Read Ebaibuli 1961 2 Aisiltonokin 7 Bible Online

2 Aisiltonokin 7 - Ebaibuli 1961 bible

2 Aisiltonokin 7

¹ Kedau Solomon ailip, kobu akim kakuj, kicwe ainakinet naicweio ka asuban; kilelebun aibuses naka EJAKAIT togo.

² Mam apedorete isase dotin alomar togo loka EJAKAIT, naarai kilelebun aibuses naka EJAKAIT togo loka EJAKAIT.

³ Kosesenata idwe kere luka Isirael, naabunio akim, kojaun aibuses naka EJAKAIT togo; kokukumoto, kituluroto akecekonyen kwap neitutuitoi, komaata, kimalata EJAKAIT ebe, “Naarai ejok; naarai ejaenena akeitim ikar kere.”

⁴ Kosodi ekabaka ka ituŋa kere ainakin asuban kakonyen nuka EJAKAIT.

⁵Abu ekabaka Solomon koinak asuban imoŋin ilukumin akaisaarei ka luarei, ka imerekekin ilukumin akwatat ka ilukumin akaisaarei, Kwaŋin kotiaku ekabaka ka ituŋa kere etogo loka Edeke.

⁶ Kobwaata isasedotin, kwape ejaar aswamukec; Ilebin da, ejaas kiboro lueruos luka EJAKAIT, luabu Daudi ekabaka kiswamau aimalaa EJAKAIT, naarai ejaenena akeitim ikar kere, nakituritor Daudi kotoma aijaanakinikec; kokuta isasedotin arupepen koiŋarenikec; kobwaata do luka Isirael kere.

⁷ Bobo da kitalau Solomon kidiŋ alaro nakejai kiŋaren ketogo loka EJAKAIT; naarai koinak kanen ainakineta nuicweio, ka asiepai nuka ainakineta nuka ainapakin: naarai mam epedori etem loka aisinit loabu Solomon kiswamau ailosikin ainakinet naicweio, ka ainakinet naka akiria, ka asiepai.

⁸ Kwaŋin kipo Solomon epucit kapak kaŋin adaun apaarasia akanykaarei, ka Isirael kere nepepe kaŋes, ekodet loepol noi, anyoun ka neelomarere Kamat kiton aguurut nako Misiri.

⁹Kapaaran nakikanyetekauni kojaun atukonokin nakayamakin: naarai koricito atiakunio naka etem apaarasia akanykaarei, ka epucit apaarasia akanykaarei.

¹⁰ Kapaaran naka akaisaarei ka nuuni naka elap lokikanyetekaarei kotwara ŋesi ituŋa alosit owemanakec, elelete, kiyalamas kotauon ajokis kere naabu EJAKAIT kitodik Daudi, ka Solomon, ka Isirael iketuŋa.

¹¹ Kwaŋin kodau Solomon etogo loka EJAKAIT, ka etogo loka ekabaka: kokeriana Solomon aiswamaun kere nualomakinete otauke aiswamakin togo loka EJAKAIT, ka togoke da.

¹² Kitaanyikin EJAKAIT Solomon kuare, kotema ŋes atiar, “Eira eoŋ ailipikon, aseu aibois na araun ekatogo loka asuban.

¹³ Arai kagol eoŋ akuj komam ejaun akiru, arai ecorakini emaase ainyam akwap, arai kejuka atular otuŋaka;

¹⁴ arai kitasonikinos ikatuŋa luemaikinitai ekakiror, kilipete, komoete akakonyen, kibelokinos anyoun koponesiokec lukaronok; kasodi do eoŋ apupokin kes kajai toma akuj, esionie kes aronisikec, etaŋaleuni da akwapukec.

¹⁵ Ekwenyunete do akakonyen, etoikini akaki ailip nailipeneneo kaibois kana.

¹⁶ Naarai aseu eoŋ etogo lo, etalau da, tetere ejaunun nen ekakiror ikar kere: ejaununos neo akakonye ka etauka tiritir.

¹⁷ Ka jo da arai ilosenenei kakonyeneka kwape alosenenoo Daudi papakon, iswamaenenei kwape ejaatar kere nukecorak jo, iricenenei ikakisila ka itubesiaka;

¹⁸ kasodi eoŋ aiticat eicoloŋ loka ajakanutukon, kwape ketutukio kaDaudi papakon ebe, ‘Mam kimamikini ijo etuŋanan araun ekayaiton loka Isirael.’

¹⁹ “Konye arai kipaasi yesi, kojalata ikakisila ka aicorakinetaka nuebwaikinit kakonyenekus, kolototo aijaanakin idekesio ice, komaata kes:

²⁰ kasodi eoŋ arutuni kes kaliasiokec kakwapuka naabu kainak kes; acakari etogo lo, laetalauni kanuka ekakiror, kakonyeneka, etarauni ŋes awarag ka amorosit kotuŋa kere.

²¹ Etogo lo da, lotii etia nen, eumokini ŋinituŋanan yenitori, kobala ebe, ‘Kanukinyo eswamakinia EJAKAIT akwap na kwaŋin, ka etogo lo da?’

²² Eboŋokinete do ebe, ‘Naarai apatu kojalata EJAKAIT, Edeke loka lukapapaakec, lokitolomuni kes kakwap nako Misiri, korokut icedekesio, komaata kes kijaanakis kes: kanuka ŋun ŋes ainunia kes aronis na kere.’ ”