Read Ebaibuli 1961 Anyoun 15 Bible Online

Anyoun 15 - Ebaibuli 1961 bible

Anyoun 15

¹ Kosodete Musa ka idwe luka Isirael ayeikin EJAKAIT ekosio lo, kobalas ebe, “Ayeikini EJAKAIT, naarai epiko cut: Abu kocakak ebalasi ka ekebwanenonike toma aŋolol.

² EJAKAIT ŋes akagogoŋ ka ekosioka, Aluor ŋesi aitajarioka: Lo ŋes Ekadeke, eturenenei ŋes; Edeke loka papaka, etopolonori ŋes.

³ Erai EJAKAIT ekajion: EJAKAIT ŋes ekekiror.

⁴Acakaki agalin ka ajore naka Parao toma aŋolol; Alumosi lukapolokoke luseuna Aŋolol Nakaren an.

⁵Arapa kes aidules: Ejesaros neidul kwape amoru.

⁶ Wu EJAKAIT, ibus akonikan naketeten kotoma agogoŋ, Wu EJAKAIT, idecideci akonikan nakoteten lokasurup.

⁷ Ibirori kes lukinyoikinete asurokin jo Kotoma apolou naka aibusesukon: Iyakuuni anyunyurakon, kicwe kes kwape agugu.

⁸ Ido ekwam loka okumesikon itadakuni akipi, Kobwaata akalel atukon; Korurwak aidules otau loka aŋolol.

⁹ Abala lokasurup ebe, ‘Atupakini, adolokini, akori luŋatan; Isimonikinio akainobel kamakec; Autuni ekakileŋ, emudiari akakan kes.’

¹⁰Ibu kitukut ekwamukon, korapa aŋolol kes: Kolumosi kwape asasit toma akipi nukagogonok.

¹¹ Wu EJAKAIT, iŋai eputosi bala jo kotoma odekesinei? Iŋai eputosi bala jo, loibus kotoma alaunit, Lokiyonitai kotoma aiturio, loiswamai nukaumokin?

¹²Ibu korio akonikan nakoteten, Kiliko kes akwap.

¹³ Kotoma akoniitim ibu kiŋarenik ituŋa luilakuni: Ibu kiteten kes kagogoŋukon kiton aiboisikon nakalaunan.

¹⁴ Apuput atekerin, emaranete: Abu ariebo kikam iuibciete koPilisitia.

¹⁵ Koumokis do lukapolok luka Edom; Kikam amaran imaseniko luka Moab; Elicaros luiboiete kere koKanaan.

¹⁶ Ebirokini kes ailiili ka etasuro; Kanuka apolou naka akonikan epalarito kwape amoru; Aitodol neilamarotor ikonituŋa, wu EJAKAIT, Aitodol neilamarotor ikonituŋa luibu kodum.

¹⁷ Itolomari, iraikini kes oroŋat loka airumetekon, Aibois naitemonok ijo aiboi kotoma, wu EJAKAIT, Aibois nakalaunan, naetogogonoete akaninikon, wu EJAKAIT.

¹⁸Irumi EJAKAIT ikar kere.”

¹⁹Naarai apotu ibalasin luka Parao nepepe kagalinikec ka ikebwanenok kolomasi aŋolol, kinyakak EJAKAIT akipi nuka aŋolol mamakec; konye koloto idwe luka Isirael kaneeoŋit kidiŋ aŋolol.

²⁰ Koyaŋa Miriam anabi, kinaci naka Aaron, isiman kakanike; kolomasi aŋor kere kotupasi ŋes kojaas kisiman kikosiete.

²¹Koboŋok Miriam kes atiar, “Koyeikisi EJAKAIT, naarai epiko kapolou; Abu kocakak ebalasi ka lokebwanenonike aŋolol.”

²²Kiŋarenik Musa Isirael anyoun kAŋolol Nakareŋan, kolomasi kodoloto amodiŋ naka Sur; koloto apaarasia auni komodin, komam edumunete akipi.

²³ Kedoloto Mara, mam apotu kopedosi aimat akipi nuka Mara, naarai adwarak: ŋes amaikinere ekiror ŋol Mara.[4]

²⁴Kirurumakis ituŋa Musa, kobalas atiar, “Inyo bo do kimasi?”

²⁵ Komony ŋesi mama ejai EJAKAIT: kitodik EJAKAIT ŋes ekitoi, kocakak akipi, koluoros akip nukajijimak. Nen ŋes esilakinia kes ekisil ka aicorakinet, kitem kes kanen.

²⁶ Kobala ebe, “Arai kidunyak ijo arimar eporoto loka EJAKAIT Ekonideke, kiswama naedolit kakonyeke, kitoik akit aicorakinetake, koric ikekisila kere, mam kebwaikini jo adekesia kere, nuebwaik Imisirian; naarai arai Eoŋ EJAKAIT loketaŋaleuni jo.”

²⁷ Kodoloto Elim, neajaas ikico itomon kaarei luka akipi, ka idukudukun akaisakanykaarei; kidukuroto nen neajaas akip.