Read Ebaibuli 1961 Anyoun 10 Bible Online

Anyoun 10 - Ebaibuli 1961 bible

Anyoun 10

¹ Kotema EJAKAIT Musa atiar, “Koloma mama ejai Parao: naarai etininik eketau, ka itauon da luka ikekejaanakinak, tetere etoduni aanyunetaka nu kamakec:

² Tetere ilimokini aki nuka okokukon, ka ikoku yenika ikokukon, akiro nueswamak eoŋ Misiri, ka aanyunetaka nueswama kamakec; tetere ijenunete ebe Eoŋ EJAKAIT.”

³ Kolomasi Musa ka Aaron mama ejai Parao, kotemasi ŋes atiar, “Inera EJAKAIT, Edeke loka Iburanian, kwanata ebe, ‘Itodoli ijo ai iŋerit anonokiar kakonyeneka? kisiik ikatuŋa alosit, tetere kejaanakinete eoŋ.

⁴ Konye arai kiŋer aisiikin ikatuŋa alosit, koany, ayauni moi emaase oikorunokon:

⁵ Erapiari akwap kere, komam yenepedori aanyun alup: enyamari luedeuna kotoma kaŋul kaluamudiario, lukideikinit jo akako, enyamari da ŋolikitoikon kere loepoloi korony.

⁶ Ilelebunos itogoikon, ka itogoi luka ikonikejaanakinak, ka itogoi luka Imisirian kere; namam lukapapakon karaida lukapapaakon aanyunito, ageun kapaaran naajaatar akwap aitodollolo.’ ” Kibelokin koloma kaneajai Parao.

⁷ Kotemasi ikejaanakinak luka Parao ŋes atiar, “itodoli etuŋanan lo ai erai eic kamawok? kisiik ituŋa alosit, tetere ijaanakinete EJAKAIT Ekecedeke; eroko kereka ijo ejenuna ebe amudiar Misiri?”

⁸Koyaunai bobo Musa ka Aaron mama ejai Parao. Kotema kes atiar, “Koloto, kijaanakis EJAKAIT Ekusideke: konye lukaŋai luelosete?”

⁹ Kotema Musa atiar, “Kilosi kaludidikikosi ka imakiokosi, ka idwekosi lusap ka lupesur, ka isipaninikosi luka amerekekin ka luka aituk kilosi isio; naarai kibusakinit aipoikin EJAKAIT epucit.”

¹⁰Kotema kes atiar, “Kojaun EJAKAIT kayes, kwape kesiikinia yes alosit, ka idwekus: kocoito; naarai ejai aronis akonyenekus.

¹¹Mere kwaŋin: koloto do yesi luiraasi ikiliok, kijaanakis EJAKAIT: naarai ŋun kes nuimielasi.” Kireŋearai kes kakonyen nuka Parao.

¹² Kotema EJAKAIT Musa atiar, “Korio akonikan akwap nako Misiri kanuka emaase, tetere ebuni akwap nako Misiri, anyamar ŋolikiot loka akwap, kes kere luabu akaka kideu.”

¹³Korio Musa ekebela akwap nako Misiri, kitukut EJAKAIT ekwam lokokide toma akwap apaaran ŋin kere, ka akuare kere; kiwala akwap koyau ekwam lokokide emaase.

¹⁴ Koŋata emaase akwap kere nako Misiri elosi, kodoo oikoruno kere luko Misiri; apolo noi emaase; mam apeŋo ejauna emaase loetia nen, karaida akauloke mam ejaun loetia nen.

¹⁵ Naarai abu korapia akwap kere, komusimusior akwap; kikoco ŋolikiot loka akwap ka araito kere naka ikito naedeunit akaka: komam itasali idiokiot kere, yenika ekitoi, arai yenika ikui lukorony, anatar akwap kere nako Misiri.

¹⁶ Konyara Parao Musa ka Aaron atipet; kotema atiar, “Adiaka kama ejai EJAKAIT Ekusideke, kamakus da.

¹⁷ Aso do keŋaiŋait, kisionioi akadiaket irwan na bon, kilipata EJAKAIT Ekusideke, tetere elemari atwanare na bon kamakaŋ.”

¹⁸ Koloma kaneajai Parao, kilip EJAKAIT.

¹⁹ Kitukut EJAKAIT ekwam loegogoŋ noi lokoto, loabu kokuta emaase, kirenek Aŋolol Nakareŋan: mam abu kosal karaida ediopet koikorun kere luko Misiri.

²⁰ Konye kitogogoŋ EJAKAIT etau loka Parao, mam abu kisiik idwe luka Isirael alosit.

²¹ Kotema EJAKAIT Musa atiar, “Korio akonikan akuj, tetere ejaun amuton akwap nako Misiri, amuton naepedorio ararap.”

²² Korio Musa akekan akuj; kojaun amuton naejesi cucucuc akwap kere nako Misiri apaarasia auni;

²³ Mam apotu koanyununos, karaida ituŋanan anyoun kaiboisike adaun apaarasia auni: konye ajai aica aiboisio kere nueboiononoto idwe luka Isirael.

²⁴ Konyarau Parao Musa, kotema atiar, “Koloto yesi, kijaanakis EJAKAIT: konye kitasalata ikusisipanin luka amerekekin ka luka aituk: koloto ka ikusidwe da.”

²⁵Kotema Musa atiar, “Ibusakinit ijo ainakin isio asuban ka ainakineta nuicweio, tetere kiinakini EJAKAIT Ekosideke asuban.

²⁶Kiupari kaikosibaren da; mam kitasali ediomagegeret; naarai kiyaŋaari kes aijaanakinia EJAKAIT Ekosideke; ido mam kijeni luibusakinitor aijaanakinia EJAKAIT aitodol nakidolio ŋina.”

²⁷ Konye kitogogoŋ EJAKAIT etau loka Parao, mam abu kisiik kes alosit.

²⁸Kotema Parao ŋes atiar, “Irwa kaneajai, kocoite, sirikiany bobo akonyeneka; naarai apaaran naianyunia akakonyen itwani.”

²⁹ Kotema Musa atiar, “Iner ijo ejok; mam bobo aanyuni akonikonyen.”