Read Ebaibuli 1961 2 Aisiltonokin 6 Bible Online

2 Aisiltonokin 6 - Ebaibuli 1961 bible

2 Aisiltonokin 6

¹ Kosodi Solomon einer atiar, “Abala EJAKAIT ebe iboienenei ŋesi kamuton naejesi ŋaŋ.

²Konye abu eoŋ kadukok jo etogo loiboionono, ka aibois naiboieneno ijo ikar kere.”

³Kibelokin ekabaka, kilipak ekodet kere loka Isirael arereŋ: kobwo da ekodet kere loka Isirael.

⁴Kotema ŋesi atiar, “Kituritete EJAKAIT, Edeke loka Isirael, loabu kiner kakeituk mama ejai Daudi papaka, ido kitodol da kakekanin ebe,

⁵ageun kapaaran naketolomunia ikatuŋa kakwap nako Misiri, mam abu kaseu ere katekerin kere nuka Isirael aiduk etogo, tetere ejaun nen ekakiror: kwabo mam abu kaseu etuŋanan araun lokapolon loka ikatuŋa Isirael.

⁶ Konye abu kaseu Yerusalem, tetere ejaun nen ekakiror; abu kaseu Daudi da apolokin ikatuŋa Isirael.

⁷ Abu Daudi papaka koomite kotauke adukokin ekiror loka EJAKAIT, Edeke loka Isirael, etogo.

⁸ Konye abu EJAKAIT kotema Daudi papaka atiar, ‘Naarai iwomit ijo kotaukon adukokin ekakiror etogo, iswama ejok aomit kotaukon:

⁹konye mam jo iduki etogo; konye okokukon, loelomuni kakuanakon, ŋes edukokini ekakiror etogo.’

¹⁰Etodol EJAKAIT akekirot naabu kiner; naarai anyou eoŋ aibois naka Daudi papaka, eboikini oicoloŋ loka Isirael, kwape esumunia EJAKAIT, adukok ekiror loka EJAKAIT, Edeke loka Isirael, etogo.

¹¹ Nepenen da ebwaik asaduku, naejai aitutuket naka EJAKAIT kotomake, naetutuki ŋesi kidwe luka Isirael.”

¹² Kobwo ŋesi koiŋaren ketem loka EJAKAIT kakonyen nuka ekodet kere loka Isirael, korio akekanin kuju:

¹³(Naarai abu Solomon kiswamau abwois naka aisinit, naeoj ikubitin ikany, alalauke ikubitin ikany, amukururuke ikubitin iuni, kosipok kidiŋ alaro; kobwo kokujuke, kokukokin kakuninike kakonyen nuka ekodet kere loka Isirael, korio akekanin kuju:)

¹⁴ Kotema ŋesi atiar, “Wu EJAKAIT, Edeke loka Isirael, emamei Edeke loiputosi kajo, toma akuj arai kakwap; loitodolenenei aitutuket ka aitim kikonikejaanakinak, luelosenenete kakonyenekon kikecetauon kere:

¹⁵ loitodolik ekonikejaanakinan Daudi papaka ŋun nuibu kisumun: eebo, ibu kiner kaitukukon, itodolo da kakanikon, kwape ejaatar lolo.

¹⁶ Aso do, wu EJAKAIT, Edeke loka Isirael, kitodolik ekonikejaanakinan Daudi papaka, nuibu kisumun, ebe, ‘Mam kimamikini ijo etuŋanan loiboikin oicoloŋ loka Isirael kakonyeneka; arai kito ecoito ikonidwe ekecerot, alosenen okisilaka kwape ilosenenoo ijo kakonyeneka.’

¹⁷Aso do, wu EJAKAIT, Edeke loka Isirael, kitogogoŋoi akonikirot, nakilimokini ekonikejaanakinan Daudi.

¹⁸ “Konye iboie kereka Edeke abeit kituŋa kakwap? Koany, mam epedori akuj, ka akuj naka akuj ailosikin jo; ido konyet etogo lo loadukit eoŋ ŋes bo inyo!

¹⁹Konye kocam ijo ailip naka ekonikejaanakinan, ka aiŋaiŋake, wu EJAKAIT Ekadeke, akiirar aimony ka ailip nailipi ekonikejaanakinan kakonyenekon:

²⁰ kokwenyenenete akonikonyen asesen etogo lo apaaran ka akuare, ŋes aibois nakolo ilimit ebe ibwaikini nen ekonikiror; akiirar ailip nailipi ekonikejaanakinan kaibois kana.

²¹ Kiiraranari da aiŋaiŋa naka ekonikejaanakinan, ka naka ikonituŋa Isirael, nailipenenata kesi kaibois kana: eebo, kiiranari ijo kaiboisikon, ŋes akuj; ido naipupununio, kisionie.

²²“Arai kediak etuŋanan kama ejai eidunyeteke, kisiyapoikinoi ŋes aiyaposit, ebuni ŋesi aiyapo keiŋaren ketemukon togo lo:

²³ kopupununei do ijo ijai toma akuj, kiswama, kotubok ikonikejaanakinak, kitokokol ikaronon, aitoboŋikin ekepone akouke; kitojok da ikadoliton, ainakin ŋes kwape ejaar adoliteke.

²⁴ “Naedanyere ikonituŋa Isirael kakonyen nuka lukasurup, naarai adiakasi kamakon; arai kibelokinos bobo, kolimorete ekonikiror, ilipete kiŋaiŋaete kakonyenekon kotogo kalo:

²⁵kopupununei do ijo ijai toma akuj, kisionie aronis naka ikonituŋa Isirael, kinyaku kes bobo akwap nakiinakinit kes ka lukapapaakec.

²⁶ “Naegolokinere akuj, komamei akiru, naarai adiakasi kamakon; arai ilipete kiteete aibois na, kolimorete ekonikiror, kibelokinos anyoun karonisikec nakiticania ijo kes:

²⁷ kopupununei do ijo ijai toma akuj, kisionie aronis naka ikonikejaanakinak, ka naka ikonituŋa Isirael, nakisisianakinia ijo kes erot loejok loibusakinit kes aloseneno: kitetep akiru akwapukon, naibu koinak ikonituŋa araun airumet.

²⁸ “Arai kejaun ebeli kakwap, arai kejaun atular, arai kejaun ekure arai airouroun, emaase, arai ekutelek; arai kirigaunito lukasurupokec kakwap naka ireriakec; ŋinitular kere arai ŋinidek naejaunor;

²⁹ŋiniilip ka niniinaina kere nailipi ituŋanan kere, arai ikonituŋa Isirael kere, yenejeni ŋinituŋanan atularike ka aburunike, korio akekanin mama ejai etogo lo:

³⁰ kopupununei do ijo ijai toma akuj aiboisikon, kisionie, koropi ŋinituŋanan kwape ejaatar iponesioke kere, yenijeni ijo etauke; (naarai ijo, ijo bon, ijeni itauon luka idwe luka ituŋa:)

³¹tetere kiyoŋete jo, alosenen korotinikon apaarasia kere nuiboienenoto kesi kakwap nakiinakinit lukapapaakosi.

³² “Bobo da nuka imoit, yenimere yenika ikonituŋa Isirael, naebunio ŋesi kakwap naelwana kanuka ekonikiror loepol, ka akonikan nakagogoŋ, ka akonikan naerioro: naeponiata kesi ilipete kiteete etogo lo:

³³kopupununei do ijo ijai toma akuj, ŋes aiboisikon, kiswama kwape ejaatar kere nukiworoi imoit jo; tetere ejenunete ituŋasinei kere luka akwap ekonikiror, koyoŋito jo, kwape kiyoŋitotor ikonituŋa Isirael, tetere ejenunete da ebe emaikinitai etogo lo loadukit eoŋ ekonikiror.

³⁴“Arai kelomasi ituŋakon aitiji lukasurupokec, korot kere loijukari ijo kes, kilipete mama ijai kiteete ere lo lokiseuni ijo, ka etogo loadukokinit eoŋ ekonikiror;

³⁵kopupununei do ijo ijai toma akui akeceilip ka akeceiŋaiŋa, kisigalik akecekirot.

³⁶ “Arai kediakasi kamakon, (naarai emamei ituŋanan yenimam ediakari,) inyunyurikini ijo kes, ijaikini kes lukasurupokec, tetere ijoreorete kes akwap naelwana arai naeapie;

³⁷ arai do keomoomata kesi kakwap naejoreoritai, kibelokinos bobo, kiŋaiŋaata ijo kakwap naejoreoritai ebe, ‘Kidiaka isio, kiswama nukepali, kikwaik erono’;

³⁸ arai keboŋut mama ijai ijo kikecetauon kere, kaijarakec kere, kakwap naka aijoreoriokec, kama kijoreoritai, kilipete kiteete akwapukec, nakiinakinit lukapapaakec, ka ere lokiseuni ijo, ka etogo loadukokinit eoŋ ekonikiror:

³⁹kopupununei do ijo ijai toma akuj, ŋes aiboisikon, akeceilip ka akeceiŋaiŋa, kisigalik akecekirot; kisionie ikonituŋa luapotu kodiakasi kamakon.

⁴⁰Wu Ekadeke, keŋaiŋait, kokwenyenenete akonikonye, kitoik da akoniki ailip nailipitai kaibois kana.

⁴¹ “Aso do, wu EJAKAIT Edeke, konyou, koloma aiboisikon naka aiyeŋun, ijo, ka asaduku naka akonigogoŋ. Wu EJAKAIT Edeke, konapitos isasedotinikon aitajario, kiyalamikis lukalaunakakon ajokis.

⁴² Wu EJAKAIT Edeke, sirikibelok akonyen nuka lokinyonyoikinitonokon akinyet! kiitu aitim naka Daudi ekonikejaanakinan.”