Read Ebaibuli 1961 2 Aisiltonokin 22 Bible Online

2 Aisiltonokin 22 - Ebaibuli 1961 bible

2 Aisiltonokin 22

¹ Kosodete luiboiete koYerusalem kitaraut Akasia enoorinke ekabaka aiboisike: naarai abu erioŋet loka ituŋa luauparos ka Iarabun oidukurun koar lukapolok kere. Kirum do Akasia okoku loka Yekoram ekabaka loka Yuda.

² Kerai Akasia loka ikar akaisaoŋon ka luarei egeuni airum; kirumak ekaru edioper ko Yerusalem: ekiror loka totoke kerai Atalia akoku naka Omiri.

³Kolosenenei Akasia da korotin luka ekek loka Akab: naarai totoke ŋes akenerunanike aswam nukaronis.

⁴ Kiswama nueroko kakonyen nuka EJAKAIT, kwape lukokek loka Akab: naarai araas kesi ikenerunakake akaulo katwanare naka papake, amudiar ŋes.

⁵ Kotupa da ainerunikec, kouparos ka Yekoram okoku loka Akab ekabaka loka Isirael aitiji Kasael ekabaka loka Suria koRamot-gilead: kimusuŋata Isurian Yoram.

⁶ Koboŋo Yesereel aŋaleun amusuŋun nuemusunitai ŋes koRama, naajiotor ka Kasael ekabaka loka Suria. Kolot Asaria okoku loka Yekoram ekabaka loka Yuda aanyun Yekoram okoku loka Akab koYesereel, naarai adeka.

⁷ Abuni amudiario naka Akasia ka ma ejai Edeke naarai abu ŋesi kolot mama ejai Yoram: naarai kedolo, kolomasi nepepe ka Yekoram asurokin Yeku okoku loka Nimisi, loabu EJAKAIT koseu amudiar ekek loka Akab.

⁸ Kosodi kanen, naetodolikinio Yeku etube kokek loka Akab, kodum ikapolok luka Yuda, ka odwe luka iinacan luka Akasia ijaanakinete Akasia, koar kes.

⁹ Komo ŋesi Akasia, kikamut ŋes, (eŋopit do koSamaria,) koyaŋaut mama ejai Yeku, koarata ŋes; kidaata ŋes naarai abalas ebe, “Ŋes okoku loka Yekosapat, loamoot EJAKAIT keketau kere.” Amamei ekek loka Akasia apedor ayait ajakanut.

¹⁰Keanyu Atalia toto naka Akasia ebe atwana okokuke, konyou, komudia aur kere naka ekabaka loka ekek loka Yuda.

¹¹ Konye koyaŋa Yekosabeat, akoku naka ekabaka, Yoas okoku loka Akasia, kokokwa ŋes kodwe luka ekabaka luaario, kibwaik ŋes ka akasaanike agola naeŋadio iitadan. Kwaŋin abu Yekosabeatrakoku naka ekabaka Yekoram, aberu naka Yekoiada esasedoti, (naarai kerai ŋesi inaci naka Akasia,) kimunonikis ŋes Atalia, kinyek aiar.

¹²Kojai kakes ibwaitai kotogo loka Edeke ikar ikanykape: kirum Atalia akwap.