Read Ebaibuli 1961 2 Aisiltonokin 9 Bible Online

2 Aisiltonokin 9 - Ebaibuli 1961 bible

2 Aisiltonokin 9

¹ Kosodi kepupu akabaka naka Seba eemut loka Solomon, kobu Yerusalem aitem Solomon kaiŋiseta nuetioko, kojaas kituŋa luipu noi, ka akaalai nuebwokito lueur maa, ka esabu loepol noi, ka amor nuka akais nuipu: kosodi kodolu ŋesi neejai Solomon, kolimok ŋes akiro kere nukejaas otauke.

²Kitejenu Solomon akiro kere nukiŋisit ŋesi: amamei akirot naaponi kimunonikinai Solomon namam kitejenunit ŋes.

³Kedau akabaka naka Seba aanyun acoa naka Solomon, ka etogo lokeduki,

⁴inyamat da lukomesake, ka eiboie loka ikebulesin, ka aijaanakin naka ikekejaanakinak, ka ikecenapen; ka ikekaliak da, ka ikecenapen; ka eititiriake lokedokanaria togo loka EJAKAIT; kimwokolikin eketau.

⁵Kotema ŋesi ekabaka atiar, “Akirot naabu kapupunite kakwapuka kerai nakabeit naka aswamisiokon, ka akonicoa da.

⁶Kwabo mam abu keyu akirokec, aitodol naabunio, koanyut akakonye: ido koany, mam kalimokinitai atutubet naka apolou naka acoakon: itelekar eemut loabu keira.

⁷Elakara ikonituŋa, elakara da ikonikejaanakinak lu, luebwoenenete tiritir kakonyenekon, kopupete akonicoa.

⁸ Kituritete EJAKAIT Ekonideke, loeyalamikin kanukon, adakakin jo oicoloŋoke, araun ekabaka loka EJAKAIT Ekonideke: naarai abu Ekonideke komina Isirael, aiticat kes ikar kere, ŋes kituluoria jo ekabakakec, aiswamaenen nukabeit ka nuedolito.”

⁹Koinak ŋesi ekabaka atalatan akwatat ka akaisaarei nuka esabu, ka lueur maa luipu noi, ka amor nuka akais nuipu: mam eanyuna bobo lueur maa lueriakas kaŋul luainakini akabaka naka Seba ekabaka Solomon.

¹⁰ Ibulesin da luka Kuram, ka ibulesin luka Solomon lukeyaununete esabu koOpir, koyaut da ikito lukajokak ka amor nuka akais nuipu.

¹¹Abu ekabaka kiswamau itutio luka etogo loka EJAKAIT, ka luka etogo loka ekabaka, ka adeudeun ka isabulin luka ikayook: mam apeŋo eanyuna lueputos kaŋul kakwap nako Yuda.

¹²Kosodi ekabaka Solomon ainakin akabaka naka Seba iboro kere lukipuda ŋesi, ŋinibore kere yenikilipi, adepar luabu ŋesi koinu ekabaka. Kwaŋin kibelokin do, koboŋo ŋesi akwapuke, ka ikekejaanakinak.

¹³Alaŋiru naka esabu loainunitai Solomon kokaru ediopet kerai atalatan akwat akanykape ka akaisakanykape ka nukanykape nuka esabu;

¹⁴ adepar luainunete ikemutunok ka ikagwelanarak; apotu ikabakan kere luka Arabia ka ikayaitok luka akwap koinut Solomon esabu ka epuesa.

¹⁵Kiswamau ekabaka Solomon ibukui lukapolok akwat aarei luka esabu loerukuk: ŋolibuku lokapolon abu koya isekelin akwat akanykape luka esabu loerukuk.

¹⁶Kiswamau ŋesi ibukui akwat auni luka esabu loerukuk; ŋolibuku abu koya isekelin akwat auni luka esabu: kibwaik ekabaka kes togo loka ikito luka Lebanon.

¹⁷Bobo da kiswamau ekabaka eicoloŋ lokapolon loka ikel luka etom, kiladaa ŋes kesabu loelai.

¹⁸Kejaas adoketa akanykape oicoloŋ, kojai da iicoloŋ yenika akeje yenika esabu, yenirotakinio keicoloŋ, kejaas akanin epuai kepuai kaibois neiboiere, ka iŋatunyo iarei luabwoete kawaitin nuka akanin.

¹⁹Kobwaata iŋatunyo itomon ka luarei epuai kepuai kadoketa akanykape; amamei loaputos kaŋol kajakanut kere.

²⁰Iboro kere Jumaset luka ekabaka Solomon keraas luka esabu, ka iboro kere lukotogo loka ikito luka Lebanon keraas luka esabu loelai: mam epuesa apodoi araut ibore kapaarasia nuka Solomon.

²¹ Naarai kejaas ekabaka ameerin nualosenenete Tarusis nepepe kibulesin luka Kuram: apotu ameerin nuka Tarusis kopotu atipet ŋulukar iuni, koyaut esabu, ka epuesa, ka ikel luka etom, ka icomion, ka akweny nuajaas ikorio lukijesesinei luipu.

²² Kwaŋin kiteleka ekabaka Solomon ikabakan kere luka akwap kabar ka acoa.

²³Komoata ikabakan kere luka akwapin aanyun Solomon, akiirar acoake, nakibwaikinit Edeke otauke.

²⁴ Koinununete kesi ninlrunanan ainakineteke, iboro luka epuesa, ka iboro luka esabu, ka inapen, ka lujiis, ka lueur maa, ka ibalasin ka inyubun, esolo loka ŋolikaru.

²⁵ Kejaas Solomon aiboisio alukumin aoŋon nuka ibalasin ka agalin, ka ikebwanenok ilukumin itomon ka luarei, lukibwaikinit oreria luka agalin, ka Yerusalem da nekejai ekabaka.

²⁶ Kirum ŋesi ikabakan kere anyoun koCor kiton akwap naka Ipilisitian, kiton oikor loko Misiri.

²⁷ Kitarau ekabaka epuesa araut bala amor koYerusalem, kitarau iresia da bala ikito luka isukumorin luejaas apuutona, kanuka aipues.

²⁸ Koinununai Solomon ibalasin koMisiri ka akwapin kere.

²⁹ Aswamisio ace nuka Solomon, nusodit ka nukawasia mam kereka iwadikatai kakiro nuka Natan enabi, ka adwaranut naka Akiya Esilonit, ka aitapoeta nuka Ido ekadwaran nuka Yeroboam okoku loka Nebat?

³⁰ Kirumak Solomon Isirael kere ko Yerusalem ikar akaisaoŋon.

³¹Kojotoor Solomon kalukapapaake, kidaikinai ore loka Daudi papake: kirum Rekoboam okokuke aiboisike.