Read Ebaibuli 1961 Esita 1 Bible Online

Esita 1 - Ebaibuli 1961 bible

Esita 1

¹ Kosodi kanen kapaarasia nuka Akasuero, (ŋes Akasuero ŋol loerumit ibukui akwatat ka akaisaarei ka lukanykaarei, anyoun koIndia kiton Etiopia:)

² kapaarasia kaŋun, nakiboikinor ekabaka Akasuero oicoloŋ loka ajakanutuke, loajai Susa togo lokapolou,

³ kokaru lokiwuniet loka airumuke, abu kipoik epucit ikapolokoke kere ka ikekejaanakinak; kojaun apedor naka Perusia ka Media, kes ijaka ka ikapolok luka ibukui akonyeneke:

⁴abu kitodia abar naka akejakanut nakaibuses, ka aiturio naka apolouke naitelekarit, apaarasia nuipu, kes apaarasia akwatat ka akaisakanykauni.

⁵Kosodi ketuboros apaarasia ŋun, abu ekabaka kipoik epucit ituŋa kere luajaas nen Susa togo lokapolou, lukapolok ka ludidik da, apaarasia akanykaarei, kotoma alaro naka emanikor loka etogo lokapolou loka ekabaka:

⁶ ajaas aigalisio nuka egoe loekwaŋ, lopiria, lobululu koenitete kaunoi nuka ebaputa loejok, ka lomuge, kigiluna luka epuesa ka ipirin luka amor nukijesesinei: keraas itutio luka esabu ka epuesa, kamor nukijesesinei nuepesitai nukareŋak, nukakwaŋak, nudos, ka nukirionok da.

⁷Koinakis kes aimat koboro luka esabu, (kogelegela iboro kaputokec,) kepol da noi ebino loka ekabaka, kwape ajaar aikor naka ekabaka.

⁸Aimat da kojai kwape ejaar ekisil; komamei yenepedor aitiŋaikinit: naarai abu ekabaka kicorakinite ikekapolokitok kere lukotogoke kwaŋin, kiswama ŋinituŋanan kwape ekotor.

⁹Abu Basiti da akabaka, kipoik aŋor epucit kotogo loka ekabakane loarai loka ekabaka Akasuero.

¹⁰Kapaaran nakikanyetekaarei, naalakaror etau loka ekabaka kanu ebino, kicorak ŋesi Mekumam, Bisita, Karabona, Bigita, ka Abagata, Setar, ka Karakas, ibwacin ikanykaarei luejaanakinete kakonyen nuka Akasuero ekabaka,

¹¹ ayaun Basiti akabaka kakonyen nuka ekabaka konapite aboko naka ajakanut aitodikin ituŋa ka ikapolok ajokisike: naarai kerai naatemel.

¹²Konye koŋer akabaka Basiti abunore kaicorakinet naka ekabaka kobwacin: ŋes anyunyurikinor noi ekabaka, koresiar da akenyunyura kotomake.

¹³ Kosodi do ekabaka atemar lukacoa, luejenete apakio, (naarai kerai ŋol epone loka ekabaka mama ejaas kere luejenete ikisila ka etube:

¹⁴ kidunyasi Karasena, ka Setar, ka Adamata, ka Tarusis, ka Meres, ka Marasena, ka Memukan, kaŋes, ikapolok ikanykaarei luka Perusia ka Media, luaanyununete akonyen nuka ekabaka, luaraas lusodit kotoma ajakanut:)

¹⁵kotema atiar, “Kekwaikis ai akabaka Basiti kwape ajaar ekisil, naarai mam erimarit ŋin naabu ekabaka Akasuero kicorak kobwacin?”

¹⁶Koboŋok Memukan kakonyen nuka ekabaka ka ikapolok ebe, “Mam akabaka Basiti ediakarit mama ejai ekabaka bon, konye mama ejaas ikapolok kere, ka ituŋa da kere luejaas obulmi kere luka ekabaka Akasuero.

¹⁷Naarai epupunete do aŋor kere aswamisioit na naka akabaka, emwaŋenenete ikecekiliok kakonyenekec naelimitere ebe, ‘Abu ekabaka Akasuero kicorak Basiti akabaka ayaunio kakonyeneke, konye mam ebuno.’

¹⁸Apaaran na da akapolok nuka Perusia ka Media nueiras nuka aswamisioit naka akabaka elimokinete kwaŋin ikapolok kere luka ekabaka, Aso ejaun do emwaŋit loepol ka anyunyura da.

¹⁹Arai kitojok ekabaka, kicorakinai do aicorakinet naka ekabaka, kiwadikai da kokisila luka Iperusian ka Imedian, kinyek ailocio, ebe, ‘Sirikebu bobo Basiti kakonyen nuka ekabaka Akasuero’; koinak ekabaka apolouke naka akabaka ace naitelekarit ŋes ajokis.

²⁰ Kosodi naelimorere ekisil loka ekabaka loelosi ŋesi aisilakin anatar ajakanutuke kere, (naarai epol,) kosodete do aŋor kere ayoŋite ikiliokokec, lukapolok ka ludidik da.”

²¹Kitalaka akirot ŋin ekabaka ka ikapolok; kiswama ekabaka kwape ajaar akirot naka Memukan:

²² Naarai kijuka ibaluan obukui kere luka ekabaka, toma ŋolibuku kwape ejaar eiwadikaeke mama ejai ŋiniteker kwape ejaar aŋajepekec, koyaite ŋolituŋanan ekaleke elopet, ido kolimoroi da kwape ejaar aŋajep naka iketuŋa.