Read Ebaibuli 1961 Esita 9 Bible Online

Esita 9 - Ebaibuli 1961 bible

Esita 9

¹ Kosodi kolap lokitomonet kaarei, ŋes elap Adar, kapaaranike nakitomonet kauni, naabu koapunitor aicorakinet naka ekabaka ka ekekisil aitodolikinio, kapaaran naamunotor lukasurup luka Iyudayan ayait kes; kwabo abu kilocokin abuburiar kes, koyaitos Iyudayan ŋul lukelaito kes.

² Kotukonokinos Iyudayan oreriakec anatar ibukui kere luka ekabaka Akasuero, aikam ŋul luemootos aitican kes: amamei da ituŋanan yenepedor airebokin kes: naarai kodoikinite atekerin kere akurian kes.

³ Apotu ikapolok kere lukibukui, ka lukibukui, ka ikayaitok, ka ŋul da lukiswamaenenete aswam naka ekabaka kiŋarakis Iyudayan; naarai kodoikinite kes akurian Morudekai.

⁴ Naarai kerai Morudekai ekapolon kotogo loka ekabaka, kisiarakina eemutuke anatar ibukui kere: naarai kiyatanakin etuŋanan ŋol Morudekai apoloor noi.

⁵Kodanyata Iyudayan lukasurupokec kere iposete kes kekileŋ, ka aiar, ka amudiar, kiswamakis ŋul lukelaito kes kwape akototor.

⁶KoSusa togo lokapolou apotu Iyudayan koarata komudiasi ituŋa akwat akany.

⁷Ka Parasanadata, ka Dalapon, ka Asapata,

⁸ka Porata, ka Adalia, ka Aridata,

⁹ka Paramasata, ka Arisai, ka Aridai, ka Baisata.

¹⁰ Koarata da odwe lutomon luka Kaman okoku loka Kamedata, lokasurup loka Iyudayan; konye mam kes apotu kibwaikis akecekan onasit.

¹¹Kapaaran kaŋin aponi koyaunai etiai loka ŋul luaarakinio Susa togo lokapolou mama ejai ekabaka.

¹²Kotema ekabaka Esita akabaka atiar, “Aarata Iyudayan amudiasi da ituŋa akwat akany koSusa togo lokapolou, ka odwe lutomon luka Kaman da; aso do eswamata anyoika kobukui ice uka ekabakal Inyo bo ca ilipit ijo? Kiinakinio. Arai inyo bo bobo Iinainait? Kiswamai.”

¹³ Kosodi Esita atemar atiar, “Arai kitojok ekabaka, kocamakinai Iyudayan luejaas Susa aswam moi da kwape ejaar ekisil loka lolo, kikajakinai da odwe lutomon luka Kaman akito.”

¹⁴Kicorak ekabaka kikwaikinai nepenen: kolimoroi ekisil koSusa togo lokapolou; kikajakinai da odwe lutomon luka Kaman.

¹⁵Kotukonokinos Iyudayan luajaas Susa apaaran nakitomonet kaoŋon da naka elap Adar, koarata ituŋa akwat auni koSusa; konye mam kes apotu kibwaikis akecekan onasit.

¹⁶ Kotukonokinos Iyudayan ice luajaas obukui, kobwoikis aijarakec, kojaut kaibworar kama kalukasurupokec, koarata ilukumin akaisakanykaarei ka lukany kaŋul kalukelaito kes; konye mam kes apotu kibwaikis akanikec onasit.

¹⁷Aponi ŋun kiswamai kapaaran nakitomonet kauni naka elap Adar; kapaaranike nakitomonet kaoŋon kibworasi kesi, kituluosi apaaran naka ipucino ka aiyalama.

¹⁸Konye apotu Iyudayan luajaas Susa kotukonokinos kapaaran nakitomonet kauni ka apaaran nakitomonet kaoŋon da; kapaaran nakitomonet kakany kibworasi, kituluosi apaaran naka ipucino ka aiyalama.

¹⁹ Ŋes ituluoriata Iyudayan luka ireria ludidik luiboiete koreria luemameete arwatatin apaaran nakitomonet kaoŋon naka elap Adar apaaran naka aiyalama ka ipucino, apaaran da naejok, naijaanakinotor da akoreta.

²⁰Kiwadika Morudekai ŋun, kijuka ibaluan mama ejaas Iyudayan kere luajaas obukui kere luka ekabaka Akasuero, lueapiete ka luelwaka da,

²¹ kicorak kes aidar apaaran nakitomonet kaoŋon naka elap Adar, apaaranike nakitomonet kakany da, ŋolikaru.

²² Kes apaarasia nuadumuniata Iyudayan aibworar kama kalukasurupokec, elap da loebelokinotor icanikec araun aiyalama, nakaibworo araun apaaran naejok; kituluosi kes apaarasia nuka ipucino ka aiyalama, ka nuka aijaanakinor akoreta, ainakinia da lukican ainakineta.

²³Kisumunoto Iyudayan aiswamaenen kwape egeariata, ido kwape ewadikakinia kes Morudekai;

²⁴ naarai abu Kaman okoku loka Kamedata, Egagait, lokasurup loka Iyudayan kere, kopeleik amudiar Iyudayan, abu kilamilam Pur kes iroeta, apiar kes, ka amudiar da;

²⁵ konye kedol akirot akonyen nuka ekabaka, kicorak kobaluan eboteteke lokaronon loabilakinit ŋesi Iyudayan kobe akouke elopet; ŋes da ka odweke kikajakinai akito.

²⁶Ŋes kemaikinere apaarasia ŋun Purim, kwape ejaar ekiror Pur. Kosodi kanuka akiro kere nuka ebalua kaŋol, ka nuadautu kesi aanyun kakirot kaŋin, ka nuadoikis kes da,

²⁷ ŋes kicorakiniata Iyudayan, kisumunot da kanukec, kanuka aurikec da, ka ŋul kere luimoranakinos kakes, ebe, idarenenete apaarasia ŋun nuarei kwape ajaar aiwadikaeteke, ido kwape ajaar apak naeseunitai ŋolikaru.

²⁸Kiitununio apaarasia ŋun kidareneneo da anatar aturio kere, ikekia kere, kanolibuku ka ŋolire; kinyeis apaarasia ŋun nuka Purim aitwatanario koYudayan, karaida aiitunetekec aolior kaurikec.

²⁹ Kosodi Esita akabaka, akoku naka Abikail, ka Morudekai Eyudayat, aiwadik kapolou kere aitogogoŋ ebalua ŋol lokiareit loka Purim.

³⁰Kijuka ibaluan mama ejaas Iyudayan kere, mama ejaas ibukui akwatat ka akaisaarei ka lukanykaarei luka ajakanut naka Akasuero, kakiro nuka ainapakin ka abeit,

³¹aitogogoŋ apaarasia ŋun nuka Purim kapakiokec nueseunitai, kwape kicorakinia Morudekai Eyudayat ka Esita akabaka, ido kwape kicorakiniata kesi kanukec ka aurikec da, kakiro nuka ailunukec ka aimony.

³²Kitogogoŋ aicorakinet naka Esita akiro ŋun nuka Purim. Kiwadikai da oitabo.