Read Ebaibuli 1961 Esita 4 Bible Online

Esita 4 - Ebaibuli 1961 bible

Esita 4

¹ Kejenu Morudekai nueswamao kere, kocil Morudekai ikenapen, konap epuko kekurwon, koloma kidiŋ ore, kodelo eporoto loepol lokican.

²Kobu kiŋaren orute loka ekabaka: naarai emamei yenepedori alomar orute loka ekabaka konapite epuko.

³Kanolibuku da neadolenenei aicorakinet naka ekabaka ka ekekisil, kojai aibworo naepol oYudayan, ka ailuŋ, ka aimony akiyo, ka elulu: koperoto luipu opukoi ka ekurwon.

⁴Kopotu apesur nuka Esita ka ibwacinake kolimokis ŋes; kokadak akabaka noi noi: kijuka anapito aitanap Morudekai ka alacar da epuko: konye mam abu kiyu.

⁵Kosodi Esita anyaraun Katak, ediopet kobwacin luka ekabaka, luabu ŋesi koseu aijaanakin ŋes, kicorak ŋes alosit mama ejai Morudekai, ajenun akirot ŋin ido kanukinyo kejaar.

⁶Koloma do Katak mama ejai Morudekai neejai aibois naelal naka ere, naesesenas kerute loka ekabaka.

⁷ Kolimok Morudekai ŋes nuadoikis ŋes kere, ka etiai obe loabu Kaman kisumun ekabaka atacakin aiŋadisia nuka ekabaka kanuka Iyudayan, amudiar kes.

⁸ Koinak da aikopunet naka aiwadikaet naka ekisil loalimoritai koSusa amudiar kes, aitodikin Esita, ka alimokin ŋes da; ka aicorakin ŋes alomar mama ejai ekabaka, aiŋaiŋa ŋes, ka ailipakin atekerike kakonyeneke.

⁹Kobu Katak kolimok Esita akiro nuka Morudekai.

¹⁰Kosodi Esita einer ka Katak, koinak ŋes akiro nuiinara Morudekai ebe,

¹¹ “Ejenete ikejaanakinak kere luka ekabaka, ka ituŋa da luka ibukui luka ekabaka, ebe, ŋinituŋanan kere, arai ekiliokit arai aberu, yenelomari alaro nakotoma mama ejai ekabaka, yenimam enyaritai, ejai ekisil ediopet neejai ŋesi, ebe, eario, dimikito yen yenidodit ekabaka kesas loka esabu, ŋes ejari: konye mam eoŋ kanyararitai mama ejai ekabaka apaarasia nu akaisauni.”

¹²Kolimokinai Morudekai akiro ŋun nuka Esita.

¹³ Kosodi Morudekai aicorakin kes ainyakakin Esita akiro ebe, “Siriwomit kotaukon ebe ikui ijo kotogo loka ekabaka aitelekarit Iyudayan kere.

¹⁴ Naarai arai kililiŋi ijo cut kapak kana, enyouni do aiŋarakin ka aitajar naka Iyudayan kamace, konye imudiario jo ka ekek loka papakon: ido iŋai bo nat ejeni ebe elemuni ibu ijo toma ajakanut kanuka apakio nuikote kwape nu?”

¹⁵Kosodi Esita aicorakin kes ainyakakin Morudekai akiro ebe,

¹⁶ “Kolot kotukok Iyudayan kere luejaas Susa, koluŋata kanukaŋ, sirikinyama karaida aimat apaarasia auni paaran ka kuare da: aluni eoŋ da ka akapesur kwape kwaŋin; ŋes konyet alomaria mama ejai ekabaka, namam erai kwape ejaar ekisil: arai da kamudiar, kamudiar.”

¹⁷Kolot do Morudekai, kiswama kwape ejaatar kere nuecorakinit Esita ŋes.