Read Ebaibuli 1961 Nekemia 5 Bible Online

Nekemia 5 - Ebaibuli 1961 bible

Nekemia 5

¹ Kosodi kojaun ecelet loepol noi loka ituŋa ka aŋorokec aluikin ikeceinacan Iyudayan.

² Naarai ajaas luabalananas ebe, “Kipu isio, ka idwe kosi lusap ka lupesur: kadumutu akima, kanyama kajara da.”

³Kojaas ice da luabalananas ebe, “Kititiŋaari isio imanikoriakosi, ka amanat nuka emusabibu, ka itogoikosi: kadumutu akima kanuka eteŋei.”

⁴Kojaas da luabalananas ebe, “Kipou kayuunos kapesan nuka esolo loka ekabaka komanikoriakosi ka amanat nuka emusabibu.

⁵ Konye do awatekosi eputosi bala awat nuka iinacanakosi, ka idwekosi kwape idwekec: ido koany, kitubuleseni idwekosi lusap ka lupesur araut ibulesin, ido ace kadwekosi adaut aitubulesenio: ido emamei sio nukiswamai aitikokinia; naarai ejaas icetuŋa kimanikoriakosi ka amanatakosi nuka emusabibu.”

⁶ Kanyunyurikini noi kapup aimonyokec ka akiro ŋun.

⁷ Kasodi keneru bon, kapega kaisotia ka ikayaitok, kabala kes ebe, “Itubonokinete ameda, ŋinituŋanan konaceke.” Katukonok atukonokin naepol.

⁸ Katema kes atiar, “Kipou isio kalakutu kwape kipedoria ikosiinacan Iyudayan, luagwelaritai mama ejaas ikapirin; yes da ikotosi agwelar iinacanakus, ti kereka kigwele isio kes?” Kosodete kesi aililiŋ, mam apotu koboŋokis akirot.

⁹ Katema da atiar, “Akirot naiswamaete yesi mam ejok; mam kereka ti ibusakinit yes alosenen kaiyoŋ Edekewok, kanuka amorosit naka ikapirin lukasurupowok?

¹⁰Eoŋ da, ikainacan ka ikakejaanakinak kiyuuni kes kapesan ka akima kimedaikis. Keŋaiŋait, kenyeis ameda.

¹¹Keŋaiŋait, kinyakakisi lolo kes imanikoriakec, amanatakec nuka emusabibu, amanatakec nuka iseitunin, ka itogoikec, ido idiopet kakwatat yenika apesan, ka yenika akima, ka ebino ka akinyet, luitelemenenete yesi.”

¹² Kosodete kesi atemar atiar, “Kinyakakini isio, komam kitepeseni kes; kiswamai kwaŋin, kwape ibalar.” Kasodi anyaraun isasedotin, kesiyapo kes, ebe iswamaete kwape esumunioto.

¹³ Abu da kelakilak ekagoe kener atiar, “Kilakilakakini Edeke kwaŋin ŋinituŋanan kotogoke, kotoma aswamisioke, yenimam itodolikini aisumunet na; kilakilakakinio kwaŋin, adaun.” Kobala ekodet kere ebe, “Amen.” Kituroto EJAKAIT. Kiswamata do ituŋa kwape esumunioto.

¹⁴ Ido ageun kapak kaŋin nakebwaikinere araun ekayaitonikec kakwap naka Yuda, ageun kokaru loka akaisaarei kiton okaru loka akaisauni ka luarei loka Aratasasata ekabaka, kes ikar itomon ka luarei, eoŋ ka iinacanaka mam kinyamenenei inyamat luka ekayaiton.

¹⁵ Konye ikayaitok lukolo lukageikinete kitelemununete ituŋa lukenyamete, emugati ka ebino, kogelara isekelin akaisaoŋon luka epuesa; eebo, ka ikecekejaanakinak da ayaitos kwaŋin ituŋa: konye eoŋ, mere ŋes naeswamaenenei, kanuka aiyoŋ Edeke.

¹⁶Eebo, abu kadunyak aswam naka arwatat kana, komam kigweli adisilup: kotukonokinos ikakejaanakinak kere kaswam.

¹⁷ Ido kojaananas komesaka luka Iyudayan ka ikayaitok ituŋa akwatat ka akaisakany, kogelara ŋul luapote mama kijaa isio kokapirin lukirimorito sio.

¹⁸ Luepoenenoo luka apaaran adiopet, emoŋ ediopet ka amerekekin akanykape nuseuna; ido kepoonokinio eoŋ da akokoroi, irwan atipet da ŋunupaarasia atomon ebino loka ŋolipone: ido karaida kejaas kwaŋin mam abu ketelem atap naka ekayaiton, naarai kelaŋirikinit ebulesene ituŋa lu.

¹⁹ Wu Ekadeke, kiitu neajai kanuka ajokis, kere nueswamak eoŋ ituŋa lu.