Read Ebaibuli 1961 Anyoun 22 Bible Online

Anyoun 22 - Ebaibuli 1961 bible

Anyoun 22

¹ “Arai kekokou etuŋanan emoŋ, arai emerekek, kosodi aiar, arai agwelar; itegelio imoŋin ikany itia emoŋ, imerekekin iwoŋon itia emerekek.

² Arai kedumun ekokolan epakapakai etogo, kosodete aibuŋ ŋes kotwana, mam ejaun akirot kanuka akeokot.

³ Arai kiwalaki akwap, ejaun akirot kanuka akeokot: ibusakinit ŋes aigel; arai emamei ŋes ibore, egwelario ŋes kanuka akokoke.

⁴ Arai kedumun ibore yenikekokouni ŋesi ejari kakanike, emoŋ arai esigiria arai emerekek; egeli irwan aarei.

⁵“Arai kitadak etuŋanan emanikor arai amana naka emusabibu, kojalak ikebaasit ainyam emanikor loka ecetuŋanan; egeli kanuitelekarito ajokis komanikorike, ka nuitelekarito ajokis kamanake naka emusabibu.

⁶“Arai kenoku akim, kiniepakin okukwa, kosodete atukon nuka akima, arai akima nuebwanete, arai emanikor, aidopor; abeit egeli yenikinokokin akim.

⁷“Arai kisinadiki etuŋanan ekeidunyet apesan arai iboro, kokokwarai kotogoke; ketakanu ekokolan, etaci irwan aarei.

⁸Arai mam ekokolan etakanuni, ikunyakini elopet etogo neejai Edeke, aanyun arai diat mam abu kibwaik akekan oboro luka eidunyeteke.

⁹ “Kanuka ŋinikirot naka adiakar, arai kanuka emoŋ, arai kanuka asigiria, arai kanuka amerekek, arai kanuka inapen, arai kanuka ŋin yeneoliorit, yenelimor ituŋanan ebe, ‘Ŋes yen,’ eyaŋaunio akiro nuka ŋul luarei mama ejai Edeke; ŋin yenetubokini Edeke akirot etacakini ikeidunyet irwan aarei.

¹⁰“Arai kijokoki ituŋanan ikeidunyet asigiria, arai emoŋ, arai amerekek arai etiaŋ kere: kosodi atwanare, arai aimusuŋio, arai aireŋeario komam idiotuŋanan eanyunit:

¹¹ Aiyaposit naka Edeke ejai kidiŋikec, arai mam ibwaikinit akekan oboro luka ikeidunyet; iyuuni ilopet, kwabo mam ii etaci.

¹² Konye arai kekokwari kaneejai ŋesi, etacakini ilopet-ibore.

¹³Arai ekwaeakwacatai, eyauni koluor aanyunet, mam etacakini yenekwacakwacatai.

¹⁴“Arai kilipa ituŋanan iidunyeteke ibore, kicanicanun, arai kotwana, komamei ilopet, abeit etacakini.

¹⁵Arai ejai ilopet mam etacakini; arai erai yeneropitai, elomari oropitike.

¹⁶ “Arai kecodocod etuŋanan abekot naeroko isinera, koperoto kaŋes, abeit elemuni iboro luka amurake, koraun do aberuke.

¹⁷ Arai kegiri papake cut akorakin ŋes, etaci etiai kwape ejaar aimany abekon.

¹⁸ “Sirinyeinenei akacudan ejari.

¹⁹ “Ŋinituŋanan yeneperenenei ketiaŋ abeit eario.

²⁰ “Yeneinanakini asuban mama ejai edeke ece, nabarai mama ejai EJAKAIT bon, emudiario cut.

²¹ “Sirikiswamak emoit erono, karaida areit ŋes: naarai iraas kolo yesi da imo kakwap nako Misiri.

²² Siritieanete apuserun ka ikokiok.

²³ Arai iticanenete kes kemonyata neajai, abeit apupuni akeceimony;

²⁴ Eresiar anyunyuraka noi, kaarete kekileŋ; akusiŋor da eraunos apuserun, ka ikusidwe da eraunos ikokiok.

²⁵ “Arai kiyu idiopet kotuŋaka kapesan, kicana ŋesi, sirikisub bala itepesenit ŋes; ido mam itubokini ameda.

²⁶ Arai kiititini ijo egoe loka eidunyetekon, kinyakanakinenei ŋes eroko akoloŋ elomara.

²⁷Naarai ŋol ŋes eimuketeke bon, ŋes anapito naka akuanake; imukor kinyo? kosodi naemonyia mamaka apupununei ŋes; naarai asiana eoŋ.

²⁸ “Sirirasenenei Edeke, ido sirilamanakinene ekapolon loka ituŋakon.

²⁹ Sirikiyap ainakin amio naka araitokon, ka akonijon da. Kiinakini eoŋ ekiyai kodwekon.

³⁰ Kikonenenei nen kimoijinikon ka amerekekinikon da; kojaenena katotoke apaarasia akanykaarei; kiinakini eoŋ kapaaran nakikanyetekauni.

³¹ “Iraunos do ituŋa lukalaunak kama ajai: kanuka ŋun mam inyamete akiriŋ naepoopoot etiaŋ loka ais; icakanakinete iŋokwo.