Read Ebaibuli 1961 2 Aisiltonokin 23 Bible Online

2 Aisiltonokin 23 - Ebaibuli 1961 bible

2 Aisiltonokin 23

¹ Kokaru lokikanyetekaarei kogogoŋoor Yekoiada, koyaŋa ikapolok luka akwat, Asariaokoku loka Yekoram, ka Isimael okoku loka Yekokanan, ka Asaria okoku loka Obed, ka Maaseia okoku loka Adaia, ka Elisapat okoku loka Sikiri, kitutukoto kakes.

² Kitoroto koYuda, kotukonokis Ilebin koreria kere luka Yuda, ka lukapolok luka ikekia luka lukapapaa luka Isirael, kopotu Yerusalem.

³ Kitutukoto ekodet kere ka ekabaka togo loka Edeke. Kotema kes atiar, “Koany, irumi okoku loka ekabaka, kwape abalar EJAKAIT kodwe luka Daudi.

⁴ Na ŋes akirot naiswamaete: atutubetekus nakiwuniet, luelomunete kanakasabato, naka isasedotin ka Ilebin, iraunos ikagolok luka ikekia;

⁵ Atutubet nakiwuniet ejaunun togo loka ekabaka; ka atutubet nakiwuniet orute loka apetetait: ejaunos da ituŋa kere alaroi nukotogo loka EJAKAIT.

⁶ Konye sirikisiikis ituŋanan alomun togo loka EJAKAIT dimarai isasedotin, ka lukoLebin luijaanakinete; ŋul kes elomunete, naarai eraas lukalaunak: konye ericete ituŋa kere aidar naka EJAKAIT.

⁷Elukunete Ilebin ekabaka, kitiŋite ŋolituŋanan lujiisike kakanike; yenelomuni togo kere, koarai: kojaenenas yesi kekabaka naelomununia ka naelomanaria da.”

⁸ Kiswamata do Ilebin ka Yuda kere kwape ajaatar kere nuecorakini Yekoiada esasedoti; koyaŋa ŋolituŋanan iketuŋa, ŋul luelomunete kanakasabato, ka luelomarete da kanakasabato; naarai mam Yekoiada abu kotwara luabeito alosit.

⁹Kijaik Yekoiada esasedoti ikapolok luka akwat akwaras ka iupalia ka ibukui lukeraas sek luka ekabaka Daudi, luajaas togo loka Edeke.

¹⁰Kisibwo ituŋa kere, kitiŋite ŋolituŋanan loiiisike kakanike, ameun kowai lokoteten loka etogo kiton owai lokokediany loka etogo, eiduny ketem ka etogo, elukunito ekabaka.

¹¹ Kosodete kesi aitolomun okoku loka ekabaka, kidokokis aboko akouke, koinakis aitejenunet, kitaraut ŋes ekabaka: kinyonyoata do ŋes Yekoiada ka odweke akinyet; kotemasi atiar, “Kidari Edeke ekabaka.”

¹²Kepupu Atalia ecelet loka ituŋa ekerete ituritos ekabaka, kobu mama ejaas ituŋa togo loka EJAKAIT.

¹³ Kosesen, ido koany, ebwoi ekabaka eiduny kepirike neelomarere, ka ikapolok ka arupepen eiduny ka ekabaka; kibwoŋasi ituŋa kere luka akwap, kokuta arupepen; koramata da ikayook iboro lueruosi, kiŋarenikinito ayoore naka aiturit. Kosodi Atalia aicil ikenapen, kobala ebe, “Ebotet, ebotet lokibilakinito.”

¹⁴ Koyau Yekoiada esasedoti ikapolok luka akwat luapolokinito ajore, kotema kes atiar, “Kitolomasi ya kidiŋ okokoron; ŋol da loetupari ŋes, koarata kekileŋ.” Naarai abala esasedoti ebe, “Sirikiarata ŋes kotogo loka EJAKAIT.”

¹⁵ Kocilakis ŋes erot; kolot neelomarere orute loka ibalasin aibe togo loka ekabaka: koarakinaiŋina.

¹⁶ Kitutuk Yekoiada, ŋes elopet, ka ituŋa kere, ka ekabaka, ebe koraut ituŋa luka EJAKAIT.

¹⁷ Koloto ituŋa kere togo loka Baal, kotiyatiyata, kobilibilata iketemwan ka akeputosia, koarakinai Matan esasedoti loka Baal kiŋaren kitemwan.

¹⁸ Kitetemik Yekoiada aswam naka etogo loka EJAKAIT kakan naka isasedotin Ilebin, luabu Daudi kokorak togo loka EJAKAIT, ainakin ainakineta nuicweio nuka EJAKAIT, kwape ewadikatere okisila luka Musa, keibwoŋ ka ayoore, kwape ajaar aicorakinet naka Daudi.

¹⁹ Kibwaik ikagolok orutei luka etogo loka EJAKAIT, kinyek yenimam elai alomar toma.

²⁰ Koyaŋa ikapolok luka akwat, ka ijaka, ka ikayaitok luka ituŋa, ka ituŋa kere luka akwap, kitolomut ekabaka kotogo loka EJAKAIT: kolomasi orute lokokuju koloto togo loka ekabaka, kibwaikis ekabaka oicoloŋ loka ajakanut.

²¹ Kibwoŋasi do ituŋa kere luka akwap, kiyamakin ere: koarata Atalia kekileŋ.