Read Ebaibuli 1961 2 Aisiltonokin 3 Bible Online

2 Aisiltonokin 3 - Ebaibuli 1961 bible

2 Aisiltonokin 3

¹ Kosodi kogeu Solomon aiduk etogo loka EJAKAIT Yerusalem moru Moria, nekitaanyikinor EJAKAIT Daudi papake, aibois naaseikinit Daudi, opejal loka Orunan Eyebusit.

²Kogeu aiduk kapaaran nakiareit naka elap lokiareit kokaru lokiwoŋonet loka airumuke.

³ Nu kes apeteta nuapesikinit Solomon aiduk etogo loka Edeke. Aojau kokubitin kwape ajaar aitemis nasodit ŋes ikubitin akaisakanykape, ka alalau da ikubitin akaisaarei.

⁴ Agola nalomaret nakejai koiŋaren ketogo, aojauke, kwape ajaar alalau naka etogo, ikubitin akaisaarei, amukurur akwatat ka akaisaarei: kiladaa toma kesabu loelai.

⁵ Kiswap etogo lokapolon kakito nuka eberos, nukiladaari kesabu loejok, kiswama tomake ikito luka idukudukun ka irikoi.

⁶Kitubusia etogo kamor nuka akais nuipu: esabu kerai esabu loka Parubaim.

⁷Kiladaa da etogo, ka abaoi, ka neelomarere, ka arwatatinike, ka ikiriginike kesabu; kigirak ikerubin arwatatin.

⁸Abu kiswamau etogo lokalaunan noi; aojauke kwape kejaar alalau naka etogo, ikubitin akaisaarei, alalauke ikubitin akaisaarei: kiladaa ŋes kesabu loejok, kotiai loka atalatan akwat akanykape.

⁹Alaŋir naka isumalin isekelin akaisakany luka esabu. Kiladaa agolai nukokuju kesabu.

¹⁰ Kotoma togo lokalaunan noi kiswamau ikerubin iarei luka akito; kiladaasi kesabu.

¹¹Aoiak abebenoka nuka ikerubin ikubitin akaisaarei: abebenok adiopet ikubitin ikany, kodolite arwatat naka etogo; abebenok ace da ikubitin ikany, kodolite abebenok naka ekerubi ece.

¹²Abebenok naka ekerubi ece ikubitin ikany, kodolite arwatat naka etogo: abebenok ace da ikubitin ikany, kiriamakina kabebenok naka ekerubi ece.

¹³Kigararaete abebenoka nuka ikerubin kaŋul ikubitin akaisaarei: kobwaata kesi kakejenekec, kiteete akonyenekec etogo.

¹⁴ Kiswamau aigalisit kalobululu, ka lomuge, ka lokareŋan, ka ebaputa loejok, kosonyak ikerubin kotomake.

¹⁵ Kiswamau da koiŋaren ketogo ipirin iarei lueojak ikubitin akaisauni ka lukany, ka akwes nukejaas kujukec kere aojau ikubitin ikany.

¹⁶Kiswamau irikoi neinerenenere akirot, kibwaik kes kuju kipirin; kiswamau akamamagan akwatat kibwaik kes korikoi.

¹⁷Kosipok ipirin koiŋaren keyekalu, ediopet kakan nakoteten, ece kakan nakokediany; komaik ekiror loka ŋol kakan nakoteten Yakin, ekiror loka ŋol kakan nakokediany Boas.