Read Ebaibuli 1961 Nekemia 13 Bible Online

Nekemia 13 - Ebaibuli 1961 bible

Nekemia 13

¹ Kapaaran kaŋin kosioma toma oitabo loka Musa kopupete ituŋa kere; kodumut iwadikatai nen ebe mam elomanari Emonait ka Emoabit toma atukot naka Edeke ikar kere.

² Naarai mam apotu kisiriamata idwe luka Isirael ejaas kinyamat ka akipi, konye koropata Baalam aluikin kes, aiken kes: konye kituluo Edeke ekenit araun arereŋ.

³ Kosodi kanen, kedaut apupun ikisila, kosodete atiakar kotoma Isirael erioŋet kere loka imo.

⁴Eroko ŋun keiaikina, abu Eliasib esasedoti loaseunitai apolokin agolai nuka etogo loka Edekewok, naarar ekamuran loka Tobia,

⁵kitemokinite Tobia agola naepol, nelem ibwaanakinete ainakineta nuka akiria, ka lueur maa, ka iboro, ka lukitomoneta luka akima ka ebino ka akinyet, nuainanakinio Elebin, ka kiyaook, ka ikagolok kaicorakinet; ka ainakineta nuikearitai nuka isasedotin.

⁶ Konye kapakio kaŋun kere kamamei eoŋ koYerusalem: naarai kokaru loka akaisauni ka luarei loka Aratasasata ekabaka loka Babulon, abu kalot mama ejai ekabaka, kosodi ketuboros apaarasia keŋitu ekabaka:

⁷kabu Yerusalem, kajenu aronis naabu Eliasib kiswama kanuka Tobia, aitemokin ŋes agola kalaroi nuka etogo loka Edeke.

⁸ Ketakadik eoŋ noi: ŋes ainakin acakar kina iboro kere luka Tobia.

⁹ Kasodi aicorakin, kitesegaasi agolai: kayau do bobo iboro luka etogo loka Edeke, ka ainakineta nuka akiria ka lueur maa.

¹⁰ Kajenu ebe mam aponi koinakinitete Ilebin akorakinetakec; ŋes akeritotor Ilebin ka ikayook lueswamaete aswam, ŋinituŋanan omanikorike.

¹¹ Kasodi ketoron ikayaitok, kabala ebe, “Kanukinyo inyeinere etogo loka Edeke?” Katukonoki kes, kebwaik aiboisiokec.

¹² Kosodete luka Yuda kere ayaun idiopet kotomon yenika akima ka ebino ka akinyet aiŋadisia.

¹³ Kadakak ikedarak aiŋadisia, Selemia esasedoti, ka Sadok ekewadikan, lokoLebin da Pedaia: kotupak kes Kanan okoku loka Sakur, okoku loka Matania: naarai aomitai araut lumunon, aswamukec ŋes akoranakin iinacanakec.

¹⁴ Wu Ekadeke, kiitununei eoŋ kanuka ŋin, ido sirikimwata aswamisioka nuejok nueswamanakini etogo loka Ekadeke, ka aijaanakinike.

¹⁵ Kapaarasia kaŋun abu kaany kotoma Yuda ituŋa luepudapudaete acueta kapaaran nakasabato, kitolomete da ikes, kibwaanakinete iboro asigiriakec: ebino da, imusabibun, ka itinin, ka abwokon nuka iponesio kere, lukitolomete Yerusalem kapaaran nakasabato: karaun ekajenan kamakec kapaaran naagwelanariata inyamat.

¹⁶Ajaas da ituŋa luka Turo kanen, luetolomete lukecor, ka iboro luka iponesio kere, kitwegelanarete idwe luka Yuda, ko Yerusalem da kapaaran nakasabato.

¹⁷Kasodi ketoron isotia luka Yuda, katema kes atiar, “Aronis anyoin na naiswamaete, amunamun apaaran nakasabato?

¹⁸Mere kwape kwaŋin eswamaete lukapapaakus, Edekewok da mam eyauna aronis na kere mamawok, ka ere lo da? Konye yes iyatakinete ayaun anyunyura toma Isirael kanuka amunamun apaaran nakasabato.”

¹⁹ Kosodi kanen, napikamusi aige nakasabato korutei luka Yerusalem, kecorak aigol ikekia, kecorak da sirikeŋaar aitodol naedaunor nakasabato: kebwaiki ice kokejaanakinakaka aidar irutei, kinyeis aitolomun abwokon kere kapaaran nakasabato.

²⁰Kosodete ikagwelanarak ka ikagwelak luka iboro luka iponesio kere koperoto kiŋa ka Yerusalem irwan atipet arai aarei.

²¹Karaun ekajenan mamakec, kabala kes ebe, “Kanukinyo iperioto yesi airimor arwatat? Arai kiswamata bobo kwaŋin, kaeni yes.” Kosodi ageun kapaaran kaŋin mam bobo apotu kopotu kanakasabato.

²² Kasodi aicorakin Ilebin aitalaun bonik, aponare aidar irutei, aitalaun apaaran nakasabato. Wu Ekadeke, kiitununei eoŋ kanuka ŋin, kitim kwape ejaar akoniitim naepol noi.

²³Kapaarasia kaŋun da abu kaany lyudayan luamanyitos aŋor nuka Asudod, ka nuka Amon, ka nuka Moab:

²⁴kinerasi idwekec da aŋajep nainyalinyala naka Asudod, kwabo mam apedorete einer aŋajep naka Iyudayan, konye kwape ajaar aŋajep naka ŋiniteker.

²⁵ Kasodi ketoron kes, kelamaki da kes, kanaŋanaŋa da ice kakesi, kainyul da ikecetima, kesiyapoik kes kolimito Edeke ebe, “Mam ikoranakinete adwekus odwekec, karaida amanyanakin adwekec odwekus, karaida yes ikulepek.

²⁶ Mam kereka abu Solomon ekabaka loka Isirael kodiak kotoma kaŋun? Konye toma atekerin nuipu mam etakanuna ekabaka loariakatar ŋesi, abu Ekedeke komina ŋes, abu Edeke kitarau ŋes ekabaka loka Isirael kere: konye apotu aŋor numo kitapaasi ŋes.

²⁷ Aso do kopupunoi yes da iswamaete aronis na naepol kere, aibucar mama ejai Edekewok aimany aŋor numo?”

²⁸ Kerai ediopet kodwe luka Yoiada, okoku loka Eliasib esasedoti lopeti ekamuran loka Sanabalat Ekoronit: kanuka ŋun abu kereŋea ŋes kamakaŋ.

²⁹ Wu Ekadeke, kiitununei kes, naarai komunamunata esasedotene, ka aitutuket naka esasedotene, ka naka Ilebin.

³⁰ Kwaŋin abu ketesegaaria kes mama ejaas imo kere, kaseik aijaanakin naka isasedotin ka naka Ilebin, ŋinituŋanan toma aswamuke:

³¹ka ainakinet naka akito, kapaarasia nueseunitai, ka nuka araito nugeet. Wu Ekadeke, kiitununei eoŋ kanuka ajokis.