Read Ebaibuli 1961 Esita 7 Bible Online

Esita 7 - Ebaibuli 1961 bible

Esita 7

¹Kopotu do ekabaka ka Kaman opucit ka Esita akabaka.

² Kotema bobo ekabaka Esita kapaaran nakiareit kopucit loka ebino atiar, “Inyo bo ilipit ijo, akabaka Esita? Kiinakinio. Inyo ca da iŋaiŋait ijo? Itodolikinio kiton atutubet naka ajakanutuka.”

³Kosodi Esita akabaka aboŋokin ebe, “Arai kadum asianut kakonyenekon, wu ekabaka, arai da kitojokit ekabaka, koinakinai aijaraka kanuka ailipika, ka ikatuŋa da kanuka aiŋaiŋaka:

⁴ naarai kagwelaritai, eoŋ ka ikatuŋa, amudiario, adanyio, ka aolior da. Konye arai gwai kigwelaritai araut ibulesin ka abulesin, ti keliliŋ, karaida mam tikepedo lokasurup aigel lutiketwania ekabaka.”

⁵Kosodi ekabaka Akasuero atemar aka baka Esita atiar, “Iŋai bo ŋol, ido ai ca do ejai ŋesi, eŋaŋat atitimkin kotauke aikwaikin nen?”

⁶Kotema Esita atiar, “Lokasurup ka lokadinakinit, ŋesi bo lo Kaman lokaronon.” Kosodi Kaman akurianar kakonyen nuka ekabaka ka akabaka.

⁷ Konyou do ekabaka kopucit loka ebino kanyunyurake, koloma omanikor loka etogo lokapolou: kobwo Kaman ailip aijarake kaneejai Esha akabaka; naarai abu koany aronis naenerak ekabaka ŋes.

⁸ Kosodi koboŋ ekabaka komanikor loka etogo lokapolou kolom aibois naka epucit loka ebino; kibirokina Kaman otut loeboio Esha. Kosodi ekabaka atemar atiar, “Itinaikin ca akabaka kakonyeneka otogo?” Napalomun akirot aituk naka ekabaka, aponi korapai akonyen nuka Kaman.

⁹ Kosodi Karabona ediopet kobwacin luajaas kakonyen nuka ekabaka atemar atiar, “Ido koany, akito nueojak ikubitin akaisakany, nueswamakinit Kaman Morudekai loabu kiner nuejok kanuka ekabaka, ebwoete kotogo loka Kaman.” Kotema ekabaka atiar, “Kikajakis ŋes nen.”

¹⁰ Kikajakinai do Kaman akito nuetemokinit Morudekai. Kosodi do anyunyura naka ekabaka aiyamakin.