airum naka Asa.

¹¹ Koinakis EJAKAIT asuban kapaaran kaŋin, nuka luŋatuna luayaut, imoŋin akwat akanykaarei ka amerekekin alukumin akanykaarei.

¹² Kolomasi toma aitutuket amoot EJAKAIT, Edeke loka lukapapaakec, kikecetauon kere ka akeceijar kere;

¹³ ebe da yeneŋeri amoot EJAKAIT, Edeke loka Isiraei, eario, arai yenedit arai yenepol, arai ekiliokit arai aberu.

¹⁴Kiyapoikis EJAKAIT keporoto loepol, keibwoŋ, karupepen, ka apeen.

¹⁵Kisiyalamik Yuda kere aiyaposit: naarai apotu kiyapoto kitauonokec kere, komoata ŋes keimielakec kere; apotu kodumut ŋes: kisiyeŋu EJAKAIT kes kowaitin kere.

¹⁶ Kireŋea da Maaka, toto naka Asa ekabaka, karaut akabaka, naarai abu kiswamau aput naketal araun Asera; kojepa Asa aputoke, kitarau apua, kicwe kaguurut Kiduron.

¹⁷ Konye mam aponi kolemarai aiboisio nuieeieleete koIsirael: konye kedolit etau loka Asa apaarasiake kere.

¹⁸Kitoloma iboro togo loka Edeke luabu papake kotiakarite, ka iboro luabu ŋesi elopet kotiakarite, epuesa ka esabu ka iboro.

¹⁹Amamei bobo ejie aitodol okaru loka akaisauni ka lukany loka airum naka Asa.