Read Ebaibuli 1961 Esera 6 Bible Online

Esera 6 - Ebaibuli 1961 bible

Esera 6

¹ Kosodi Dario ekabaka aibwaikin ekisil, komoai togo loka iitabon, neeŋadanakinio iboro luka akais nuipu koBabulon.

²Kodumunai anunuket koAkameta, kotogo lokapolon loejai obuku loka Media, aponi kiwadikatete tomake kwanata araut aisiitunet.

³“Kokaru losodit loka Kuro ekabaka, kibwaik Kuro ekabaka ekisil; Kanuka etogo loka Edeke koYerusalem, kodukoi etogo aibois naainanakinere asuban, kopesikinai apeteta kagogoŋ; amukururuke ikubitin akaisakanykape, alalauke ikubitin akaisakanykape;

⁴ ikokoron iuni luka amor nukapolok, ka ekokoro loka akito nukitetiak: kotacakinai etiaikec kotogo loka ekabaka:

⁵ kinyakarai da iboro luka esabu ka luka epuesa luka etogo loka Edeke lualemari Nebukadanesar koyekalu loejai Yerusalem luayauni Babulon, koyaŋaarai bobo oyekalu loejai Yerusalem, ŋinibore aiboisike, ibwaikini kes togo loka Edeke.”

⁶ “Aso do, Tatenai lokebuku loka okekwa juwai, ka Setar-bosenai, ka lukaupakus Iparasakain luejaas okekwa juwai, kogitaros yesi:

⁷kinyeis aswam naka etogo kala loka Edeke; koduk ekayaiton loka Iyudayan ka imakio luka Iyudayan etogo lo loka Edeke aiboisike.

⁸Bobo da ebwaikin ekisil nuiswamakinete imakio lu luka Iyudayan aiduk etogo lo loka Edeke: koinakinai koboro luka ekabaka, ŋes esolo lokokekwa juwai, kotacakinai ituŋa lu kainyikokin, kinyeis aitikokinio.

⁹Iboro da luiburao, imoŋin lutoba, ka imerekekin, ka imerekekin ludidik, araun ainakineta nuicweio mama ejai Edeke loka akuj, akima, ka abalaŋ, ka ebino ka akinyet, kwape ejaananar akirot naka isasedotin luejaas Yerusalem, koinanakinete ŋinipaaran komam aisal.

¹⁰ Tetere einanakinete asuban nuka asakat naeuru saa mama ejai Edeke loka akuj, kilipanakinete aijar naka ekabaka ka naka odweke da.

¹¹ Ebwaik da ekisil ebe, loijulanakini akirot na, koketunai akitoi kotogoke, kodakarai ŋes koenikinai neni korau eketogo ameje.

¹² Edeke da loabu kibwaik ekekiror ŋina isibirori ikabakan kere ka atekerin, luerionorete akecekanin aijulakin akirot, amudiar etogo lo loka Edeke loejai Yerusalem. Eoŋ Dario ebwaik ekisil; kiswamai kainyikokin kere.”

¹³ Kosodi Tatenai, lokebuku lokokekwa juwai, ka Setar-bosenai, ka lukaupakec, naarai ejuku ekabaka Dario, kiswamata kwaŋin kainyikokin kere.

¹⁴ Kodukoto imakio luka Iyudayan kokeriakata da, kanuka aidwar naka Kagai enabi ka Sekaria okoku loka Ido. Kodukoto kodautu, kwape ajaar aicorakinet naka Edeke loka Isirael, kwape ajaar ekisil loka Kuro, ka Dario, ka Aratasasata ekabaka loko Perusia.

¹⁵Kodaun etogo lo kapaaran nakiwuniet naka elap Adar, kokaru lokikanyetekape loka airum naka Dario ekabaka.

¹⁶ Kosodete idwe luka Isirael, ka isasedotin, ka Ilebin, ka luedeuna luka idwe luka aijoreorio, koricata atiakunio naka etogo lo loka Edeke kaiyalama.

¹⁷ Koinakis kanuka atiakunio naka etogo lo loka Edeke, imoŋin lutoba akwatat, imerekekin akwat aarei, imerekekin ludidik akwat aoŋon; ido ikorwa itomon ka luarei araut ainakinet naka adiakaret naka Isirael kere, kwape ajaar etiai loka atekerin nuka Isirael.

¹⁸ Kibwaikis isasedotin katukonokec, ka Ilebin kabeanakinikec, aijaanakin Edeke, loejai Yerusalem; kwape ewadikatere oitabo loka Musa.

¹⁹ Koricata idwe luka aijoreorio aleleŋ kapaaran nakitomonet kaoŋon naka elap losodit.

²⁰ Naarai etesegara isasedotin ka Ilebin; araas kere luasegara: koarata lukaleleŋ kanuka idwe kere luka aijoreorio, ka iinacanakec isasedotin, kanukec da bonik.

²¹ Konyama idwe luka Isirael, luapotu koboŋutu kaijoreorio, ka ŋul da kere luapotu kogitara anyoun kotoma asilianut naka ikapirin luka akwap, amoot EJAKAIT Edeke loka Isirael.

²² Koricata epucit loka imugatin lumam itubuunitoi apaarasia akanykaarei kaiyalama: naarai abu EJAKAIT kisiyalamik kes, abu kijulakinite etau loka ekabaka loka Asuria neejaas, aitogogoŋ akecekanin kaswam naka etogo loka Edeke, Edeke loka Isirael.