Read Ebaibuli 1961 Esera 3 Bible Online

Esera 3 - Ebaibuli 1961 bible

Esera 3

¹Nakedolio elap lokikanyetekaarei, kojaas idwe luka Isirael oreria lukapolok, kotukonokinos ituŋa ketau ediopet Yerusalem.

² Kosodi kobwo Yesua okoku loka Yosadak, ka ikeinacan isasedotin, ka Serubabel okoku loka Sealutiel, ka ikeinacan, kodukoto etem loka Edeke loka Isirael, ainanakinia kanen ainakineta nuicweio, kwape kiwadikatere kokisila luka Musa etuŋanan loka Edeke.

³ Kosipokis etem aiboisike; naarai akuriaka kesi ituŋa luka akwapin kaŋun: koinanakis kanen ainakineta nuicweio neejai EJAKAIT, ainakineta nuicweio tupuruc ka eboŋ.

⁴ Koricata epucit loka iswamin, kwape kiwadikatere, koinakis ainakineta nuicweio nuka ŋinipaaran kwape ejaar etiaikec, kwape ejaar aicorakinet, kwape ibusakinitor ŋinipaaran;

⁵ kokau ainakinet naicweio natir, ka ainakineta nuka nailamununia elap, ka nuka ipucino kere luka EJAKAIT luecorakinitai luatiakunitai, ka nuka ŋinituŋanan yenabu koinak atai ainakinet naka akot neejai EJAKAIT.

⁶Apaaran nasodit naka elap lokikanyetekaarei ŋes ageuniata ainakin ainakineta nuicweio neejai EJAKAIT: konye koriŋa kesipokina apeteta nuka eyekalu loka EJAKAIT.

⁷ Koinakis da ikadukok ka ikekeok apesan; ka lunyaman ka lumatan ka akinyet neejaas luko Sidon, ka luko Turo, alemun iresia koLebanon ayaun kiton aŋolol kiton Yopa, kwape kejaar aeamakinet naka Kuro ekabaka loko Perusia.

⁸ Kosodi kokaru lokiareit loka aponarekec togo loka Edeke Yerusalem, olap lokiareit, kogeu Serubabel okoku loka Sealutiel, ka Yesua okoku loka Yosadak, ka ice koinacanakec isasedotin ka Ilebin, ka ŋul kere luaboŋunete Yerusalem kaijoreorio; kodakakis Ilebin luadaunitos ikar akaisaarei kadepar, aroanar aswam naka etogo loka EJAKAIT.

⁹ Kosodi kobwo Yesua nepepe kodweke ka ikeinacan, Kadumiel da ka odweke, odwe luka Yuda kere nepepe, aroanar ikeswamak luka etogo loka Edeke: odwe luka Kenadad ka odwekec ka ikeceinacan Ilebin.

¹⁰ Nakibwaikiniata ikadukok apeteta nuka eyekalu loka EJAKAIT, kisibwaata isasedotin enapitos ikecenapen ekapitos arupepen, ka Ilebin odwe luka Asap ekapitos aisinin, aituritor EJAKAIT, kwape kitemonokinitor Daudi ekabaka loka Isirael.

¹¹ Komeanakinos ayoore aiturit ka aimal EJAKAIT ebe, “Naarai ejok ŋesi, naarai ejaenena akeitim ikar kere mama ejai Isirael.” Kikareoto ituŋa kere keporoto loepol, nakituritotor EJAKAIT, naarai ebwaikin apetetait naka etogo loka EJAKAIT.

¹²Konye luipu lukosasedotin ka Ilebin, ka ikapolok luka ikekia, imakio luapotu koanyut etogo losodit, napibwaikinio apetetait naka etogo kalo kakonyenekec, komonyata keporoto loepol; luipu da kikareoto kanuka aiyalama:

¹³komam ituŋa apedorete atiakun eporoto loka ekare kanuka aiyalama ka eporoto loka aimony naka ituŋa; naarai kikareoto ituŋa keporoto loepol, kiirarai ekare kama elwana.