Read Ebaibuli 1961 Nekemia 1 Bible Online

Nekemia 1 - Ebaibuli 1961 bible

Nekemia 1

¹ Akiro nuka Nekemia okoku loka Kakalia. Kosodi kanen kolap Kisileb kokaru loka akaisaarei, naajar eoŋ toma Susan togo lokapolou,

²kobu Kanani, ediopet koinacanaka koYuda, ŋes ka icetuŋa; keŋitata nuka Iyudayan kaluakuete, luapotu kosalakinitos toma aijoreorio, ka akiro da nuka Yerusalem.

³ Kabalasi eoŋ ebe, “Aatoŋot naasalakinit kotoma aijoreorio ŋina obuku aanyut ican luipu ka amoromoroo: ido abilibilun arwatat naka Yerusalem, iruteike da ecwei kakim.”

⁴Kosodi kanen, keira akiro ŋun, keboikin kamony akiyo, kebwor da apaarasia ace; kaluŋ kelip kakonyen nuka Edeke loka akuj,

⁵ kenera da atiar, “Keŋaiŋait jo, wu EJAKAIT, Edeke loka akuj, Edeke lokapolon lokaŋosibib, loericit aitutuket ka aitim mama kaŋul kalueminas ka aricit da akeicorakineta:

⁶ kiira kakonikit, akonikonye da kokwenyut, kiira ailip naka ekonikejaanakinan, naelipit kakonyenekon kapak kana, apaaran ka akuare da, kanuka ikonikejaanakinak idwe luka Isirael, alimori aronisio nuka idwe luka Isirael, nukidiakana kamakon: eebo, kidiaka eoŋ ka ekek loka papaka.

⁷ Kipou keswamata nukasilianut kamakon, kwabo mam kipou karicata aicorakineta, karaida ikisila, karaida itubesia, luibu kicorak ekonikejaanakinan Musa.

⁸ Keŋaiŋait, kiitu akirot naibu kicorak ekonikejaanakinan Musa kobala ebe, ‘Arai kibucasi yesi, kesiarisiarete cut toma atekerin.

⁹ Konye arai kiboŋut mamaka, koricenenete da akaicorakineta, ka aiswemaenen kes, karaida aponi kireŋearai lukus kiton awasia cut naka akuj, konye atukonokini kes kaŋina, kasodi ayaun toma aibois naabu kaseu aisiroikin nen ekakiror.’

¹⁰ Aso lu kes ikonikejaanakinak, ka ituŋakon, luibu kolaku kakonipedor naepol, kakanikon nakagogoŋ.

¹¹ Wu EJAKAIT, keŋaiŋait, kiira cabo akonikit ailip naka ekonikejaanakinan, ka ailip da naka ikonikejaanakinak luiyalamas aiyoŋ ekonikiror: keŋaiŋait, kisirereŋ lolo ekonikejaanakinan, koinak aitimio kakonyen nuka etuŋanan kalo,” Arai eoŋ ekaliyan loka ekabaka.