Read Ebaibuli 1961 Nekemia 8 Bible Online

Nekemia 8 - Ebaibuli 1961 bible

Nekemia 8

¹ Kotukonokinos ituŋa kere kwape ediopetuŋanan aibois naelal, naesesenas kerute loka Akipi; kobalasi Esera ekewadikan ayaun eitabo loka ikisila luka Musa, luabu EJAKAIT kicorak Isirael.

² Koyau Esera esasedoti ikisila akonyen nuka atukot, ikiliok ka aŋor da, ka kere luapedorete apupun kajenun, kapaaran nasodit naka elap lokikanyetekaarei.

³Kosiom nu koiŋaren kaibois naelal naesesenas kerute loka Akipi ageun tupuruc sek kiton kidiŋ paaran, kojaas kiliok ka aŋor da, ka ŋul luapedorete ajenun; kitoikis ituŋa kere apupokin eitabo loka ikisila.

⁴Kobwo Esera ekewadikan kotut loka akito, loekeitoi kanuka ŋun; kobwaata Matitia, ka Sema ka Anaia, ka Uria, ka Kilikia, ka Maaseia eiduny kaŋes kakekan nakoteten; kakekan da nakokediany Pedaia, ka Misael, ka Malakiya, ka Kasum, ka Kasabadana, ka Sekaria, ka Mesulam.

⁵ Kopuko Esera eitabo kakonyen nuka ituŋa kere; (naarai ajai kuju kituŋa kere;) kepuko, kobwaata ituŋa kere.

⁶ Kimala Esera EJAKAIT, Edeke lokapolon. Koboŋokis ituŋa kere ebe, “Amen, Amen”; kikianarete akaninikec: kosodete kituluroto akwesikec, komaata EJAKAIT, kitulurito akecekonyen kwap.

⁷ Ido Yesua, ka Bani, ka Serebia, ka Yamin, ka Akub, ka Sabetai, ka Kodia, ka Maaseia, ka Kelita, ka Asaria, ka Yosabad, ka Kanan, ka Pelaia, ka Ilebin, kitejenut ituŋa ikisila; kobwaata ituŋa kaiboisiokec.

⁸ Kosiomata eitabo, toma okisila luka Edeke, nuepuposi; koyautu apolou, kojenunos nuasomio.

⁹ Kosodi Nekemia lokerai Etirusata, ka Esera esasedoti ekewadikan, ka Ilebin luesisianakinete ituŋa atemar ituŋa kere atiar, “Na ŋes apaaran nakalaunan mama ejai EJAKAIT Ekusideke; sirikibworoto, karaida aimony akiyo.” Naarai amonyete ituŋa kere akiyo naapupunioto akiro nuka ikisila.

¹⁰ Kosodi atemar kes atiar, “Koloto, konyamata asiepai, komata luewiny, kijukakis akorakineta ŋin yenimam itemokinitoi ibore: naarai apaaran na nakalaunan mama ejai EJAKAIT iwok: kwabo sirikikadakis; naarai aiyalama naka EJAKAIT ŋes agogonokus.”

¹¹Kisililinata Ilebin ituŋa kere ebe, “Kililiŋata, naarai erai apaaran nakalaunan; kwabo sirikikadakis.”

¹²Kolototo ituŋa kere ainyam ka aimat, ka aijukar akorakineta, kaitalakar naepol noi, naarai ajenutu akiro nualimonokinio kes.

¹³Kapaaran nakiareit da kotukonokinos ikapolok luka ikekia luka lukapapaa luka ituŋa kere, ka isasedotin, ka Ilebin, neejai Esera ekewadikan, aitoikin aki neejaas akiro nuka ikisila.

¹⁴ Koanyut nukiwadikatai okisila, kwape abu EJAKAIT kicorakinia kama ka Musa ebe koperenenete idwe luka Isirael oswamin kopucit loka elap lokikanyetekaarei.

¹⁵Koramenenete kolimonokinete koreriakec kere, ka Yerusalem ebe, “Koloto moru, koomata atenuna nuka eseitun, ka atenuna da nuka eseitun loka ais, ka atenuna nuka ikadasia, ka atenuna nuka idukudukun, ka atenuna nuka ikito luetumito, aiswamaa iswamin, kwape kiwadikatere.”

¹⁶ Kosodete ituŋa alomar, koyaŋaut kes, kiswamata da iswamin, ŋinituŋanan oswi loka etogoke, ka alaroikec, ka alaroi nuka etogo loka Edeke, kaibois da naelal naka erute loka Akipi, kaibois da naelal naka erute loka Epuraim.

¹⁷Kiswamata ekodet loka ŋul kere luaboŋunete kaijoreorio iswamin, kiboikinos oswamin: naarai agear kapaarasia nuka Yesua okoku loka Nun aitodol apaaran ŋin mam idwe luka Isirael eswamaenenete kwaŋin. Kojai ailel naepol noi.

¹⁸ Ido ŋinipaaran, agear kapaaran nasodit aitodol apaaran nakawasia, asiomenenei ŋesi kotoma oitabo loka ikisila luka Edeke. Koricata epucit apaarasia akanykaarei; apaaran nakikanyetekauni kojai atukonokinet nakayamakina, kwape ajaar aicorakinet.