Read Ebaibuli 1961 2 Aisiltonokin 19 Bible Online

2 Aisiltonokin 19 - Ebaibuli 1961 bible

2 Aisiltonokin 19

¹Koboŋo Yekosapat ekabaka loka Yuda togoke Yerusalem inapakina.

² Koloma Yeku okoku loka Kanani ekadwaran airiamakin kaŋes, kotema ŋesi ekabaka Yekosapat atiar, “Ti kereka ejok jo aiŋarakin ikaronok, amina da ŋul luelaito EJAKAIT? Kanuka akirot kaŋin kibunok jo anyunyura kakonyen nuka EJAKAIT.

³ Konye edumuna nuejok kotomakon, naarai ilema Aserot kakwap, ibwaikinit ekonitau amoot Edeke.”

⁴Kiboie Yekosapat koYerusalem: koloma bobo mama ejaas ituŋa anyoun koBeer-seba kiton akwap nakiukon naka Epuraim, kinyaku kes mama ejai EJAKAIT, Edeke loka lukapapaakec.

⁵ Kodakanak ikatubok kakwap anatar ireria kere luebwaitai luka Yuda, kaŋolire kere.

⁶ Kotema ikatubok atiar, “Koomitos nuiswamaete: naarai mam itubete kanuka ituŋanan, konye kanuka EJAKAIT: ejai ŋesi kayes kotube.

⁷ Aso do koyoŋito yesi EJAKAIT; kocoito kiswamata: naarai emameete numam adolit kaneejai EJAKAIT Ewokodeke, karaida atiakit ituŋa, karaida aijaun ainakineta.”

⁸ Ido Yerusalem kibwaik Yekosapat ice koLebin ka isasedotin, ka ikapolok luka ikekia luka lukapapaa luka Isirael, kanuka etube loka EJAKAIT, ka ipegeta. Koboŋosi Yerusalem.

⁹ Kicoro kes ebe, “Kikwaikisi neta iyonete EJAKAIT, amunonut, ka etau Ioedolit.

¹⁰ Naeyauniata ikusiinacan luiboiete koreriakec epeget kere mama ijaas, kokidiŋ kaokot ka aokot, kokidiŋ kekisil ka aicorakinet, ikisila ka itubesia, kikwenyasi kes, kinyeis agwaun akiro mama ejai EJAKAIT, kosodi anyunyura abunokin yes ka ikusiinacan: kiswamata ŋun, mam do igwaunete.

¹¹Ido koany, kipolokinit yes Amaria esasedoti lopeti kakiro kere nuka EJAKAIT; ka Sebedia okoku loka Isimael, ekayaiton ekek loka Yuda kakiro kere nuka ekabaka: Ilebin da eraunos ikapolokitokokus, Kiswamata katitiŋ, kojai EJAKAIT ka yenejok.”