Read Ebaibuli 1961 Esera 9 Bible Online

Esera 9 - Ebaibuli 1961 bible

Esera 9

¹ Kosodi kedaut aswam akiro ŋun kere, kekunyakis ikapolok eoŋ, kobalasi atiar, “Mam etiakara ituŋa luka Isirael, ka isasedotin ka Ilebin kotuŋa luka akwapin, iswamaete kwape ejaatar italesiakec, luka Ikanaanin, ka Ikitin, ka Iperisin, ka Iyebusin, ka Imonain, ka Imoabin, ka Imisirian, ka Imorain da.

² Naarai emanyete apesurukec, komanyanakinete odwekec da; kwaŋin kinyalinyalun aur nakalaunan katekerin nuka akwapin: eebo, akan naka ikapolok ka ikayaitok ŋes ageiki adiakanar ŋin.”

³ Naapupunio akirot ŋin, kacil anapitoka ka elouka, kenyul itima luka akouka ka lukopenekika, kasala eboie kaumokinit.

⁴ Kotukonokinos neajai kere luamaranete kakiro nuka Edeke loka Isirael, kanuka aidiak naka ŋul kaluejoreoritai; kasala eboie kaumokinit aitodol ainakinet naka eboŋ.

⁵ Kosodi keinakini ainakinet naka eboŋ, kanyou kaisilarika, kociliciluna anapitoka ka elouka; kakukokini kakuŋinika, kariono akakanin mama ejai EJAKAIT Ekadeke;

⁶ kener atiar, “Wu Ekadeke, keruma eoŋ ileic, kekamu aitirir aitonyoun akonyeneka mama ijai, wu Ekadeke: naarai eyatakinos numam adolitekosi adepar akwesikosi, apoloor agwaunitekosi adolo toma akuj.

⁷ Ageun kapaarasia nuka lukapapaakosi kidiakanari akiro nukos kiton lolo; kanuka numam adolitekosi, ŋes kiinakinere sio, ka ikosikabakan, ka isasedotinikosi akanin nuka ikabakan luka akwapin, neejai ekileŋ, ka aijoreorio, ka aŋasio, ka aisurumio da ileic, kwape lolo.

⁸ Kwana da, kapak naeuriana, etodun asianut naebuni kama ejai EJAKAIT Ekosideke, aideikin aatoŋot naaku, kainakini da sio aseitoit kaiboisike nakalaunan, kitacaik Edeke akosikonye, kainakini da adioisikwarunio kobulesenekosi.

⁹ Naarai kirai ibulesin; konye mam Edeke kinyeinit sio kobulesenekosi, konye kiyataki aitimio kakonyen nuka ikabakan luka Perusia, ainakin sio aikwarun, ka aiduk etogo loka Edekekosi, aiteteun da aapoŋoruke, ainakin da sio arwatat koYuda ka Yerusalem.

¹⁰“Aso do, wu Edekekosi, kiŋeri anu akaulo kaŋun? Naarai kipou kenyeis akoniicorakineta,

¹¹nuibu kicorak kama kikonikejaanakinak inabin, ebe, ‘Akwap nailomarete airum, ŋes akwap namam elai kanuka amamus aila naka ituŋa luka akwapin, kanuka italesiakec, luesilelebata asilianutukec epuai kepuai da.

¹² Aso do sirikikorakis akusipesur otelepaikec, karaida amanyanakin ikusitelepai akecepesur, siriikotononos ainapakinikec karaida asulianyikec ikar kere: tetere igogoŋooros, inyamete ajokis naka akwap, inyeiniata ikusidwe araun airumet ikar kere.’

¹³Ido kedautu ŋun adolokin sio kanuka aswamisiokosi nueroko, kanuka agwaun akiro nuepolok, naarai ijo Ekosideke ibu kitican sio kwabo mere kwape ibusakinitor numam adolitekosi, koinak sio aatoŋot kwape na.

¹⁴ Kibili kereka bobo isio aicorakinetakon, karaunos ikamurak luka atekerin nuiswamaete italesia ŋul? Ti mam kinyunyuranakini aitodol nekimudiaria, komamei aatoŋot, karaida luekuete?

¹⁵ Wu EJAKAIT, Edeke loka Isirael, irai ijo loidolit; naarai kisalaki isio kirai aatoŋot naaku, kwape ejaar lolo: koany, kija kakonyenekon kagwaunetekosi; naarai emamei loepedori aibwo kakonyenekon kanuka ŋun.”