Read Ebaibuli 1961 Nekemia 2 Bible Online

Nekemia 2 - Ebaibuli 1961 bible

Nekemia 2

¹ Kosodi kanen, kolap Nisan, kokaru loka akaisaarei loka Aratasasata ekabaka, naajaar ebino kakonyeneke, abu kayaŋa ebino, kainak ekabaka. Mam lem kakadanakini kakonyeneke.

² Kabala ekabaka eoŋ atiar, “Inyo bo lolo ekadakinitotor akonikonyen, naarai mam jo ideka? Mam na erai acekirot dimarai akadakinite nakotau.” Kasodi akurianar noi.

³ Kasodi katema ekabaka ebe, “Kobusenenei ekabaka ikar kere: ti inyo kisimiki akakonyen akadakinite, emejeiki ere, aibois naka atesin nuka lukapapaaka, iruteike da ecwei kakim?”

⁴ Kosodi ekabaka atemar eoŋ atiar, “Ilipit inyo?” Kelip do Edeke loka akuj.

⁵Katema eoŋ ekabaka atiar, “Arai kitojok ekabaka, arai edumunit ekonikejaanakinan asianut kakonyenekon, kijukarai Yuda, ore loka atesina nuka lukapapaaka, kaduk.”

⁶ Katema ekabaka eoŋ atiar (eboie akabaka da kidunyas kaŋes), “Erai bo akonilosit naka apaarasia imwaasi ai? Ido iboŋuni wori?” Kitojok ekabaka aijukar eoŋ: ketodik apak.

⁷Bobo da katema ekabaka atiar, “Arai itojokit ekabaka kainakin ibaluan mama ejaas lukibukui lukokekwa juwai, tetere kacamakinio atubor adolore toma Yuda.

⁸ Ka ebalua da mama ejai Asap ekedaran loka amagoro naka ekabaka, tetere kainakini akito aiswamaunia abaoi nuka irutei luka etogo lokagogoŋ loidunyasi etogo, ido nuka arwatat naka ere, nuka etogo da loalomari.” Kiyu ekabaka, kanuka akan nakajokan naka Ekadeke naajai kaeoŋ.

⁹Kasodi abunore mama ejaas lukibukui lukokekwa juwai, kainak kes ibaluan luka ekabaka. Abu ekabaka keyakiarite eoŋ nepepe ka ikapolok luka ajore ka ikebwanenok.

¹⁰Kepuput Sanabalat Ekoronit, ka Tobia ekejaanakinan, Emonait, kokadakis kesi noi, naarai ebunit etuŋanan atamakin aisigalikin idwe luka Isirael.

¹¹ Kasodi abunore Yerusalem, kadau kanen apaarasia auni.

¹²Kanyou kuare, eoŋ nepepe kituŋa luikidioko; ido mam abu kalimok etuŋanan nuabu Ekadeke kibwaik otauka aiswamakin Yerusalem: kwabo amamei ecetiaŋ kere dimarai etiaŋ loebwanenit.

¹³ Kaloma kuare korute loka Aditot, mama ejai Atan naka Apiu, orute da loka Aoret, kasodi aiŋic arwatatin nuka Yerusalem nuebilibilunos, ka iruteike luecwei kakim.

¹⁴ Kasodi aiyatakin neejai erute loka Ecor kiton Atapar naka Ekabaka: konye komameun erot lotikitor etianaka loebwanenit.

¹⁵ Kasodi kadoka kuare kaguurut, aiŋic arwatat; kebelokin, kaloma korute loka Aditot, kabon kwaŋin.

¹⁶Mam ikapolok apotu kojenutu kwape abu kalosio, karaida nuabu keswama; kwabo mam ber alimokinit Iyudayan, karaida isasedotin, karaida isotia, karaida ikayaitok, karaida ice kere lueswamaete.

¹⁷ Kasodi atemar kes atiar, “Ianyutu kwape kijaar erono, kwape emejeikinio Yerusalem, iruteike da icweitere kakim: kopotu kadukoto arwatat naka Yerusalem, kalemasi amorosit na.”

¹⁸ Kalimok kes kwape ejaar akan nakajokan naka Ekadeke keoŋ; ka akiro da nuka ekabaka nuabu kalimok eoŋ. Kobalas ebe, “Kanyoutu, kaduko.” Kosodete kitogogoŋoto akecekanin kanuka aswam ŋin naejok.

¹⁹ Konye kepuput Sanabalat Ekoronit, ka Tobia ekejaanakinan, Emonait, ka Gesem Earabut, kokienatatar sio noi, komwaŋata da, kobalas ebe, “Inyo bo na naiswamaete yesi? Ikotosi aipaliikin ekabaka?”

²⁰ Kasodi kaboŋok kes katema atiar, “Kisirereŋi sio Edeke loka akuj; ŋes kiinakini sio ikekejaanakinak kinyouni aiduk: konye emamei yes ainakinet, karaida apedor, karaida aisiitunet, kotoma Yerusalem.”