Read Ebaibuli 1961 2 Aisiltonokin 20 Bible Online

2 Aisiltonokin 20 - Ebaibuli 1961 bible

2 Aisiltonokin 20

¹Kosodi kanen, akaulo kaŋun, kopotu idwe luka Moab, ka idwe luka Amon, ka ice koMonain kakes asurokin Yekosapat.

² Kosodi kopotu ice lualimokinete Yekosapat ebe, “Ebunit ekodet loepol asurokin jo anyoun kokekwa koSuria; ido koany, ejaas Kasason-tamar (ŋes ŋol Engedi).”

³ Kokuriana Yekosapat, kodunyak amoot EJAKAIT; kolimo ailuŋ anatar Yuda kere.

⁴ Kotukonokin Yuda kere, amoot aiŋarakinio kaneejai EJAKAIT: kopotu koreria kere luka Yuda amoot EJAKAIT.

⁵Kobwo Yekosapat katukot naka Yuda ka Yerusalem, togo loka EJAKAIT kiŋaren kalaro nakitetet;

⁶ kotema atiar, “Wu EJAKAIT, Edeke loka lukapapaakosi, mere ijo Edeke toma akuj? Mere ijo ekayaiton ajakanuto kere nuka atekerin? Kakonikan ejai agogoŋ ka apedor, ŋes emamear loepedori aitikokin jo.

⁷ Mam kereka jo, wu Ekosideke, irenearit lueboiete kakwap kana kakonyen nuka ikonituŋa Isirael, koinak aur naka Aburaam opaperokon ikar kere?

⁸Apotu kiboikinos kanen, kodukokis jo kanen aibois nakalaunan kanuka ekonikiror, kobalas ebe,

⁹ ‘Arai kiidoik sio aronis, ekileŋ, etube, arai atular, arai ebeli, kibwoi koiŋaren ketogo kalo, kakonyenekon, (naarai ejai ekonikiror togo lo,) kimonyia isio jo kocanikosi, iirari itajari da.’

¹⁰ Aso do koany, idwe luka Amon ka Moab ka lukomoru Seir, lumam jo icamunit Isirael alomar akwapukec nakeponiata kesi kakwap nako Misiri, konye apotu kesi kinaca, mam apotu komudiasi kes;

¹¹ koany, kwape kitaciata kesi sio aponare aireŋear sio kairumetekon, naibu ijo koinak sio airum.

¹² Wu Ekosideke, mam kereka jo itubokini kes? Naarai emamei sio agogoŋ asurokin ekodet lo loepolloabu asurokin sio; mam kijeni da nukiswamai; konye esesenete akosikonye jo.”

¹³Kobwo Yuda kere kakonyen nuka EJAKAIT, nepepe kaludidikikec, ka aŋorokec, ka idwekec.

¹⁴ Kosodi kodoik emoyo loka EJAKAIT Yakasiel okoku loka Sekaria, okoku loka Benaia, okoku loka Yeiel, okoku loka Matania, Elebit, lokodwe luka Asap, kokidiŋ katukot.

¹⁵ Kotema ŋesi atiar, “Kiirasi yesi, Yuda kere, ka yes luiboiete koYerusalem, ka jo Yekosapat ekabaka: inera EJAKAIT kwanata mama ijaas ebe, ‘Sirikikuriakaros, karaida aiyaloŋoŋ kanuka ekodet kala loepol; naarai ejie mam erai lokus, konye loka Edeke.

¹⁶Koloto yesi moi asurokin kes: koany, epote kadokaret naka Sis; idumakinete kes osaŋe loka aditot, koiŋaren kamodiŋ naka Yeruel.

¹⁷ Mam yes ipudasi ejie kojie lo; kiderakinos, kobwaata kopalarito, koanyut aitajar naka EJAKAIT naejai kayes, wu Yuda ka Yerusalem’: sirikikuriakaros karaida aiyaloŋoŋ; koloto moi asurokin kes; naarai ejai EJAKAIT kayes.”

¹⁸ Kokukum Yekosapat kitulur akekou kwap: kibiror Yuda kere ka luiboiete koYerusalem kakonyen nuka EJAKAIT, komaata EJAKAIT.

¹⁹Kobwaata Ilebin, lukodwe luka Ikokatin, ka lukodwe luka Ikorakin, kituritos EJAKAIT, Edeke loka Isirael, keporoto loepol noi.

²⁰ Konyoutu tupuruc sek, kolomasi amodiŋ naka Tekoa; napelomarete kobwo Yekosapat kotema atiar, “Kiirarai, jo Yuda, ka yes luiboiete koYerusalem; kiyuutu EJAKAIT Ekusideke, kwaŋin kiticasio; kiyuutu inabinoke, kwaŋin kisirereŋio.”

²¹ Kedau ŋesi ainerun kaituŋa, koseu lueyeikinete EJAKAIT, luituritos ajokis naka alaunit, nakelosioto kiŋarenikinito ajore, kobalasi ebe, “Kimalata EJAKAIT; Naarai ejaenena akeitim ikar kere.”

²² Kegeutu kesi ayoore ka aiturit, kibwaik EJAKAIT ikaperunok asurokin idwe luka Amon, ka Moab ka moru Seir, luaponito asurokin Yuda; kodanyai.

²³Naarai konyoikis idwe luka Amon ka Moab aluikin luiboiete moru Seir, aiar ka amudiar kes cut: kedautu kesi aiar luiboiete koSeir, kigaŋanakinos ŋulutuŋa aiar yeni ee.

²⁴ Kedol Yuda aiteis naka amodiŋ, kosesenete ekodet; ido koany, keraas lukatwak luebirokina kwap, kemameete da luakuito.

²⁵Kebu Yekosapat ka iketuŋa aiŋat kes, kodumut ibaren luipu noi, ka iboro, ka inapen, ka iboro luka akais nuipu, luapotu kolacut kanukec, adepar luapedorete ayaŋaar: kodaut apaarasia auni eŋasete, naarai epu noi.

²⁶Kapaaran nakiwoŋonet kotukonokinos aditot naka Beraka;[1] naarai kanen kituritos EJAKAIT: Ŋes kemaikiniata ekiror loka aibois ŋin Aditot naka Beraka, kiton lolo.

²⁷ Kosodete aboŋor, ŋolituŋanan loka Yuda ka Yerusalem, kiŋarenikinite Yekosapat kes, aboŋor Yerusalem kaiyalama; naarai abu EJAKAIT kisiyalamik kes kama kalukasurupokec.

²⁸Kopotu Yerusalem ejaas kisabulin ka adeudeun ka arupepen mama ejai etogo loka EJAKAIT.

²⁹ Kojau etasuro loka Edeke atekerin kere nuka akwapin, kepuput kesi ebe asurok EJAKAIT lukasurupo luka Isirael.

³⁰ Kiyamakin do ayaetait naka Yekosapat; naarai kisiyeŋ Ekedeke ŋes kowaitin kere.

³¹ Kirum Yekosapat Yuda: kerai loka ikar akaisauni ka lukany egeuni airum; kirumak ikar akaisaarei ka lukany koYerusalem; ekiror loka totoke kerai Asuba akoku naka Siliki.

³²Kolosenenei korot loka Asa papake, mam abu kopaa, kiswamaenenei nuejok kakonyen nuka EJAKAIT.

³³ Konye mam aponi kolemarai aiboisio nuiceleleete; kwabo eriŋa ber ituŋa ibwaikina itauonokec mama ejai Edeke loka lukapapaakec.

³⁴ Aswamisio ace kere nuka Yekosapat, nusodit ka nukawasia, koany, iwadikatai kakiro nuka Yeku okoku loka Kenani, nuikopakinitai oitabo loka ikabakan luka Isirael.

³⁵Akaulo kaŋun kimorikikinos Yekosapat ekabaka loka Yuda ka Akasia ekabaka loka Isirael; abu ŋol kiswama nueroko noi.

³⁶ Kimorikikinos kaŋes aiswamaun ameerin nuelosenenete Tarusis; apotu kiswamaut ameerin koEsion-geber.

³⁷ Kosodi Elieser okoku loka Dodabaku loka Maresa adwarakin Yekosapat ebe, “Naarai ibu kimorikikinos ka Akasia, emudiari EJAKAIT akoniswamisio.” Aponi kobilibilai ameerin, tape mam apedorete alosit Tarusis.