Read Ebaibuli 1961 Esera 10 Bible Online

Esera 10 - Ebaibuli 1961 bible

Esera 10

¹ Napilipi Esera, elimori, emonyi akiyo, isudedei koiŋaren ketogo loka Edeke, kotukokinos neajai ŋesi koIsirael ekodet loepol noi loka ikiliok ka aŋor ka idwe: naarai apotu ituŋa komonyata noi akiyo.

² Koboŋok Sekania okoku loka Yekiel, ediopet kodwe luka Elam, kotema Esera atiar, “Kibuca kama ejai Edekewok, aimany aŋor numo nuka atekerin nuka akwap: konye kwape kwana ejai amunonut neejai Isirael kanuka ŋun.

³ Aso do ketutukoto aitutuket ka Edekewok aireŋear aŋor kere, ka lueurito kesi, kwape ejaar ainerun naka ejakaitika, ka ŋul luemaranete toma aicorakinet naka Edekewok, ido kiswamaunai kwape ejaar ekisil.

⁴ Konyou; naarai akirot ŋin nakon, isio da kija kajo; kicata, kiswama.”

⁵ Kosodi Esera anyoun, kisiyapo ijaka luka isasedotin, ka lebin, ka Isirael kere, ebe kiswamaenenete kwape ejaar akirot ŋin. Kiyapoto do.

⁶ Kosodi Esera anyoun koiŋaren ketogo loka Edeke, koloma agola naka Yekokanan okoku loka Eliasib: kedolo, mam abu konyam atap, karaida aimat akipi: naarai abu kokadak kanuka aibucar naka ŋul kaluka aijoreorio.

⁷Aponi kolimoroi anatar Yuda ka Yerusalem, mama ejaas idwe kere luka aijoreorio, kotukonokinos Yerusalem;

⁸ Ido yenimam ebuni toma apak naka apaarasia auni, kwape ejaar ainerun naka ikapolok ka imakio, kotwania ikeboro kere, ka ŋes elopet kogelarai kokodet loka aijoreorio.

⁹ Kosodete ituŋa kere luka Yuda ka Benyamin kotukonokinos Yerusalem kotoma apaarasia auni; kerai elap lokikanyetekaoŋon, kapaaran naka akaisaarei naka elap: kiboikinos ituŋa kere aibois naelal koiŋaren ketogo loka Edeke, komaranete kanuka akirot kaŋin, kanuka akiru da naapol noi.

¹⁰Kobwo Esera esasedoti kolimok kes ebe, “Ipotu kibucasi komanya aŋor numo, kosodete aiyatakin adiakar koIsirael.

¹¹ Aso do kolimosi mama ejai EJAKAIT, Edeke loka lukapapaakus, kiswamata nuitojokit ŋesi: kogitaros katekerin nuka akwap, ka aŋor numo da.”

¹²Kosodi ekodet kere aboŋokin keporoto loepol ebe, “Kwape inerar ijo akirokosi, kwape kwaŋin kibusakinitor aswam.

¹³Konye ipu ituŋa, ido ŋes apak naka akiru naepol, mam kipedori aibwo kokiŋa, ido na mere ŋes aswam naka apaaran adiopet arai aarei: naarai kibuca noi kakirot kana.

¹⁴ Aso koseunai ikapolokokosi kokodet kere, ka ŋul kere luejaas toma oreriakosi luemanyito aŋor numo kopotu kapakio nueseunitai, ido nepepe kaŋul, imakio luka ŋolire, ka ikatubokoke, aitodol neibelokinor anyunyura naededeŋ naka Edekewok anyoun kamawok, aitodol naedaunor akirot ŋin.”

¹⁵Konye kobwaata Yonatan okoku loka Asakel ka Yaseia okoku loka Tikuba aiŋer akirot na: kigaŋakis kes Mesulam ka Sabetai Elebit.

¹⁶Kiswamata idwe luka aijoreorio kwaŋin. Kotiakunai Esera esasedoti, ka ice kokapolok luka ikekia luka lukapapaakec, kwape ajaatar ikekia luka lukapapaakec, kes kere ebilitai ikecekiroria; kiboikinos kapaaran nasodit naka elap lokitomonet aiŋic akirot ŋin.

¹⁷Kodautu akiro nuka ikiliok kere luamanyito aŋor numo koroko apaaran nasodit naka elap losodit etuboro.

¹⁸ Kotakanut kodwe luka isasedotin luamanyito aŋor numo: kodwe luka Yesua, okoku loka Yosadak, ka iinacanake, Maaseia, ka Elieser, ka Yarib, ka Gedalia.

¹⁹ Apotu koriosi akecekanin kwape ireŋeariata do akeceŋor; ido naarai agwaunito akiro, koinakis emerekek lokosipan kanuka agwaunikec.

²⁰Kodwe luka Imer; Kanani ka Sebadia.

²¹Kodwe luka Karim; Maaseia, ka Eliya, ka Semaia, ka Yekiel, ka Usia.

²²Kodwe luka Pasur; Elioenai, Maaseia, Isimael, Netanel, Yosabad, ka Elasa.

²³KoLebin; Yosabad, ka Simei, ka Kelaia (ŋes ŋol Kelita), Petakia, Yuda ka Elieser.

²⁴Kokayook: Eliasib: kokagolok; Salum, ka Telem, ka Uri.

²⁵ KoIsirael: kodwe luka Paros; Ramia, ka Isia, ka Malakiya, ka Miyamin, ka Eleasar, ka Malakiya, ka Benaia.

²⁶Kodwe luka Elam; Matania, ka Sekaria, ka Yekiel, ka Abidi, ka Yeremot, ka Eliya.

²⁷ Kodwe luka Satu; Elioenai, Eliasib, Matania, ka Yeremot, ka Sabad, ka Asisa.

²⁸Kodwe luka Bebai; Yekokanan, Kanania, Sabai, Atalai.

²⁹Kodwe luka Bani; Mesulam, ka Maluk, ka Adaia, ka Yasub, ka Seal, ka Yeremot.

³⁰Kodwe luka Pakat-moab; Adana ka Kelal, ka Benaia, ka Maaseia, ka Matania, ka Besalel, ka Binui, ka Manase.

³¹ Kodwe luka Karim; Elieser, ka Isiya, ka Malakiya, ka. Semaia, ka Simeon;

³²Benyamin, ka Maluk, ka Semaria.

³³Kodwe luka Kasum; Matenai, ka Matata, ka Sabad, ka Elipelet, ka Yeremai, ka Manase, ka Simei.

³⁴Kodwe luka Bani; Maadai, ka Amuram, ka Uel;

³⁵Benaia, ka Bedeia, ka Keluki;

³⁶Bania, ka Meremot, ka Eliasib;

³⁷Matania, ka Matenai, ka Yaasu;

³⁸ka Bani, ka Binui, ka Simei,

³⁹ka Selemia, ka Natan, ka Adaia;

⁴⁰Makanadebai, ka Sasai, ka Sarai;

⁴¹Asarel, ka Selemia, ka Semaria;

⁴²Salum, ka Amaria, ka Yosep.

⁴³ Kodwe luka Nebo; Yeiel, ka Matitia, ka Sabad, ka Sebina, ka Ido, ka Yoel, ka Benaia.

⁴⁴ Ŋul kere amanyito aŋor numo; ajaas ice kakesi aŋor nuauritotor idwe.