Read Ebaibuli 1961 2 Aisiltonokin 30 Bible Online

2 Aisiltonokin 30 - Ebaibuli 1961 bible

2 Aisiltonokin 30

¹Kijuka Kesekia mama ejai Isirael kere ka Yuda, kiwadik ibaluan da mama ejai Epuraim ka Manase, tetere epote togo loka EJAKAIT Yerusalem, aidar Aleleŋio mama ejai EJAKAIT Edeke loka Isirael.

² Naarai kinerut ekabaka ka ikapolokoke, ka ekodet kere koYerusalem, aidar Aleleŋio kolap lokiareit.

³ Naarai mam apedorete aidar kapak kaŋin, naarai mam isasedotin apotu kitalauna bonik kotiai loedauni, karaida ituŋa atukokin Yerusalem.

⁴Kitojokai akirot kakonyen nuka ekabaka ka ekodet kere.

⁵Kibwaikis ekisil alimor anatar Isirael kere, anyoun koBeer-seba kiton Dan, aponare aidar Aleleŋio mama ejai EJAKAIT, Edeke loka Isirael, Yerusalem: naarai luipu mam apotu kidarata ŋes kwape kiwadikatere.

⁶ Koloto ikakerak kibaluan anyoun kokabaka ka ikapolokoke anatar Isirael kere ka Yuda, kwape ajaar aicorakinet naka ekabaka ebe, “Yes idwe luka Isirael, kibelokinos bobo mama ejai EJAKAIT, Edeke loka Aburaam, ka Isaak ka Isirael, tetere eboŋuni mama ejai aatoŋot naaku kayesi kakan naka ikabakan luka Asuria.

⁷ Sirikiputokinos kalukapapaakus, ka ikusiinacan, luapaas kama ka EJAKAIT, Edeke loka lukapapaakec, tetere einakini kes aitisilario, kwape ianyuniata.

⁸ Siriraas lueninik imurisiŋa, kwape lukapapaakus; konye koluŋakinos mama ejai EJAKAIT, kolomasi aiboisike nakalaunan, naetalaunit ikar kere, kijaanakis EJAKAIT Ekusideke, tetere ibelokin akenyunyura naededeŋ kamakus.

⁹ Naarai arai ibelokinos bobo mama ejai EJAKAIT, itimio ikusiinacan ka ikusidwe kakonyen nuka ŋul kaluejoreorete kes, eboŋunete bobo akwap na: naarai esiana EJAKAIT Ekusideke, lokaitim da, mam ibelokini akekonyen kamakus arai ibonuŋete mamake.”

¹⁰ Kitoroto ikakerak ireria kere anatar akwap naka Epuraim ka Manase, kiton Sebulun: konye kokienatar kes, kisekeloto kes.

¹¹ Konye kitasonikinos ice luko Aser ka Manase ka Sebulun, kopotu Yerusalem.

¹² Kojai da akan naka Edeke koYuda ainakin kes etau ediopet, aswam aicorakinet naka ekabaka ka ikapolok kakirot naka EJAKAIT.

¹³Kotukonokina ituŋa luipu koYerusalem aidar epucit loka imugatin lumam itubuunitoi kolap lokiareit, ekodet loapol noi.

¹⁴ Konyout kolemasi itemwan luajaas Yerusalem, kolemasi da itemwan lukisupuruunet, kocakakis aguurut Kidiron.

¹⁵ Kosodete aiar lukalelenio kapaaran nakitomonet kaoŋon kolap lokiareit: kirumata isasedotin ka Ilebin ileic, kitalaunos bonik, koyaut ainakineta nuicweio togo loka EJAKAIT.

¹⁶Kobwaata kaiboisiokec kwape kibusakinitotor, kwape ajaar ekisil loka Musa etuŋanan loka Edeke: kobwatanakis isasedotin aokot, nuejaikinete kes Ilebin.

¹⁷ Naarai ajaas luipu kokodet lumam etalauna bonik: kanuka ŋun koraun do aswam naka Ilebin aaranakin ŋinituŋanan yenimam elai aleleŋio, aitalaun kes mama ejai EJAKAIT.

¹⁸ Naarai epu ituŋa, ido luepu kakesi luka Epuraim ka Manase, Isakar ka Sebulun, mam apotu kitalauna bonik, konye konyamata lukalelenio kopone lomam ewadikatere. Naarai abu Kesekia kilipak kes ebe, “Kisioni EJAKAIT lokajokan ŋinituŋanan

¹⁹ yenibwaikini eketau amoot Edeke, EJAKAIT, Edeke loka lukapapaake, karaida mam italaunitai kwape ejaar aitesegario naka aibois nakalaunan.”

²⁰ Kiira EJAKAIT Kesekia, kitaŋaleu ituŋa.

²¹ Kidarata idwe luka Isirael luajaas Yerusalem epucit loka imugatin lumam itubuunitoi adaun apaarasia akanykaarei kaiyalama naepol: kituritos Ilebin ka isasedotin EJAKAIT ŋinipaaran, koyeikis EJAKAIT kiboro lueruosi noi.

²² Kiner Kesekia nukaitalakaar Ilebin kere luepiriaka noi aijaanakin EJAKAIT, Konyamakis do epucit kere adaun apaarasia akanykaarei, koinanakinete asuban nuka ainakineta nuka ainapakin, kolimonorete EJAKAIT, Edeke loka lukapapaakec.

²³ Kineru ekodet kere aidar acepaarasia akanykaarei: kidarata apaarasia ace akanykaarei kaiyalama.

²⁴ Naarai abu Kesekia ekabaka loka Yuda koinak ekodet imoŋin lutoba elukumit ka amerekekin alukumin akanykaarei araut ainakineta; apotu da ikapolok koinakis ekodet imoŋin lutoba elukumit ka amerekekin alukumin atomon: kitalaunos isasedotin luipu noi bonik.

²⁵ Kiyalama ekodet kere loka Yuda, ka isasedotin ka Ilebin, ka ekodet kere loabuni koIsirael, ka imo luapote kakwap naka Isirael, ka lueboiete koYuda.

²⁶Kojai do aiyalama naepol Yerusalem: naarai ageun kapaarasia nuka Solomon okoku loka Daudi ekabaka loka Isirael amamei naaputotor koYerusalem.

²⁷ Kosodete isasedotin Ilebin anyoun, kilipakis ituŋa arereŋ, Kiirarai ekeceporoto, kodol ailipikec aiboisike nakalaunan, ŋes akuj.