Read Ebaibuli 1961 2 Aisiltonokin 31 Bible Online

2 Aisiltonokin 31 - Ebaibuli 1961 bible

2 Aisiltonokin 31

¹ Kedaunos ŋun kere, koloto luka Isirael kere luajaas nen oreria luka Yuda, kobilibilata ipirin, kojepejepata Aserim, kobilibilata aiboisio nuiceleleete ka itemwan ko Yuda kere ka Benyamin, koEpuraim da ka Manase, aitodol neamudiariata kes kere. Kosodete idwe kere luka Isirael aboŋun, ŋinituŋanan airumeteke oreriakec.

² Kitetemik Kesekia abeanakin naka isasedotin ka Ilebin kwape ajaatar abeanakinetakec, ŋolituŋanan kwape ejaar aijaanakinike, isasedotin ka Ilebin kere, luka ainakineta nuicweio ka ainakineta nuka ainapakin, aijaanakin, ka aimal, ka aiturit korutei luka eidukuru loka EJAKAIT.

³ Kitetemik da ewai loka iboro luejaatar ekabaka araun ainakineta nuicweio, kes nu, nuka ainakineta nuicweio nuka tupuruc ka eboŋ, ainakineta nuicweio da nuka asabaton, ka napilamununei elap, ka nuka ipucin lueseunitai, kwape iwadikatere okisila luka EJAKAIT.

⁴ Kicorak da ituŋa lueboiete koYerusalem ainanakin ewai loka isasedotin ka Hebin, tetere einanakinete bonik kokisila luka EJAKAIT.

⁵ Atipet nakitisiarikinor aicorakinet, koinanakis idwe luka Isirael kaipues lugeet luka akima, ka ebino, ka akinyet, ka esik, ka luka amio kere nakomanikor: koyaununut yenikitomonet yenika iboro kere kaipues.

⁶ Idwe luka Isirael ka Yuda, lukiboiete koreria luka Yuda, koyaut da yenikitomonet yenika imoŋin ka amerekekin, ka yenikitomonet yenika iboro luetiakunitai mama ejai EJAKAIT Ekecedeke, kibwaikis atukon.

⁷Kolap lokiwuniet kogeut aituk atukon, kodaut kes kolap lokikanyetekaarei.

⁸ Kebu Kesekia ka ikapolok koanyut atukon, kiturito EJAKAIT ka iketuŋa Isirael.

⁹Kosodi Kesekia ainitunun isasedotin ka Ilebin nuka atukon.

¹⁰ Koboŋok Asaria esasedoti Iopeti lokokek loka Sadok, kotema ŋes atiar, “Ageun ituŋa ayaun ainakineta togo loka EJAKAIT, kinyami isio lukidaunete, kideuni da luipu: naarai kisirereŋ EJAKAIT iketuŋa; luedeunos kes atukot na naepol.”

¹¹Kicorak do Kesekia kes aitemokin agolai togo loka EJAKAIT; kitemokis.

¹² Koyaut ainakineta ka lukitomon ka iboro luetiakunitai da kamunonut: korai Konania Elebit ekayaitonikec, kiareik Simei onaceke.

¹³Ido Yekiel, ka Asasia, ka Nakat, ka Asakel, ka Yerimot, ka Yosabad, ka Eliel, ka Isimakia, ka Makat, ka Benaia, koraas ikaanyanarak kakan naka Konania ka Simei onaceke, kanuka aicorakinet naka Kesekia ekabaka, ka Asaria ekayaiton etogo loka Edeke.

¹⁴Ido abu Kore okoku loka Imina Elebit, ekagolon erute lokokide, kopolokinite ainakineta nuka akot nuka Edeke, akoranakin ainakineta nuka EJAKAIT, ka iboro lukalaunak noi.

¹⁵ Kwapuke ajai Eden ka Minaimin, ka Yesua, ka Semaia, ka Amaria, ka Sekania, koreria luka isasedotin, kaswamukec, ainakin ikeceinacan kabeanakin, lukapolok ka ludidik da:

¹⁶kogelara ŋul luemaritai kaurikec naka lukiliok, ageun ka luka ikar iuni ka adepar, ŋolituŋanan loelomari togo loka EJAKAIT, kwape ibusakinitor aswam naka ŋinipaaran, aijaanakin kaswamukec kwape ajaatar abeanakinetakec.

¹⁷ Kaŋul luemaritai kaurikec naka isasedotin kwape ajaatar ikekia luka lukapapaakec, ka Ilebin ageun ka luka ikar akaisaarei ka adepar, kaswamukec kwape ajaatar abeanakinetakec;

¹⁸ka ŋul luemaritai kaurikec naka ludidikikec, ka aŋorokec, ka ikecedwe lusap ka lupesur, anatar ekodet kere: naarai kaswamukec kitalaunos bonik kalaunit.

¹⁹ Ido lukodwe luka Aaron isasedotin, luajaas omanikoria luka ironyia luka ireriakec, kaŋolire kere, ajaas ituŋa luabilitai ikiroriakec, ainakin akorakineta mama ejaas lukiliok kere kosasedotin, ka ŋul kere luemaritai kaurikec koLebin.

²⁰ Kiswama Kesekia kwaŋin anatar Yuda kere; kiswama nuejok ka nuedolito ka numunon kakonyen nuka EJAKAIT Ekedeke.

²¹ Kaŋiniswam kere naegeuni kaijaanakin naka etogo loka Edeke, kokisila, kaicorakineta da, amoot Ekedeke, kiswama keketau kere, kisirereŋitoi.