Read Ebaibuli 1961 Esera 7 Bible Online

Esera 7 - Ebaibuli 1961 bible

Esera 7

¹ Akaulo kaŋun, kairum naka Aratasasata ekabaka loko Perusia, Esera okoku loka Seraia, okoku loka Asaria, okoku loka Kilikia,

²okoku loka Salum, okoku loka Sadok, okoku loka Akitub,

³okoku loka Amaria, okoku loka Asaria, okoku loka Meraiot,

⁴okoku loka Serakia, okoku loka Usi, okoku loka Buki,

⁵koku loka Abisua, okoku loka Pinekas, okoku loka Eleasar, okoku loka Aaron esasedoti lopeti:

⁶ abu Esera ŋol konyou abunore koBabulon; kerai ŋesi ekewadikan loakapakina kokisila luka Musa luabu EJAKAIT Edeke loka Isirael koinak: koinak ekabaka ŋes kere nuabu kilip, kanuka akan naka EJAKAIT Ekedeke naajai kaŋes.

⁷ Koloto ice kodwe luka Isirael, ka luka isasedotin, ka Ilebin, ka ikayook, ka ikagolok, ka Inetinim, kopotu Yerusalem, kokaru lokikanyetekaarei loka Aratasasata ekabaka.

⁸Kobu ŋesi Yerusalem kolap lokikanyet kokaru lokikanyetekaarei loka ekabaka.

⁹ Naarai kapaaran nasodit naka elap losodit ŋes ageunia ŋesi anyoun koBabulon, kapaaran da nasodit naka elap lokikanyet ŋes adolio Yerusalem, kanuka akan nakajokan naka Ekedeke naajai kaŋes.

¹⁰ Naarai abu Esera kibwaikinite eketau amoot ikisila luka EJAKAIT, ka aiswamaenen da, ka aisisianakin toma Isirael ikisila ka itubesia.

¹¹Na ŋes aikopunet naka ebalua loabu ekabaka Aratasasata koinak Esera esasedoti, ekewadikan, ŋes ekewadikan loka akiro nuka aicorakineta nuka EJAKAIT, ka loka ikisilake mama ejai Isirael.

¹² “Aratasasata, ekabaka loka ikabakan, mama ejai Esera esasedoti, ekewadikan loka ikisila luka Edeke loka akuj, loedolit, ka ace da.

¹³Ebwaikini ekisil, mama ejaas ŋul kere lukotuŋa luka Isirael, ka ikecesasedotin, ka Ilebin, lukotoma ayaetaitika, luekotos alosit Yerusalem kanukec, kouparos kajo.

¹⁴ Naarai kijukarit jo ekabaka ka ikekenerunak ikanykaarei, aiŋitun akiro nuka Yuda ka Yerusalem, kwape ejaatar ikisila luka Edekekon luejaas akanikon;

¹⁵ koyaŋa da epuesa ka esabu, luainakis ekabaka ka ikekenerunak kanukec mama ejai Edeke loka Isirael, loiboienenei koYerusalem.

¹⁶ Epuesa da ka esabu kere loidumuni kobuku kere loko Babulon, nepepe ka ainakineta nuka akot nuka ituŋa ka nuka isasedotin, nuainakinete kanukec kanuka etogo loka Edekekec loejai Yerusalem;

¹⁷ ŋes ibusakinitor ainyikokin noi agwel kiboro kalu imoŋin lutoba, imerekekin, imerekekin ludidik, ka ainakinetakec nuka akiria, ka ainakinetakec numatan, ijaikini kotem loka etogo loka Edekekus loejai Yerusalem.

¹⁸Ŋinibore kere yenitojoki jo ka ikoniinacan aitwasamaa epuesa ka esabu loedeuna, kiswamata kwape ekotor Ekusideke.

¹⁹Iboro da lukiinakinio kanuka aijaanakin nakotogo loka Ekusideke, koinak kakonyen nuka Edeke loka Yerusalem.

²⁰ Ido luipudai kere aiyatakin luibusakinito ainakin kanuka etogo loka Ekonideke, koinak kotogo lokaiŋad loka ekabaka.

²¹ “Eoŋ da, eoŋ Aratasasata ekabaka, ebwaik ekisil mama ejaas ikeŋadak kere luejaas okekwa juwai, nukilipi yes Esera esasedoti, ekewadikan loka ikisila luka Edeke loka akuj, kiswamaenenete kainyikokinit kere.

²²Kiton atalatan akwatat nuka epuesa, ka aitemisio akwatat nuka akima, ka akaalakanya akwatat nuka ebino, ka akaalakanya akwatat nuka akinyet, ka abalaŋ namam ebilunitai etiaike.

²³ Ŋin naecorakinit Edeke loka akui, kiswamaenenete cut kanuka etogo loka Edeke loka akuj; naarai kanukinyo ti kebunokinia anyunyura ayaetait naka ekabaka ka odweke?

²⁴Ido kitejenuni yes nuka isasedotin ka Ilebin, ikayook, ikagolok, Inetinim, arai ikejaanakinak luka etogo kala loka Edeke, timam ibusakinit atubokin kes esolo loka ituŋa, esolo loka iboro, karaida esolo loka ikalotok.

²⁵ “Ijo da Esera, kwape ejaar acoa naka Ekonideke naejai akanikon, koseu ijaka ka ikatubok, luetubonokinete ituŋa kere luejaas okekwa juwai, luejenete kere ikisila luka Ekonideke, ka ŋol da lomam ejeni kisisianakinete ŋes.

²⁶Ido ŋol lomam iyuuni aswam ikisila luka Edekekon, ka ikisila luka ekabaka, korubokin ŋes kainyikokin kere, arai naka aario, arai naka aireŋeario, arai naka ademario luke, arai naka aenio.”

²⁷ Kituritete EJAKAIT, Edeke loka lukapapaawok loebwaiki akirot naetia nen otau loka ekabaka aitubus etogo loka EJAKAIT loejai Yerusalem;

²⁸ loetalala aitim mamaka kakonyen nuka ekabaka, ka ikekenerunak, kakonyen da nuka ikapolok kere lukagogoŋ luka ekabaka. Kagogoŋoor kanuka akan naka EJAKAIT Ekadeke naajai keoŋ, katukok kotoma Isirael ikapolok aupar kaeoŋ.