Read Ebaibuli 1961 Anyoun 14 Bible Online

Anyoun 14 - Ebaibuli 1961 bible

Anyoun 14

¹Kotema EJAKAIT Musa atiar,

² “Kolimok idwe luka Isirael koboŋosi kau, kidukuroto kiŋaren ka Pi-kakirot, kidiŋ ka Migidol ka aŋolol, kiŋaren ka Baal-sepon; idukurete ariri naka aŋolol.

³ Etemari Parao nuka idwe luka Isirael ebe, ‘Etotoliki kes akwap, agoloo amodiŋ.’

⁴ Etogogoŋi eoŋ etau loka Parao, etupuni kes; adumuni eoŋ aibuses kaneejai Parao ka ajoreke kere; ejenunete da Imisirian ebe arai Eoŋ EJAKAIT.” Kiswamata kwaŋin.

⁵Aponi kolimokinai ekabaka loka Misiri ebe, “Akerata ituŋa.” Kibelokin etau loka Parao ka loka ikekejaanakinak mama ejaas ituŋa; kobalas ebe, “Inyo bo yen yenikisub, aisiikin Isirael anyoun kaijaanakin oni?”

⁶Kitemok agalike, kouparos ka iketuŋa:

⁷Koyaŋa agalin akwat akanykape nuseuna, ka agalin kere nuko Misiri, ka ijaka ayait kes kere.

⁸ Kitogogoŋ EJAKAIT etau loka Parao ekabaka loka Misiri, kibwapak idwe luka Isirael: naarai alomarete idwe luka Isirael kakan naarioro.

⁹ Kibwapakis Imisirian kes, ibalasin kere ka agalin nuka Parao, ka ikebwanenokoke ka akejore, kodolokis kes idukurete ariri naka aŋolol, owai loka Pi-kakirot, kiŋaren ka Baal-sepon.

¹⁰ Keapia Parao, kiteluos idwe luka Isirael akonye, ido koany, kokubokinos Imisirian kes; kokuriakaros noi: komonyata idwe luka Isirael mama ejai EJAKAIT.

¹¹ Kobalas Musa ebe, “Kanu emameatar atesin koMisiri, ŋes kiyaunia sio atwakikin modiŋ? Kanukinyo kiswamakinia sio kwana, aitolomun sio koMisiri?

¹² Mere na ŋes akirot nakibala isio jo koMisiri ebe, ‘Kinyeinai sio kejaanakis Imisirian?’ Naarai ejok aijaanakin Imisirian itia atwakikin modiŋ.”

¹³ Kobala Musa ituŋa ebe, “Sirikikuriakaros, kobwaata kopalarito, koanyutu aitajar naka EJAKAIT, nakiswamakini yes lolo: naarai Imisirian luianyunete lolo, mam bobo ianyunete kes ikar kere.

¹⁴ Kijiikini EJAKAIT yes, kililiŋete yesi da.”

¹⁵Kobala EJAKAIT Musa ebe, “Kanukinyo imonyia mama ajai? Kolimok idwe luka Isirael kolototo kiŋaren.

¹⁶ Kitonyou ijo ebelakon, korio akanikon aŋolol, kotiak ŋes; itorete idwe luka Isirael kidiŋ kaŋolol neeonit.

¹⁷ Ka eoŋ da, koany, etogogoŋi itauon luka Imisirian, edoete atupite kes; adumuni eoŋ aibuses kaneejai Parao, ka ajoreke kere, kagalinike, kokebwanenokoke da.

¹⁸Ejenunete Imisirian ebe arai Eoŋ EJAKAIT, naadumunia aibuses kaneejai Parao, kagalinike, kokebwanenokoke da.”

¹⁹ Konyou emalaika loka Edeke loeŋarenikinit ajore naka Isirael koboŋo kaukec; konyou epir loka edou koiŋarenekec, kobwo kokaukec:

²⁰ Kobu kosipokin kidiŋ ajore naka Imisirian ka ajore naka Isirael; kojai edou ka amuton, konye kocaik kuare: mam kwi apotu kodolokis ŋul akuare kere.

²¹ Korio Musa akekan aŋolol; kitukut EJAKAIT ekwam lokokide loegogoŋ aitoboŋor aŋolol akuare kiya, kitarau aŋolol akwap naeonit, kotiakas akip.

²² Kolomasi idwe luka Isirael kidiŋ aŋolol neeonit: kosubito akip kamakec bala arwatat kakan nakoreten, kakan da nakokediany.

²³Kotupasi Imisirian, kolomasi akaulokec kidiŋ aŋolol, ibalasin kere luka Parao, ka agalinike, ka ikebwanenokoke.

²⁴Kosodi kanen kotoma akwenyunet naka tupuruc, kosesen EJAKAIT ajore naka Imisirian kotoma opir loka akim ka edou, kisiyaloŋoŋ ajore naka Imisirian.

²⁵Kisipok akokoron nuka agalinikec, kireŋeata kolanirikinito; tape ebalas Imisirian ebe, “Kakerata kakonyen nuka Isirael; naarai itijie EJAKAIT Imisirian kanukec.”

²⁶Kotema EJAKAIT Musa atiar, “Korio akanikon aŋolol, tetere eboŋokinete akip oMisirian, agalinikec, ka ikebwanenokokec.”

²⁷ Korio Musa akekan aŋolol, Koboŋok aŋolol kagogoŋuke napiwalari; kokerata Imisirian; kilakilakak EJAKAIT Imisirian kidiŋ aŋolol.

²⁸ Koboŋut akip, korapasi agalin ka ikebwanenok, ajore kere naka Parao naabu koloma aŋolol kokaukec; mam abu kosalak ediopet kakesi.

²⁹ Konye kitcro idwe luka Isirael neeonit kokidiŋ aŋolol; kosubito akip kamakec bala arwatat kakan nakoteten ka nakokediany da.

³⁰ Kwaŋin kitajar EJAKAIT Isirael kapaaran kaŋin kakan naka Imisirian; koany Isirael Imisirian etwakito kariri kaŋolol.

³¹ Koany Isirael aswam naepol naeswamakini EJAKAIT Imisirian, koyoŋata ituŋa EJAKAIT: kiyuut EJAKAIT ka Musa ekejaanakinanike.